عابيت مۇسىرەپوۆ «حاس سۇلۋدىڭ كوز جاسىنداي، ءمولدىر ونەرگە» بالاعان تەاتر قاشان دا بولسىن  رۋحاني ازىق جيناپ، تاعىلىمى مول تاريحتان حابار بەرەتىن التىن بەسىك. ۇلتتىڭ ۇلىلىعىن ۇلىقتايتىن، ۇلاعاتتى ۇرپاق تاربيەلەۋگە باستاماشى بولاتىن دا تەاتر. بۇگىندە ەلىمىزدىڭ بارلىق قالاسىندا مادەنيەت وشاقتارى، ياعني  تەاترلار بار. قازاق تەاترىمەن قوسا، وزگە ۇلتتىڭ مادەنيەتىمەن تانىسۋعا دا جاعداي جاسالعان. ەندەشە، سالىستىرىپ كورەلىك. قازاق تەاترىنىڭ كوشىن باستاپ تۇرعان بيىل 92ء-شى ماۋسىمىن اشقان م.و.اۋەزوۆ اتىنداعى قازاق دراما تەاترى مەن 1993 جىلى الماتى قالاسىندا اشىلعان م.يۋ.لەرمونتوۆ اتىنداعى ورىس دراما تەاترىنا كەلۋشىلەردىڭ سانى قانداي؟ ونەرگە دەگەن قىزىعۋشىلىق قانداي دارەجەدە؟

الدىمەن قازاق تەاترىنىڭ  تاريحىنان حابار بەرسەك.  تۇڭعىش رەت 1917 جىلى ويقۇدىق جايلاۋىندا ابايدىڭ اياۋلى جارى ايگەرىمنىڭ سەگىز قانات ۇيىندە مۇحتار اۋەزوۆتىڭ «ەڭلىك-كەبەك» پەساسى قويىلدى. اتالعان پەسا ەلىمىزدە تەاتر وشاقتارىنىڭ كوبەيۋىنە باستاماشى بولدى.

بۇگىندە قالىڭ كورەرمەندى وزىنە ءۇيىرىپ وتىرعان الماتى قالاسىنداعى م.و. اۋەزوۆ اتىنداعى دراما تەاتردىڭ 24ء-شى قازاندا ساحلانايتىن قويىلىمىن كورەلىك.

گوگولدىڭ «ۇيلەنۋ» كومەدياسى العاش رەت 1961 جىلى ن.ءجانتوريننىڭ رەجيسسەرلىگىمەن قالىڭ كورەرمەنگە جول تارتقان. جانرى - كومەديا. 

ال ءدال وسى كۇنى لەرمونتوۆ اتىنداعى ورىس دراما تەاترىندا 2017 جىلى 24ء-شى ماۋسىمدا پرەمەراسى وتكەن «گورە وت ۋما» تراگيكومەدياسى ساحنالانادى.

تەاتر -  قوعامنىڭ ايناسى. اتالعان قويىلىمدار كۇندەلىكتى ومىردە بولىپ جاتقان وزەكتى ماسەلەردى استارلى مىسقىلمەن، قاعىتپا قالجىڭمەن، ادەپتى ازىلمەن جەتكىزەدى.

ەكى قويىلىمنىڭ دا بيلەت قۇنى 500 تەڭگەدەن باستالادى.

ورىس دراما تەاترىنا بارىپ كورۋدى ءجون ساناپ بيلەت ساتىپ الۋعا بولاتىن سايتتى قارادىق. قويىلىمنىڭ ساحنالانۋىنا ءالى 5 كۇن بار، الايدا بىردە – ءبىر بيلەت قالماعان.

ال م.و. اۋەزوۆ اتىنداعى قازاق دراما تەاترىنداعى قويىلىمعا بيلەت بار ما ەكەن؟

ءبىرشاما ورىن بوس تۇر.

"گورە وت ۋما" قويىلىمىنىڭ جاز مەزگىلىندە پرەمەراسى بولعاندىقتان قالىڭ كورەرمەندى وزىنە جيىپ وتىر ما؟ دەگەن ويمەن باسقا دا قويىلىمدارعا نازار اۋداردىق. بۇل جەردە دە ساناۋلى عانا ورىن قالعان.

اۋەزوۆ اتىنداعى قازاق دراما تەاترىندا ءمولدىر ماحابباتتى سۋرەتتەيتىن «قىز جىبەك» قويىلىمىنىڭ پرەمەراسى 2017 جىلى  13-14 ماۋسىمدا ءوتتى. ال 2 كۇننەن سوڭ ساحنادا سومدالاتىن قويىلىم بيلەتتەرىنىڭ ساتىلىمى قانداي ەكەن؟ بۇل جاقتا دا ءبىرشاما ورىن ازىرگە بوس تۇر. 

ەكى تەاترداعى بيلەت ساتىلىمىن ەسكەرە كەلە، ءورىستىلدى كورەرمەننىڭ سانى مۇحتار اۋەزوۆ نەگىزىن قالاعان قازاق دراما تەاترىنا قىزىعۋشىلاردان الدەقايدا كوپ پە دەگەن جاۋاپسىز سۇراققا تاپ بولاسىڭ. ەكىنشى جاعىنان ءقازاقتىلدى كورەرمەن ءبىراز ۋاقىت بۇرىن بيلەت الىپ قامدانبايدى دەگەن ويعا كەلەسىڭ. 

باستىسى، تەاتردىڭ عۇمىرى، ونەردىڭ ءومىرى كورەرمەننىڭ قوشەمەتىمەن ولشەنەتىنى ەسكەرىلىپ، تەاتر ەسىگىن توزدىرۋشىلار قاتارى كوبەيسە، نۇر ۇستىنە نۇر بولادى. 

ايگەرىم تاۋباي