قازاقستان بيلىگىندەگى شەندىلەردىڭ ىشىندە قايرات قوجامجاروۆتىڭ ورنى بولەك. قۇرىلۋ تاريحى سوناۋ 90-جىلداردىڭ اياعىنان باستالاتىن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل جونىندەگى اگەنتتىكتە كۇنى كەشەگە دەيىن بىرنەشە باسشى اۋىسىپ قانا قويعان جوق، مەملەكەتتىك قۇرىلىمنىڭ ءوزى دە بىرنەشە رەت وزگەرىسكە ۇشىرادى. ءبىر كەزدەرى مەملەكەتتىك قىزمەت ىستەرى مەن جەمقورلىقپەن كۇرەس (قارجى پوليسياسى) اگەنتتىكتەرى ءوز الدىنا جەكە ۆەدومستۆو دا بولدى.

سوڭعى رەت 2016 جىلعى 13 قىركۇيەكتە پرەزيدەنت جارلىعىمەن ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى قايتا قۇرىلدى. اگەنتتىك باسشىلىعىنا وسى ۆەدومستۆونى 2014 جىلدىڭ 6 تامىزى مەن 2015 جىلدىڭ 11 جەلتوقسانى اراسىندا باسقارعان قايرات قوجامجاروۆ تاعايىندالعان بولاتىن. انتيكوررۋپسيالىق سالادا قايرات پەرنەش ۇلىنىڭ ەسىمى كوپكە تانىس. اتالعان ۆەدومستۆو سىبايلاستىق سيپاتى بار تالاي شۋلى ىستەردى تەرگەپ، سوتقا جەتكىزگەن. ەكس-پرەمەر سەرىك احمەتوۆ، «استانا ەكسپو-2017» ۇلتتىق كومپانياسىنىڭ بۇرىنعى باسشىسى تالعات ەرمەگيايەۆ ءىسىن ەشكىم ۇمىتا قويمادى. بىلتىرعى اتى-شۋلى پروسەستەردەن قازاقستان جۋرناليستەر وداعىنىڭ ءتوراعاسى سەيىتقازى ماتايەۆ پەن جۋرناليست بيگەلدى عابدۋللين ءىسىن دە ق. قوجامجاروۆ باسقارعان جەمقورلىققا قارسى ءىس-قيمىل جونىندەگى ۇلتتىق بيۋرو جۇرگىزگەنىن بىلەسىز.

زور قوعامدىق رەزونانس تۋعىزاتىن شۋلى ىستەرمەن تانىمال اگەنتتىكتىڭ باسشىسى ق. قوجامجاروۆ كوپتەن بەرى ەل نازارىنان جوعالىپ كەتتى. سوڭعى رەت ول اقپارات قۇرالدارىنا جىل باسىندا عانا شىعىپ، «بايتەرەك» ۇلتتىق حولدينگىندەگى قارجى جىمقىرۋ وقيعاسىنا قاتىستى پىكىر بىلدىرگەن بولاتىن. ودان كەيىن پەرنەشۇلىن باسىلىم بەتتەرىنەن بايقامادىق. اگەنتتىك وتكىزگەن نەمەسە سىبايلاس جەمقورلىق، مەملەكەتتىك قىزمەتكە قاتىستى شارالاردا كوبىنەسە ورىنباسارى اليك شپەكبايەۆ توبە كورسەتىپ ءجۇر. اقپارات قۇرالدارى دا بۇل سالاعا قاتىستى ماتەريالدارىندا ا. شپەكبايەۆتىڭ سوزدەرىنە سىلتەمە جاساۋدا.

باسشىنىڭ بارلىعى تاڭ اتقاننان كۇن باتقانعا دەيىن ەلدىڭ كوز الدىندا جۇرۋگە نەمەسە گازەت بەتىنەن، كوگىلدىر ەكراننان تۇسپەۋگە مىندەتتى ەمەس، ارينە. ءبىراق، ەگەر ول باسشى جۋرناليستەردەن جالتارمايتىن، ءوز جۇمىسىنا قاتىستى باق-پەن تىعىز بايلانىس ۇستايتىن شەنەۋنىك بولسا، كوپشىلىكتىڭ «بۇل نەگە كورىنبەي كەتتى؟» – دەۋى زاڭدى. ونىڭ ۇستىنە انە-مىنە جاز دا اياقتالىپ، قوڭىر كۇزبەن بىرگە جاڭا ساياسي ماۋسىم باستالادى. جاڭا ماۋسىمنان جۇرتشىلىق كوپ جاڭالىق كۇتەدى.

وسى جەردە ق. قوجامجاروۆتىڭ جۇرت نازارىنان جوعالىپ كەتۋىمەن تىكەلەي بايلانىسى بولماسا دا، ول باسقاراتىن اگەنتتىك قىزمەتىنە قاتىستى مىنا ءبىر جايتتى اتاپ وتكەن ءجون. شىلدەنىڭ باسىندا الماتىدا تالعات ماحاتوۆ ەسىمدى ازامات مەدەت جاماشيەۆ دەگەن كەدەنشىنىڭ ولىمىنە قاتىسى بار دەگەن كۇدىكپەن قاماۋعا الىندى. ت.ماحاتوۆ وسىدان 5-6 جىل بۇرىنعى اتاقتى «قورعاس ىسىندە» باستى كۋاگەر بولعانىن بۇگىندە بىرەۋ بىلسە، بىرەۋ ۇمىتىپ ۇلگەردى. اتىشۋلى ءىس تۋرالى از-ماز مالىمەت بىلەتىندەردىڭ بولجاۋىنشا، قازىرگى تاڭدا «قورعاس» داۋىنا قاتىستى جاڭا جاعدايلار پايدا بولىپ، تەرگەۋ جاندانعان كورىنەدى. جىل باسىندا ءبىرقاتار زاڭنامالارعا ەنگەن وزگەرىستەرگە ساي، جەمقورلىققا قارسى قىزمەت وكىلدەرىنىڭ قاتىسى بار قىلمىستار بويىنشا تەرگەۋ، ىزدەستىرۋ جۇمىستارىن جۇرگىزۋ ۇلتتىق قاۋىپسىزدىك كوميتەتىنە جۇكتەلگەن بولاتىن. بۇل وقيعا جاي عانا كەزدەيسوقتىق پا، الدە قوس كۇشتىك قۇرىلىم اراسىندا شىنىمەن شيەلەنىس تۋعانىنىڭ كورىنىسى مە، ول جاعىن جاقىندا بىلەتىن بولامىز.

جەڭىس سابىرجان ۇلى