الماتى قالاسىندا ومىربەك جولداسبەكوۆ اتىنداعى ستۋدەنتتەر سارايىندا الماتى قالاسى ءدىن ىستەرى جونىندەگى باسقارماسىنىڭ قولداۋىمەن «ونەر قىراندارى» تەاترىنىڭ تۇرعىندار جانە جاستار اراسىندا ءدىني تەرىس اعىمدار يدەيالارىنىڭ تارالۋىن بولدىرماۋعا باعىتتالعان «زامان-اي 2» قويىلىمى وتكەن بولاتىن. وسى قويىلىمنان كەيىن Qamshy.kz اقپارات اگەنتتىگىنىڭ ءتىلشىسى «ونەر قىراندارى» تەاترىنىڭ جەتەكشىسى ماديار سەرىكبايەۆپەن سۇحباتتاستى. 

– ونەر قىراندارى تەاترىنىڭ «تور» اتتى قويىلىمىنىڭ يدەياسى قالاي پايدا بولدى؟ قويىلىمنىڭ نەگىزگى ماقساتى قانداي؟

– «تور» دەگەن كونسەرت بەرەمىز دەپ جۇرگەنىمىزگە كوپ ۋاقىت بولمادى. بۇگىن ويعا العان كونسەرتتى وتكىزدىك. ءدىن ماسەلەسى – تەك ءبىزدىڭ ەلىمىزدە عانا بۇكىل الەمدە تالقىلانىپ، وزەكتى بولىپ تۇرعان ماسەلە. بۇل كونسەرت الەۋمەتتىك جەلى، ءوز-وزىن ءجىپسىز بايلاپ العاندار، بەلگىسىز جانە تانىمايتىن ادامدارعا ۇنەمى ەسەپ بەرەتىندەر تۋرالى بولدى. قازىرگى قوعامدا ءوز قولىن ءوزى بايلاپ، ءوز-وزىن شەكتەپ جۇرگەندەر قانشاما. كەيدە ادامدارعا قاراپ تاڭعالاسىن: ۇيدەن شىعا سالىپ، كۇيەۋى نەمەسە اتا-اناسىنا ەمەس، الەۋمەتتىك جەلىدەگى تانىمايتىن ادامدارعا ەسەپ بەرىپ، قايدا بارىپ، نە ىستەپ، نە جەگەنىنە دەيىن  ايتىپ وتىرادى.  الەۋمەتتىك جەلىنىڭ پايداسى جوق ەمەس، الايدا پايداسىنان زيانى كوبىرەك. وسى تاقىرىپتىڭ اياسىندا كونسەرتتى «تور» دەپ اتادىق.  تاقىرىپ قويعاننان كەيىن دايىندىقتى باستادىق. كونسەرت، وزدەرىڭىز كورگەندەي، 3 بولىمنەن تۇرادى. قويىلىم جاس جىگىتتىڭ باسىنان وتكەن وقيعا رەتىندە ءوربىپ وتىرادى، سول ءبىر جىگىتتىڭ ومىردە كورگەنى كەزەڭ-كەزەڭىمەن كورسەتىلەدى. ءبىرىنشى ءبولىم «عالامتوردىڭ زاردابى»، ەكىنشى ءبولىم «ەل بولامىن دەسەڭ ەكرانىڭدى تۇزە»، ال ءۇشىنشىسى «جات اعىم نەمەسە قول جەتىمدى ۇستازدار» دەپ اتالادى.

