6 قازاندا تانىمال رەجيسسەر ەركىن راقىشيەۆتىڭ «كوكجالدار» ءفيلمىنىڭ تۇساۋكەسەرى ءوتتى، دەپ حابارلايدى Qamshy.kz اقپارات اگەنتتىگىنىڭ ءتىلشىسى.
ءفيلمنىڭ تۇساۋكەسەرىنە قوعام قايراتكەرى، پروفەسسور، مەملەكەت باسشىسى نۇرسۇلتان نازاربايەۆتىڭ بيلىك باسىنا قالاي جەتكەندىگى باياندالعان «اقيقات پەن اڭىز» كىتابىنىڭ اۆتورى سەرىكبولسىن ءابدىلدين، اتاقتى عالىم ورازالى سابدەن، سەناريي اۆتورى رامازان قۇرمانبايەۆ جانە قوعام قايراتكەرلەرى مەن ەلىمىزدىڭ بەلدى اكتەرلەرى قاتىستى.
فيلم تۋرالى پىكىر بىلدىرگەن سەرىكبولسىن ءابدىلدين قانمەن بىتكەن جىگەرلى كۇشتى جاستارعا فيلم ارقىلى كورسەتە بىلگەن ەركىن راقىشيەۆتىڭ كومانداسىنا ريزاشىلىعىن ءبىلدىردى. «فيلم باستالعاننان اياقتالعان ۋاقىتىنا دەيىن تولقىپ وتىردىم. سەبەبى، فيلمدەگى كورىنىستەر ادامنىڭ جانىن، جۇرەگىن قوزعاي ءبىلدى. مەنىڭ ءبىر تۇيگەنىم، ءبىز رۋحاني جاڭعىرۋ دەپ ءجۇرمىز، نەگىزىندە، «رۋحتى جوعالتپاۋ كەرەك» دەگەن ۇران بولعانى دۇرىس. ءبىزدىڭ قانىمىز دا، ادەت-عۇرپىمىز دا كەڭ دالامىزعا ساي ءونىپ وسكەن ۇلتپىز. قازاق – دوسىنا ادال، قاسىنا قاتال. سول مىنەز-قۇلىقتى جاڭعىرتۋدىڭ قاجەتى جوق، ونى ساقتاۋىمىز كەرەك، كوبەيتۋىمىز كەرەك، قانمەن بىتكەن جىگەرلى كۇشتى جاستارعا سىيلاۋىمىز كەرەك»، - دەي كەلە ەل ازاماتى رەجيسسەر ەركىن راقىشيەۆتىڭ ءارى قاراي جاستاردى تاربيەلەيتىن تالاي تۋىندىنى دۇنيەگە اكەلەتىنىنە سەنىم ءبىلدىردى.
«كوكجالدار» ءفيلمىنىڭ ماقساتى – قاسقىردىڭ تەكتى مىنەزىن نەگىزگە الا وتىرىپ، ۇلتىمىزدىڭ بويىندا جوعالىپ بارا جاتقان اسىل قاسيەتتەر مەن ادامي قۇندىلىقتاردى ۇرپاقتىڭ ساناسىنا ءسىڭىرىپ، نامىسىن وياتىپ، رۋحىن كوتەرۋ.
وسى ورايدا رەجيسسەر ەركىن راقىشيەۆ بۇگىنگى جاستاردىڭ ۇلتتىق رۋحتى جوعالتىپ العانىن جانە اتالمىش فيلم ارقىلى جوعالتىپ العان رۋحىمىزدى قايتارۋدى ماقسات ەتكەنىن ايتتى. «بۇگىندە حالقىمىز كوك ءبورىنىڭ ۇرپاعى ەكەنىن ۇمىتىپ، قاسقىر مىنەزدىدەن قوي مىنەزدىگە اينالعان زاماندا بىزگە رۋح، نامىس جەتىسپەيدى. سوندىقتان وسىنداي كينولار ارقىلى ۇلتتىق رۋحتى كوتەرۋىمىز قاجەت. ءار جاس كوكىرەگىن كەرىپ «مەن قازاقپىن!» دەپ ايتقا الاتىنداي وزگە ۇلتتاردىڭ قىزعانىشىن تۋدىراتىن جاڭا ۇلت قالىپتاستىرۋىمىز كەرەك. وسىنىڭ ءبارىن «كوكجالدار» فيلمىنەن باستايمىز»، – دەپ قورىتىندىلادى ءسوزىن ەركىن راقىشيەۆ.
ايتا كەتەيىك، فيلم وڭتۇستىك قازاقستان وبلىسى تۇلكىباس اۋدانىندا، «اقسۋ-جاباعالى» قورىعىندا تۇسىرىلگەن. ءوز كەزەگىندە عالىم ورازالى سابدەن تابيعات، جان-جانۋارلار، ادامدار – وسى ءۇش ۇلكەن قۇبىلىستىڭ ۇيلەسىمىن تابا بىلگەن رەجيسسەرگە زور تابىس تىلەپ، «كوكجالدار» ءفيلمىنىڭ بولاشاعىنا سەنىم ءبىلدىردى.
ءفيلمدى جاقىن ارادا ەلىمىزدىڭ كينوتەاترلارىنان تاماشالاي الاسىزدار!
