23 قازان كۇنى الماتى قالاسىندا اقىن تالاپبەك تىنىسبەك ۇلىنىڭ  «ارعى جاعى ەرتىستىڭ بەرگى جاعى» اتتى شىعارماشىلىق كەشى ءوتتى، دەپ Qamshy.kz اقپارات اگەنتتىگى حابارلايدى.

حالىق ءبيى «قارا جورعانىڭ»  اتاجۇرتقا قايتا ورالۋى جايلى اڭگىمە بولسا-اق،  كوزىقاراقتى زيالىلار مەن وقىرماندار وسى تالاپبەك تىنىسبەكۇلىن اۋىزعا الادى. ولاي بولاتىنى،  ءوزى قۇرعان  «جەزبۇيدا»  جاستار قوعامدىق بىرلەستىگى ارقىلى ارعى-بەرگى بەتتەگى اعايىننىڭ رۋحاني جالعاستىعىنا ۇلكەن دانەكەر بولىپ،  ەل مەن جۇرتتىڭ ەتەنە قابىسۋى جولىندا جاس باسىمەن از بولماعان يگى شارالاردى ۇيىستىرىپ كەلە جاتقان اقىن تالاپبەك ونداعان جىلداردىڭ الدىندا  «قارا جورعا»  ونەر ۇجىمىن قۇرىپ،  قىتايداعى ونەرپازداردى العاش رەت الماتىعا شاقىرىپ، «قارا جورعا» ءبيىن بيلەتكەن ەدى. مىنە، وسىلايشا ەلىمىزدىڭ ۇلانعايىر دالاسىنا وسى ءبىر ءداستۇرلى ءبيىمىز كەڭ تارالعان.

كەش بارىسىندا بۇگىنگى تاڭدا جاس پاتريوتتارعا ۇلگى بولىپ ۇلگەرگەن ارداقتى ازامات رۋحتى،  ءورشىل جىرلارىن جاتقا وقىدى. سونداي-اق ول ءسوزىن جازعان، بىرنەشە رەتكى رەسپۋبليكالىق پاتريوتتىق اندەر بايگەسىنىڭ باس جۇلدەسىن ەنشىلەگەن اندەر كەرىمسال كەشتىڭ كورىگىن قىزدىردى. كەش تىزگىنىن بەلگىلى اقىن، جازۋشى بەيبىت سارىباي جۇرگىزدى.

كەشتە اقىننىڭ  «ارعى جاعى، ەرتىستىڭ بەرگى جاعى» اتتى تۇڭعىش جيناعىنىڭ تۇساۋى كەسىلدى. الماس احمەتبەك ۇلى،  داۋلەتبەك بايتۇرسىن ۇلى،  مۇرات شايماران ۇلى،  قايرات قۇلمۇحاممەت قاتارلى تانىمال اقىندار جيناقتىڭ تۇساۋىن كەستى. ارشىن كاسىمباي ۇلى،  بيبيگۇل قيلىمقان قىزى،  نۇرلان مەن ءشابا،  ساۋلەجان تاعزيا ۇلى قاتارلى ونەرپازدار تالاپبەكتىڭ سوزىنە جازىلعان جاڭا اندەردى تىڭدارماندارعا سىيلادى. جاناربەك ءاشىمجان،  باقىت بادەلحان،  داۋلەتكەرەي كاپ ۇلى،  ادىلەت احمەت ۇلى قاتارلى اقىندار جىردان شاشۋ شاشتى. اقىننىڭ دوستارى مەن ءىزىن باسىپ كەلە جاتقان ءىنى- قارىنداستارى ات مىنگىزىپ،  شاپان سىيلادى. وقۋشىلار مەن ورەندەر وتتى ولەڭدەرىن جاتقا وقىدى.  

اقىننىڭ ولەڭدەر جيناعى مەن جارىق كورۋ الدىندا تۇرعان پروزالىق شىعارمالار جيناعى  «ماقسات مەد»  مەديسينالىق ورتالىعىنىڭ ديرەكتورى ماقسات ءابدىقادىر ۇلى مەن جەكە كاسىپكەر ايسا ورازقان ۇلىنىڭ دەمەۋشىلىگىمەن «ءۇش قيان»  باسپاسىنان شىقتى. 

التايدا تۋىپ،  الاتاۋدا قاناتىن قاتايتىپ،  ەندى ارقا تورىندەگى استاناعا قونىس اۋدارعالى جۇرگەن تالاپبەك تىنىسبەك ۇلى الىس-جۋىقتاعى اعايىنعا اق داستارقان جايىپ،  العىسىن ايتىپ،  باتاسىن الدى.