قازىرگى قوعامدا كوپ جاستار ءدىني ءبىلىمدى ساۋاتتى يمامدار مەن ۇستازداردان ەمەس، «google شەيحتاردان»، قول جەتىمدى ۇستازداردان الادى. ءۇشىنشى قويىلىمعا توقتالاتىن بولساق، ءبىز اتالعان قويىلىمدا جات اعىمعا قاتتى بەرىلىپ كەتكەن جىگىتتى ەمەس، جات اعىمنىڭ قاعيدالارىن ەندى ۇيرەنىپ، ءبىلىپ جۇرگەن جىگىتتى قالاي تۋرا جولعا تۇسىرۋگە بولادى دەگەن ماسەلەنى كورسەتكىمىز كەلدى. كورگەنىمىزدى، ەستىگەنىمىزدى جيناستىرىپ وسىنداي قويىلىم قويدىق. قازىرگى جاستاردىڭ كوبىسى قينالعان كەزدە جات اعىمعا كىرىپ كەتىپ، اداسىپ جاتادى. تەرىس جولعا ءتۇسىپ ساناسى ۋلانعاندار ىشتەي تۋرا جولعا تۇسكىسى كەلەدى، الايدا ولاردى ءبىلىم بەرگەن ۇستازدارى ءۇش قاعيدامەن شەكتەپ تاستايدى. ءبىرىنشىسى – ناماز وقىماعانداردى كاپىر دەپ ولارمەن ارالاستىرمايدى، ەكىنشىسى – سەنىمدەرى دۇرىس ەمەس دەپ يمامداردان شەكتەيدى، ءۇشىنشى – مەملەكەتتەن، مەملەكەتتەن بولەك اتا-انادان،  مەملەكەتتىڭ زاڭىن ادامداردىڭ زاڭى، سول سەبەپتى ولارعا باعىنباۋ كەرەك دەپ شەكتەۋ قويىپ تاستايدى. وسىنداي شەكتەۋلەردەن كەيىن ادامنىڭ ساناسى ۋلانىپ، ويىندا تەك قانا «قايتسەم دە ءجانناتقا كىرەمىن»، — دەگەن وي تۇرادى. سوندىقتان ولار باسقا ەلگە بارىپ، تەرروريست اتانادى. سەبەبى ولاردىڭ ساناسىنا تەك وسى جولعا ءتۇسىپ قانا ءجانناتقا بارا الاسىڭدار دەپ ءسىڭىرىپ تاستايدى. بۇل جولدان قايتۋعا بولادى، ءبىز جاستارعا وسىنى ءتۇسىندىرۋىمىز كەرەك. سەبەبى جات اعىمعا تۇسكەن جاستار قايتار جول جوق دەپ ويلايدى. ءبىزدىڭ نەگىزگى ماقساتىمىز دا وسى بولاتىن. بۇل كونسەرتپەن جات اعىمنان تۋرا جولعا تۇسۋگە مۇمكىندىك بار دەگەندى ايتقىمىز كەلگەن.

ەكىنشى قويىلىمنىڭ اتى ايتىپ تۇر «ەل بولام دەسەڭ، ەكرانىڭدى تۇزە».  بىزگە ەشقانداي زيانى تيمەيدى دەگەن شەتەل سەريالدارىنىڭ ءوزى قانشاما وتباسىنىڭ ىدىراۋىنا سەبەپ بولىپ وتىر. ادامنىڭ قيالىمەن جازىلعان سەنارييگە قىزىعىپ، ايەلدەر سەريالداعىداي بيزنەس باسقارعىسى كەلەتىنى، بۇل ومىردە تۇك كورمەي جۇرگەن سەكىلدى سەزىنۋىنىڭ ءوزى وتباسىعا كەرى اسەرىن تيگىزەدى. ۇنەمى سەريال قاراپ وتىرعان اتا-انانىڭ بالا تاربيەسىنە كوڭىل بولمەۋى، قازىرگى ۇرپاقتى ەكران تاربيەلەپ جاتقاندىعى قوعامنىڭ ۇلكەن ءبىر دەرتى، اۋرۋى بولىپ سانالادى. وسىنداي ماسەلەلەردى كورسەتۋ ارقىلى كورەرمەندەرگە وي سالعىمىز كەلدى. قوعامداعى بار ماسەلەنى ءازىل-قالجىڭعا اينالدىرىپ، سول ارقىلى كورەرمەنگە جاقسى ءبىر وي سالۋ ارقىلى قازىرگى تاڭدا ءورشىپ تۇرعان ماسەلەلەردىڭ شەشىمىن تابۋعا تيتتەي دە بولسىن ءبىر سەپتىگىمىز تيەر دەپ ويلايمىز.

– قويىلىمنىڭ العاشقى ءبولىمى عالامتور، الەۋمەتتىك جەلى تۋرالى بولدى. ال سىزدەر الەۋمەتتىك جەلىلەردى ءجيى پايدالاناسىزدار ما؟ ونەر قىراندارى تەاترىنىڭ جەتەكشىسى الەۋمەتتىك جەلىگە قانشا ۋاقىتىن جۇمسايدى؟ 

– مەن ءوز باسىم الەۋمەتتىك جەلىدە جوقپىن. مەن ءقازىر قاراپايىم SMS نەمەسە Whatsapp الەۋمەتتىك جەلىسىن قولدانامىن. سونىڭ ءوزىن كەيدە يگەرە الماي جاتامىن. ول مەنىڭ بىلىمسىزدىگىمنەن نەمەسە الەۋمەتتىك جەلىنى جەك كورگەندىگىمنەن ەمەس، تەك قاجەتتىلىك بولعان كەزدە الەۋمەتتىك جەلىنى  قولدانعىم كەلەدى. جاقسى حابار بولسا سونى جارنامالاي سالامىز، بىرەۋگە كومەك كەرەك بولعان كەزدە كومەكتەسۋ ءۇشىن قولدانۋعا تىرىسامىن. الايدا الەۋمەتتىك جەلىگە قاتتى مۇقتاج ەمەسپىن.

