جۋىردا باتىس قازاقستان وبلىسى ورتالىعى ورال قالاسىندا جوعارعى مەديسينالىق كوللەدج نەگىزىندە وقىتۋ-كلينيكالىق ورتالىعى اشىلدى.
بقو دەنساۋلىق ساقتاۋ باسقارما باسشىسىنىڭ دامۋ جانە ۇيىمداستىرۋ جونىندەگى ورىنباسارى نۇردانات بەركىنعاليدىڭ ايتۋىنشا، بۇل ورتالىق سيمۋلياسيالىق ترەناجەرلەر مەن روبوت-مۋلياجدار ارقىلى كاسىبي بىلىكتىلىگىن ارتتىرامىن دەگەن دارىگەرگە ۇلكەن مۇمكىنشىلىكتەر بەرمەك. جاس دارىگەرلەر ەمدەۋ شارالارىن مۋلياجدارعا قولدانىپ، تاجىريبەدەن وتكىزۋدە. وسى ورايدا ايتا كەتسەك، 2016-2019 جىلدارعا ارنالعان «دەنساۋلىق» مەملەكەتتىك باعدارلاماسىندا دەنساۋلىق ساقتاۋ جۇيەسىن دامىتۋ ءۇشىن حالىقتىڭ قولجەتىمدى، تولىققاندى، ساپالى مەديسينالىق قىزمەتتەرگە مۇقتاجدىعىنا يكەمدى جاۋاپ بەرەتىن ينفراقۇرىلىمدى قالىپتاستىرۋ قاجەتتىگى ايتىلعان ەدى. دەنساۋلىق ساقتاۋ ۇيىمدارى ءۇشىن اۋرۋحانالارداعى مەديسينالىق قۇرال-جابدىقتاردىڭ الار ورنى ەرەكشە. جاڭادان اشىلعان ورتالىقتاعى كۋرسانتتار زاماناۋي ءدارىسحانالاردان تەوريالىق ءبىلىم السا، وبلىستىڭ تۇكپىر-تۇكپىرىنەن كەلگەن دارىگەرلەر مەن مەيىربيكەلەر اكۋشەرلىك جانە گينەكولوگيالىق جاردەم كورسەتۋ، جۇرەكتىڭ توقتاۋ ءقاۋپىن الدىن الۋ، تەراپيا مەن پەدياتريادا جانە حيرۋرگيادا ساپالى كومەك كورسەتۋ بولمەلەرىندە پراكتيكالىق بىلىمدەرىن شىڭدايدى. سونداي-اق Iت-تەحنولوگيالاردىڭ كومەگىمەن دەبريفينگتىك زالدا كەرى بايلانىس ارقىلى ەم-شارا بارىسىندا جىبەرگەن قاتەلىكتەرىن بەينەمونيتوردا ايقىن كورە الادى. وقىتۋ-كلينيكالىق ورتالىقتا ءبىلىمىن جەتىلدىرگەن 51 جوعارى جانە ورتا ءبىلىمدى ماماندار وتاندىق جانە شەتەلدىك دارىگەرلەردەن ساباق الىپ، سەرتيفيكاتقا يە بولدى.
سونداي-اق مەديسينالىق ءبىلىم بەرۋ باعدارلامالارىن جەتىلدىرۋ شەڭبەرىندە ارناۋلى مەديسينالىق وقۋ ورىندارىندا وقيتىن وڭىردەگى ستۋدەنتتەر زاماناۋي ەتيكالىق ستاندارتتاردى، كوممۋنيكاسيالىق داعدىلاردى، ءبىلىم الۋ جانە ونى ۇستاپ تۇرۋ ءۇشىن جەتكىلىكتى دەڭگەيدە اعىلشىن ءتىلىن مەڭگەرۋدى كەزەڭ-كەزەڭىمەن وقۋدا.
