ادامدىق مورالدىك قۇندىلىقتارعا سايكەس تە، جەكە ەتيكاعا سايكەس تە ايەلگە قول كوتەرۋ دۇرىس ەمەس. الايدا، دىنىمىزدە ايەلگە مىناداي جاعدايدا قول كوتەرۋگە بولادى دەلىگەن ەكەن. بۇل تۋرالى ihsan.kz asylsoz.kz-كە سىلتەمە بەرىپ جازىپتى.
دىنىمىزدە ايەل ادامدى رەنجىتۋگە، قورلاۋعا، قول كوتەرۋگە قاتاڭ تىيىم سالىنعان. ايەلدى ۇرۋ – ۇلكەن كۇنا. ونىڭ جاۋابى دا قاتتى بولماق. الايدا قاسيەتتى قۇراننىڭ مىنا اياتى ايەلدى ۇرۋعا بولاتىنىن مەڭزەيدى: «(ايەلدى ناپاقامەن قامتاماسىز ەتۋ، قورعاۋ جانە تاربيەلەۋ ەر ادامنىڭ مىندەتى بولعاندىقتان) ناعىز ەرلەر ايەلدەرگە باسشى ءھام قورعان. مۇنىڭ سەبەبى، اللانىڭ كەي ادامداردى كەيبىرەۋىنەن (باسقارۋ، قورعان بولۋ، قامقورلىق جاساۋ سىندى ماسەلەلەردە) الدەقايدا ارتىق (ءارى قابىلەتتى ەتىپ) جاراتقاندىعى، سونداي-اق ەر ادامداردىڭ (ايەلدەرىنە ءماھىر بەرۋ ءھام وتباسىنىڭ ءناپاقاسىن تابۋ سىندى) ماڭىزدى جاۋاپكەرشىلىك ارقالاعاندىعى. ال، ىزگى ايەلدەر اللاعا تولىق باعىناتىن جانە ەرلەرىنىڭ الدىنداعى مىندەتتەرىن قالتقىسىز ورىندايتىن، سونداي-اق اللا ولاردىڭ قۇقىعىن قالاي قورعاعان بولسا، ولار دا ءدال سولاي ەرلەرى قاستارىندا بولماعان كەزدە دە ەرلەرىنىڭ حاقىسىن اياقاستى ەتپەي (ارىن، وتباسىلىق سىرلاردى، وتباسىنا ءتان ابىروي مەن مال-دۇنيەنى) لايىقتى تۇردە ساقتاي بىلەتىن جاندار. ايەلدەرىڭنىڭ قىڭىرلىققا باسىپ، باعىنباي كەتۋىنەن قورىقساڭدار، ولارعا الدىمەن ناسيحات ايتىڭدار. كەيىن (ايتىلعان ناسيحاتتان ناتيجە شىقپاسا)، ولاردان بولەك جاتىڭدار. سودان كەيىن دە (قىڭىرلىعىن قويماسا، اقىرىنداپ) ۇرىڭدار. ەگەر تۇزەلىپ، مويىنسۇنسا، ولارعا جاماندىق جاساۋدىڭ جولىن ىزدەمەڭدەر، (نە بولسا سونى جەلەۋ ەتىپ ولاردى رەنجىتپەڭدەر). ءبىلىپ قويىڭدار، اللا بارىنەن بيىك، اسقاق ءھام ۇلى» («ءنيسا» سۇرەسى، 34-ايات).
مىنە، كوردىڭىز بە، قيسىق-قىڭىر، كۇيەۋىنە باعىنبايتىن، قىرسىق، ايتقانعا كونبەيتىن ايەلدەردى ۇرۋعا رۇقسات. ال ونداي ايەلدەر، وكىنىشكە وراي، جوق ەمەس. ءبىراق، نازار اۋداراتىن ەڭ باستى نارسە – «اقىرىنداپ ۇرىڭدار». ول نە دەگەن ءسوز؟ ۇرعاندا دا باس سالىپ، كوزىن كوگەرتىپ، قولىن سىندىرىپ، مايىپ قىلۋ ەمەس، كەرىسىنشە، ايەلگە ەشبىر زيانى تيمەۋى كەرەك. ايەلدىڭ ەشبىر جەرى كوگەرمەۋى كەرەك، زاقىمدانباۋى كەرەك، ەش جەرى اۋىرماۋى كەرەك، سىنباۋى كەرەك، ەشقانداي زيان كەلمەۋى كەرەك. بۇل، ارينە، ۇرماعانمەن تەڭ.
الدىمەن ايەلگە جاي سوزبەن ءتۇسىندىرىپ ايتۋ كەرەك. ەگەر ايتقاندى ىستەمەي، ول جاعداي ءۇشىنشى رەت قايتالانعان بولسا، وندا «ۇرۋعا» – رۇقسات. «ۇرعاندا» دا الگى تالاپتار ساقتالۋى ءتيىس.
قاسيەتتى قۇراننىڭ بۇل اياتىن دۇرىس تۇسىنبەي «ۇرۋعا بولادى ەكەن» دەپ سەبەپسىزدەن-سەبەپسىز ايەلىنە قول كوتەرەتىن ەر-ازاماتتارىمىز ايتىلعانداردى ەسكەرسە ەكەن دەيمىز.
