استانا قالاسىندا ەكسپو-2017 كورمەسىنىڭ مادەني باعدارلاما اياسىندا وسىمەن توعىزىنشى رەت بيبىگۇل تولەگەنوۆانىڭ حالىقارالىق ۆوكاليستەر كونكۋرسى وتپەك. حالىقارالىق ۆوكاليستەر كونكۋرسى جاستارىمىزدىڭ نازارىن كلاسسيكالىق جانە حالىق مۋزىكاسىنا تارتۋدى ماقسات ەتەدى. كونكۋرس دارىندى جاس ورىنداۋشىلاردىڭ بەدەلىن اسقاقتاتىپ، جاستارىمىزدىڭ رۋحاني دامۋىنا سەپتىگىن تيگىزبەك. قازاق مۋزىكاسىنىڭ تاڭداۋلى ۇلگىلەرىن ورىنداۋ مادەنيەتىن قايتا جاڭعىرتىپ، قازاقستان كومپوزيتورلارى شىعارمالارىن دارىپتەۋدە قىزمەت اتقارادى.
ىرىكتەۋ جانە اقتىق كەزەڭ 2017 جىلدىڭ 5 قىركۇيەگىنەن باستاپ، 10 قىركۇيەگىنە دەيىنگى ارالىقتا قازاقستان رەسپۋبليكاسى قارۋلى كۇشتەرىنىڭ ۇلتتىق اسكەري-پاتريوتتىق ورتالىعىندا وتەدى. سالتاناتتى اشىلۋ شاراسى 2017 جىلى 5 قىركۇيەك كۇنى ساعات 18-30-دا استانا قالاسى اكىمدىگىنىڭ مەملەكەتتىك اكادەميالىق فيلارمونياسىنىڭ استانا كونسەرت زالىندا بولادى. كونكۋرستىڭ جابىلۋى جانە جەڭىمپازداردى ماراپاتتاۋ سالتاناتى 2017 جىلدىڭ 10 قىركۇيەگىندە «قازاقستان» وكز ساحناسىندا، ساعات 18-30-دا باستالادى.
قازاقستاننىڭ تۇكپىر-تۇكپىرىنەن، تاياۋ جانە الىس شەت ەلدەردەن وپەرا ونەرىنىڭ حاس تالانتتارى جينالادى. بيبىگۇل تولەگەنوۆانىڭ IX حالىقارالىق ۆوكاليستەر كونكۋرسى استانا تۇرعىندارى مەن قوناقتارى ءۇشىن ەرەكشە كونسەرت ۇيىمداستىرماق. كونكۋرسقا 1985 جىلى 1 قازاننان ەرتە ەمەس جانە 1998 جىلى 1 قازاننان كەش ەمەس تۋىلعان ءانشى قىز-جىگىتتەر قاتىسا الادى. كونكۋرستىق سىناق ىرىكتەۋ جانە اقتىق كەزەڭدەرىنەن تۇرادى. بارلىق تىڭداۋلار كوپشىلىك الدىندا وتكىزىلەدى. ونەر كورسەتۋ ءتارتىبى جەرەبە تاستاۋ ارقىلى انىقتالىپ، كونكۋرس سوڭىنا دەيىن ساقتالادى. اقتىق تۋرعا 12-14 ونەرپاز قاتىستىرىلادى. كونكۋرسقا قاتىسۋشىلاردىڭ ونەرىن بەدەلدى ءارى كاسىبي قازىلار القاسى باعالايدى. كونكۋرستىڭ قازىلار ءتوراعاسى – كسرو حالىق ءارتيسى، سوسياليستىك ەڭبەك ەرى، كسرو جانە قازاقستاننىڭ مەملەكەتتىك سىيلىق لاۋرەاتى، اكادەميك بيبىگۇل تولەگەنوۆا.
قازىلار قۇرامىنا بيبىگۇل تولەگەنوۆانىڭ I-VIII حالىقارالىق ۆوكاليستەر كونكۋرسىنىڭ باس جۇلدە يەگەرلەرى مەن لاۋرەاتتارى كىرەدى:
- تالعات مۇسابايەۆ – قازاقستان رەسپۋبليكاسىنىڭ ەڭبەك سىڭگەن قايراتكەرى ، «استانا وپەرا» وپەرا جانە بالەت تەاترىنىڭ جەتەكشى ءسوليستى، حالىقارالىق كونكۋرستار لاۋرەاتى، قازاقستان رەسپۋبليكاسى، استانا ق.؛
- كاريموۆا الفيا – باشقۇرتستان رەسپۋبليكاسىنىڭ ەڭبەك سىڭگەن ءارتيسى، «استانا وپەرا» وپەرا جانە بالەت تەاترىنىڭ جەتەكشى ءسوليستى، حالىقارالىق كونكۋرستار لاۋرەاتى، قازاقستان رەسپۋبليكاسى، استانا ق.؛
- جەلتۇرعىزوۆ ازامات – قازاقستان رەسپۋبليكاسىنىڭ ەڭبەك سىڭگەن قايراتكەرى، حالىقارالىق كونكۋرستار لاۋرەاتى، استانا قالاسى اكىمىنىڭ مەملەكەتتىك اكادەميالىق فيلارمونياسىنىڭ ءسوليستى، قازاق ءۇوۋ «ۆوكال ونەرى جانە حوردى ديريجيرلىك ەتۋ» كافەدراسىنىڭ پروفەسسورى.
- بايعوجين سۇندەت – قازاقستان رەسپۋبليكاسىنىڭ ەڭبەك سىڭگەن قايراتكەرى، حالىقارالىق كونكۋرستار لاۋرەاتى، «استانا وپەرا» وپەرا جانە بالەت تەاترىنىڭ جەتەكشى ءسوليستى، قازاقستان رەسپۋبليكاسى، استانا ق؛
- راميز ۋسمانوۆ – وزبەكستاننىڭ حالىق ءارتىسى، حالىقارالىق كونكۋرستار لاۋرەاتى، ا.ناۆوي اتىنداعى ءماۇت ءسوليستى، وزبەكستان، تاشكەنت ق.؛
- حامزينا دينا – قازاقستان رەسپۋبليكاسىنىڭ ەڭبەك سىڭگەن قايراتكەرى، حالىقارالىق كونكۋرستار لاۋرەاتى، «استانا وپەرا» وپەرا جانە بالەت تەاترىنىڭ جەتەكشى ءسوليستى، قازاقستان رەسپۋبليكاسى، استانا ق؛
كونكۋرستىڭ جاۋاپتى حاتشىسى: رۋزاۆينا رايسا – رەسەي مادەنيەتىنىڭ ەڭبەك سىڭىرگەن قىزمەتكەرى، رەسەي، ماسكەۋ ق.؛
جاس انشىلەرىنىڭ ونەر كورسەتۋىن حالىقارالىق قازىلار القاسى باعالايدى جانە ءاربىر قاتىسۋشى ونەر كورسەتۋىنىڭ شىعارماشىلىق تالداۋىن، سونداي-اق، كاسىبي مامانداردىڭ ۇسىنىستارىن الادى. كونكۋرستىڭ نەگىزگى ۇيىمداستىرۋشىسى – قازاقستان رەسپۋبليكاسىنىڭ مادەنيەت جانە سپورت مينيسترلىگى، سونداي-اق، «ميراس» مادەنيەتتىڭ قوعامدىق ۇلتتىق قورى» قوعامدىق قورى.
