ق ر ىشكى ىستەر ءمينيسترى قالمۇحانبەت قاسىموۆ ابۋ-دابي پلازا  جانىندا بولعان وقيعانىڭ قالاي بولعانىن ايتىپ بەردى، دەپ حابارلايدى Qamshy.kz اقپارات اگەنتتىگى Sputnik قازاقستان-عا سىلتەمە جاساپ.

ونىڭ ايتۋىنشا، ءۇندىستاننىڭ ءۇش ازاماتىن ۇرىپ تاستاعاننان كەيىن جۇمىسشىلار كەيىن قايتىپ، كۇزەت بەكەتىنە تاس لاقتىرعان. وقيعا ساعات 19.30-دە باستالادى. تەك ساعات 20.05-تە عانا كۇزەت پوليسياعا حابارلايدى.

"وقيعا ورنىنا جاساقتار كەلەدى. كوپشىلىك ادامنىڭ ءتىل بىلمەۋىنەن ماسەلە تۋىندادى. اعىلشىن ءتىلىن بىلەتىن جەدەل توپ كەلدى. ءبىراق شەتەلدىك جۇمىسشىلار اعىلشىن ءتىلىن بىلمەگەندىكتەن، ءبىز ەلشىلىكتەن كومەك سۇرادىق. ەلشىلىك 25 مينۋتتان كەيىن ءوز وكىلىن جىبەردى، ولارعا قولداۋ ءۇشىن ۇلكەن راحمەت. ءبىرىنشى كونسۋل كەلدى، ولار كومەك كورسەتتى"، — دەدى قاسىموۆ.

پوليسيا ساعات 21.45-تە وقيعا ورنىن تەكسەرۋگە كىرىسەدى.

"بولعانى وسى، ال كەيىنگى بولعان جاعداي، ارينە، قيسىنسىز دۇنيە. دالادا ءۇندىستاننىڭ تاعى ەكى ازاماتىن ۇرىپ تاستايدى. بۇل ساعات 20.10 جانە 20.20-دا بولادى. بۇل ازاماتتاردى تۇرعىن جايدىڭ ىشىنەن تاۋىپ، اۋرۋحاناعا جەتكىزىلدى"، — دەدى مينيستر. 

وسىدان كەيىن شەتەلدىك جۇمىسشىلار تۇراتىن جەردىڭ جانىنا ازاماتتار جينالىپ، دەرەۋ ءمان-جايدى انىقتاۋدى تالاپ ەتكەن. 

وسىعان بايلانىستى ەڭ بەلسەندى 56 ادام پوليسياعا جەتكىزىلىپ، ولارمەن اڭگىمە جۇرگىزىلگەن. بەلسەندى تۇردە ءتارتىپتى بۇزعان ادامدارعا قاتىستى ماتەريالدار سوتقا جونەلتىلدى. سەگىز ادام اكىمشىلىك جاۋاپكەرشىلىككە تارتىلىپ، 15، 10 جانە 5 تاۋلىككە قامالعان. 

"دالادا بولعان جاعداي وسى، ونىڭ جانجالعا قاتىسۋشىلارعا ەش قاتىسى جوق. قازىرگى ۋاقىتتا تەرگەۋ جۇرگىزىپ جاتىرمىز. ايىپتى ادامداردىڭ بارلىعى انىقتالدى، ولار تۇسىنىك بەرىپ جاتىر"، دەپ حابارلادى قاسىموۆ. 

ءۇش قىلمىستىق ءىس قوزعالعان، ءقازىر تەرگەۋ ءجۇرىپ جاتىر. 

"تەرگەۋدى باقىلاۋدا ۇستاپ وتىرمىز. دالادا جانجالعا قاتىسقان ءۇندىستاننىڭ 30-40 ازاماتىن ەلدەن شىعارۋ ماسەلەسىن سوت شەشەدى. كىنالى ادامدار قىلمىستىق جاۋاپكەرشىلىككە تارتىلادى"، — دەدى مينيستر. 

ايتۋىنشا، شەتەلدىكتەر قۇرىلىستا زاڭسىز جۇمىس ىستەدى دەگەنگە قاتىستى دەرەك انىقتالماعان.