وسىدان ءبىر جىل بۇرىن قازاقستاندا قوعامدىق ورىندارداعى نامازحانالاردى جاۋىپ تاستاعان بولاتىن. مۇنى ق ر ءدىن جانە ازاماتتىق قوعام مينيسترلىگى نامازxانالار مەملەكەتتىك ورگانداردان ءۇش ءجۇز مەتر شالعاي جەردە ورنالاسۋى كەرەك ەكەنىن، الايدا بولاشاقتا اتالعان ەرەجەگە وزگەرىستەر ەنگىزىلەتىنىن ايتقان. نامازحانالاردىڭ جابىلۋىنا قاتىستى ءدىنتانۋشى قايرات جولدىباي دا ءوز الاڭداۋشىلىعىن بىلدىرگەن ەدى. Qamshy.kz اقپارات اگەنتتىگى دە اتالمىش ماسەلەنى كوتەرگەن بولاتىن. 

مەملەكەتتىڭ زايىرلى قاعيداتتارىنىڭ ساقتالۋىن قامتاماسىز ەتۋ جانە ءدىن جولىنداعى ازاماتتاردىڭ سۇرانىسىنا سايكەس، ءدىن ىستەرى جانە ازاماتتىق قوعام مينيسترىلىگى قۇلشىلىق بولمەلەرىن (نامازحانا) اشۋعا جانە ءدىني ادەبيەتتى ساتاتىن كىتاپ دۇكەندەرىنە ارنالعان تالاپتاردى قايتا قارادى دەپ جازادى Qamshy.kz اقپارات اگەنتتىگى ق ر ءدىن ىستەرى جانە ازاماتتىق قوعام مينيسترىلىگىنە سىلتەمە جاساپ.

ءدىن ىستەرى جانە ازاماتتىق قوعام ءمينيسترى ن.ەرمەكبايەۆتىڭ بۇيرىعىمەن ءدىني ادەبيەتتى جانە ءدىني مازمۇنداعى وزگە دە اقپاراتتىق ماتەريالداردى، ءدىني ماقساتتاعى زاتتاردى تاراتۋ ءۇشىن ارنايى ستاسيونارلىق ءۇي-جايلاردىڭ، سونداي-اق، عيبادات ۇيلەرىنەن (عيماراتتارىنان) تىس جەرلەردە ءدىني ءىس-شارالاردى وتكىزۋگە ارنالعان ءۇي-جايلاردىڭ ورنالاستىرىلۋىن ايقىنداۋ جونىندەگى جاڭا نۇسقاۋلىق قابىلداندى.

جاڭا نۇسقاۋلىققا ەنگىزىلگەن جاڭاشىلدىقتاردىڭ نەگىزگىسى – تەمىر جول جانە اۆتوۆوكزالدار، اۋەجايلار مەن پورتتاردا ءدىني ءىس-شارالاردى وتكىزۋگە ارنالعان قۇلشىلىق بولمەلەرىن اشۋعا قاتىستى شەكتەۋدىڭ الىنىپ تاستالۋى. اتالعان وزگەرىس – الىس جولعا شىعىپ، ساياحاتتايتىن ءدىندارلاردىڭ ءدىني قاجەتتىلىكتەرىن قاناعاتتاندىرۋ مەن ولارعا بارىنشا جاعداي جاساۋ ماقساتىندا ەنگىزىلىپ وتىر. ەلىمىزگە قوناق رەتىندە كەلەتىن نەمەسە ەل اۋماعىندا ساياحاتتاپ جۇرەتىن ءدىندارلار ۇشاقتارىن نەمەسە قاتىنايتىن كولىك تۇرلەرىن كۇتىپ، اۋەجايلار مەن اۆتو جانە تەمىرجول ۆوكزالدارىنىڭ كۇتۋ بولمەلەرىندە ۇزاق ۋاقىت بويى وتىرۋعا ءماجبۇر بولىپ جاتادى. سوندىقتان ولاردىڭ قۇلشىلىق جاساۋىنا اتالعان عيماراتتاردا ارنايى ورىندار بولۋى قاجەت.

بۇرىندارى مەملەكەتتىك ورگانداردان 300 مەتر قاشىقتىقتا ورنالاسپاسا، ءۇي-جايلاردا قۇلشىلىق بولمەلەرىن (نامازحانا) اشۋعا شەكتەۋ قويىلاتىن، ەندى 300 مەترگە دەيىنگى شەكتەۋ ءدىني ءبىلىم ۇيىمدارىن قوسپاعاندا، تەك بارلىق ءبىلىم مەكەمەلەرىنىڭ اۋماعىنا قاتىستى قولدانىلاتىن بولادى.

سونىمەن بىرگە، قۇلشىلىق ەتۋ بولمەلەرىن اشقان ۋاقىتتا قۇلشىلىق جاساۋ ءۇشىن قاجەتتى جاعدايلاردىڭ قامتاماسىز ەتىلۋى ءۇشىن ءتيىستى تالاپتار ساقتالۋى كەرەك. ءدىني ءىس-شارالاردى وتكىزۋگە ارنالعان ءۇي-جايلاردىڭ جالپى اۋدانى 20 شارشى مەتردەن باستاپ 100 شارشى مەترگە دەيىن بولۋى قاجەت، سونداي-اق، ءۇي-جايلار كۇزەتتى باسقارۋ پۋلتىنا تىكەلەي شىعاتىن بەينەكامەرالارمەن جابدىقتالۋى ءتيىس. بۇدان بولەك، اتالعان ءۇي-جايلار دارەت الۋ ءۇشىن قاجەتتى سانيتارلىق توراپپەن قامتاماسىز ەتىلىپ جانە زاڭناماعا سايكەس سانيتارلىق-ەپيدەميولوگيالىق تالاپتارعا ساي بولۋى كەرەك.    

ال قوعامدىق ورىنداردا قۇلشىلىق بولمەلەرىن اشۋ نەمەسە اشپاۋ شەشىمىن عيمارات يەلەرىنىڭ وزدەرى قابىلدايدى، سونداي-اق، اشۋعا قاجەتتى شىعىنداردى دا ءوز قالتالارىنان وتەيدى.