قازاقستان رەسپۋبليكاسى ۇكىمەتىنىڭ 2017 جىلعى 4 قىركۇيەكتەگى قاۋلىسىمەن «جاستار» عىلىمي-زەرتتەۋ ورتالىعى» جاۋاپكەرشىلىگى شەكتەۋلى سەرىكتەستىگىندەگى مەملەكەتتىك قاتىسۋ ۇلەسىنە يەلىك ەتۋ جانە پايدالانۋ قۇقىقتارى قازاقستان رەسپۋبليكاسى ءدىن ىستەرى جانە ازاماتتىق قوعام مينيسترلىگىنە بەرىلدى دەپ حابارلايدى Qamshy.kz اقپارات اگەنتتىگى.

ايتا كەتەيىك، قازىرگى ۋاقىتقا دەيىن «جاستار» عىلىمي-زەرتتەۋ ورتالىعى ق ر ءبىلىم جانە عىلىم مينيسترلىگىنىڭ قاراماعىندا بولدى.

ورتالىقتىڭ جاستار ساياساتى سالاسىندا ۋاكىلەتتى ورگان بولىپ سانالاتىن ءدىن ىستەرى جانە ازاماتتىق قوعام مينيسترلىگىنىڭ قاراۋىنا ءوتۋى مەملەكەتتىك جاستار ساياساتىن ىسكە اسىرۋ تيىمدىلىگىن، جاستارمەن جۇمىس جاسايتىن مامانداردىڭ قۇزىرەت دەڭگەيىن ارتتىرادى، سونداي-اق جاستار اراسىنداعى تاۋەكەلدى انىقتاۋ جانە الدىن الۋ بويىنشا جەدەل شارالار قابىلداۋعا مۇمكىندىك بەرەدى.

«جاستار» عىلىمي-زەرتتەۋ ورتالىعى 2013 جىلى ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ  جانىندا قۇرىلدى. ورتالىق ەرەكشە مارتەبەگە يە. ونىڭ قىزمەتى «مەملەكەتتىك جاستار ساياساتى تۋرالى» قازاقستان رەسپۋبليكاسىنىڭ زاڭىمەن بەكىتىلگەن. زاڭنىڭ 24-بابىنا سايكەس «جاستار» عىلىمي-زەرتتەۋ ورتالىعى عىلىمي زەرتتەۋلەر جۇرگىزەدى جانە مەملەكەتتىك جاستار ساياساتىن ىسكە اسىرۋدى ادىستەمەلىك قامتاماسىز ەتۋدى جۇزەگە اسىرادى.

ورتالىق جىل سايىن جاستار اراسىندا الەۋمەتتىك زەرتتەۋلەر جۇرگىزەدى، «قازاقستان جاستارى» ۇلتتىق بايانداماسىن، جاستار ساياساتىنىڭ ينستيتۋتتارىنا ارنالعان ادىستەمەلىك قۇرالدار مەن ۇسىنىمداردى ازىرلەيدى. سونداي-اق جۇيەلى تۇردە جاستارمەن جۇمىس جاسايتىن مامانداردىڭ قۇزىرەتىن ارتتىرۋ بويىنشا ءىس-شارالار جيىنىن وتكىزىپ تۇرادى.