بەتاشاردىڭ باستى ماقساتى مەن قىزىعى نەدە؟
بىرىنشىدەن، جاس كەلىنگە تالىم-تاربيە بەرۋ، ولەڭمەن ونەگە دارىتىپ، عيبرات بەرۋ؛ ەكىنشىدەن، قادام باسقان قايىن جۇرتتىڭ جاقىن-جاناشىر، تۋعان-تۋىستارىن تانىستىرۋ، ات تەرگەۋگە دايىندىق؛ ۇشىنشىدەن، كەلىن العان اۋىلدىڭ جاقسىلىعىن اسىرىپ، مارتەبەسىن كوتەرىپ، تۇلعالارىن تۇگەندەپ، تەكتىلىك قاسيەتىن دارىپتەۋ. جەكەلەگەن جەزدە، جيەندەرگە ەرەكشە ءازىل ارناۋ ارقىلى كەلىننىڭ ەسىندە ۇمتىلماستاي قالۋعا جول اشۋ. تاعىسىن تاعى...
بالا كەزىمنەن بەتاشاردان وسى ەرەكشەلىكتەردى كورىپ، ءداستۇردىڭ قاسيەتىن سەزىنىپ، ءارقاشان بەتاشارعا بارۋعا اسىق بولىپ ءوستىم. ءوزىم دە دەنى ازىلدەن تۇراتىن بەتاشار جازىپ، بەت اشتىم. ءالى كۇنگە كەيبىر ءازىل ولەڭدەردى كەزىككەندە كەلىندەر مەن كورىپ ەستىگەندەر قىزىق ەتىپ ايتىپ ءجۇرۋشى ەدى.
ال ءقازىر قالاي؟ اۋەلى توي يەسى (اپامشا ايتسام، التىن باستى ادام الاتىن جاق) جانە اسابا اراسىندا بەتاشارعا بايلانىستى ساۋدالاسۋ باستالادى. ونى ۇيات ساناۋدان قالعالى قاشان؟ سوسىن كەيبىر وتباسىلار قازاقتا جوق سالتپەن ەكى رەت بەت اشتىرادى (ءبىرىن ۇيدە، ءبىرىن مەيرامحانادا). ونىسىن جوق سىلتاۋمەن تۇسىندىرگىسى كەلەدى. ءبىز وسكەن اۋىلدا ەكى رەت بەت اشپاق تۇگىلى ەكى باس كيىمدى ءبىرىنىڭ ۇستىنە ءبىرىن كيگىزبەيتىن جامان ىرىمعا بالاپ. «ءبىر تويدا ەكى جار جوق» دەپ تيادى. ال كوپتەگەن قانداستارىمىز تەك مەيرامحانادا اشادى. ونىڭ اتى – كوپشىلىككە قىزىق سىيلاۋ بولعانىمەن، ارعى جاعى، اساباعا بەرەر اقشانى ۇنەمدەۋگە باعىتتالعان باقاي قۋلىق، دۇنيە قوڭىزدىق. ويلاڭىزىشى، ءسىزدىڭ كەلىن الدەبىرەۋدىڭ تويحانا، كافە، مەيرامحاناسىنا كەلىن بوپ تۇسە مە؟ الدە ءسىزدىڭ شاڭىراققا ما؟
بەتاشاردى كىم جانە قالاي جاسايدى؟ جاتتاندى ولەڭمەن بولسا دا، بەت اشتىرىپ قۇتىلساڭىز بولدى دەپ سانايسىز با؟
اسىرەسە بىرنەشە ءجۇز ادامنىڭ اتىن جازىپ، ءبىرىن قالدىرماي اتاۋعا ماجبۇرلەيتىن توي يەلەرىنىڭ كوكەيىن تەسكەن اقشا ەمەي نەمەنە؟ ايتپەسە، قازاقى سالتتا كەلىن تەك وزىنەن ۇلكەن جانە كۇيەۋىنە ەڭ جاقىن تۋىستارعا عانا سالەم سالعان. ال بەتاشاردا كۇيەۋىنىڭ دوستارى، ءىنى-قارىنداستارى، ۇجىمى، ءتىپتى بەسىكتەن بەلى شىقپاعان سابيگە دە ەڭكەيتەدى. سالەم سالدىرۋدىڭ قۇنىن وسىلاي تومەندەتكەندىكتەن كەلىندەرىمىزدىڭ داستۇردەن جەرۋى پايدا بولعان جوق پا؟
دۇرىسى – جاقىن جاماعايىنعا، ەڭ سىيلى ۇلكەندەرگە سالەم سالدىرۋ. قاپتاعان قالىڭ ءنوپىردىڭ اتىن اتاپ كوپىرگەنشە، اۋلەتتەگىلەردىڭ جاقسى قاسيەتىن جىرلاپ، شىنايى ازىلگە كوبىرەك كوڭىل بولىنسە، ءتول ونەردىڭ ومىرشەڭدىگى ارتىپ، نەگىزگى ماقساتى ورىندالار ەدى. جۇزدەگەن ادامدى اتاپ، ودان تۇسكەن اقشاعا قۇنىعۋ – تاماق قۇرعاتىپ، قارىن اشىرىپ قانا قويماي ءقادىردى قاشىرىپ، قاسيەتتى ءداستۇردىڭ ءمان-ماڭىزىن جويادى.
ءوز باسىم، جوعارداعىداي بەتاشارعا تاپ بولسام، تۇرا قاشقىم كەلەدى. سويتەم دە، اۋىلدا، قاسيەتتى قارا شاڭىراقتا، اق بوساعادا اڭقىلداعان اعايىننىڭ اراسىندا وتەتىن شىنايى بەتاشاردى ءجيى ساعىنام...
جارقىن سالەن ۇلى، فەيسبۋك پاراقشاسىنان الىندى