– بۇل جات اعىم تۋرالى العاشقى قويىلىمدارىڭىز ەمەس. بۇعان دەيىن دە زامان-اي اتتى قويىلىمدارىڭىز بولدى. سول قويىلىمدا دا جات اعىمعا قارسى ناسيحات جۇمىستارىن جۇرگىزدىڭىزدەر. سىزدەردىڭ قويىلىمدارىڭىز ارقىلى تۋرا جولعا ءتۇسىپ، العىس بىلدىرگەندەر نەمەسە قانداي دا ءبىر نارازىلىق تانىتقاندار بولدى ما؟ 

– ءيا، جاقسى دۇنيە ەكەن، جاقسى يدەيا ەكەن دەپ جوعارى باعا بەرگەندەر دە بولدى. بىرەۋلەر «ۇيگە بارسام اتا-انام ماعان  وسى كونسەرتتى كور دەپ ايتتى. ءوزىم تەلەديدار كورمەيتىن ەدىم، اتا-انام «قارا سەنى كورسەتىپ جاتىر» دەپ ايتقان بولاتىن. مەن كورمەدىم، ءبىراق عالامتوردان قىزىعىپ قاراسام، بىزدەر تۋرالى كونسەرت قويىپسىڭدار. ءبىز ونداي ەمەسپىز»، —  دەپ ايتىپ جاتىر. ءبىز «زامان-اي» كونسەرتى ارقىلى بىرەۋدى كەمسىتىپ، تومەندەتىپ جاتقانىمىز جوق. تەك جاستارعا تۋرا جولدى ناسيحاتتاعىمىز كەلەدى. كەيبىرەۋلەر دۇرىس تۇسىنبەۋى مۇمكىن. «ءدىن تاقىرىبىن الىپ كونسەرت قوياتىنداي كىمسىڭدەر، ءدىني بىلىمدەرىڭ قانداي»، — دەپ تە ايتۋى مۇمكىن. الايدا ءبىز تەك قانا ءدىن توڭىرەگىندە عانا ايتىپ، تەك ءدىن سالاسىندا وي قوزعاپ وتىرعانىمىز جوق، ءبىز ومىردە بولىپ جاتقان اقيقاتتى، قوعامدا بۇگىنگى تاڭدا اشىقتان اشىق تارالىپ جاتقان وزەكتى ماسەلەلەرگە قاتىستى قويىلىم قويىپ جاتىرمىز. بۇل – الەمدىك ماسەلە. مۇنداي ماسەلەدەن ات تونىمىزدى الا قاشىپ، قازىردەن ارالاسپايتىن بولساق، مۇنىڭ وڭ شەشىم تابۋى كۇماندى بولادى. بۇل ماسەلە بۇگىن مەنىڭ باسىمدا بولماسا، كەلەشەكتە مەنىڭ ۇرپاعىما كەرى اسەرىن تيگىزۋى ابدەن مۇمكىن.  جات اعىمدى حالىق اراسىندا ناسيحاتتاپ، سوعان جاستاردى تارتىپ جۇرگەن ادامدار بولاشاق شاكىرتتەرىن «سەن وسى سەنىمىڭە بەكەم بول»، — دەپ تاربيەلەپ جاتقاندىعى ءسوزسىز. ەرتەڭ سول شاكىرتتەرى ەر جەتكەن كەزدە، سوندا ۇلكەن پروبلەما بولادى. سوندىقتان ءبىز ءدىني ءبىلىمدى بولۋىمىز كەرەك. بولاشاق ۇرپاقتى دا دۇرىس تاربيەلەۋىمىز كەرەك. ءبىزدىڭ «زامان اي 2» دەگەن باعدارلامامىزدا تەك جات اعىم تۋرالى عانا ەمەس، جالپى قازىرگى قوعامدىق ماسەلە تۋرالى قويىلىم قويامىز.

– سۇحباتتاسقانىڭىزعا كوپ راحمەت!