بۇگىن Facebook الەۋمەتتىك جەلىسىندە قاراعاندى وبلىسى جەزقازعان قالاسى سارىسۋ وزەنىندە بالىقتاردىڭ قىرىلىپ قالعاندىعى تۋرالى اقپارات تارادى. بۇعان سەبەپ جەزقازعان قالاسىنداعى «جالتىربۇلاق» كەن ورىنى التىن شىعارىپ، قالعان قالدىقتارىن جەزقازعان قالاسىنىڭ بويىنداعى سارىسۋ وزەنىنە اعىزىپ جىبەرەدى ەكەن. وسى جايلى ناقتى اقپارات الۋ ءۇشىن Qamshy.kz اقپارات اگەنتتىگىنىڭ ءتىلشىسى قاراعاندى وبلىسى اكىمدىگىنە حابارلاسىپ بىلگەن ەدى.

قاراعاندى وبلىسى بويىنشا ەكولوگيا دەپارتامەنتىنىڭ باسشىسىنىڭ مىندەتىن اتقارۋشى بەكمۇحانبەتوۆ الىبەك مۇرات ۇلى وسى سۇراققا جاۋاپ بەردى.

«بۇگىن وسى اقپارات بىزگە كەلگەن بولاتىن. بۇعان ناقتى جالتىربۇلاق كەن ورىنىن كىنالاۋعا نەگىز جوق. قاراعاندى وبلىسى اكىمدىگىنىڭ ينسپەكتورى مەن ورمان جانە جانۋارلار ينسپەكتورى وسى ماسەلەنى شەشىپ جاتىر. قىرىلىپ قالعان بالىقتار مەن سارىسۋ وزەنىنىڭ سۋىنان تالداما الىنىپ، زەرتتەۋ جاسالىنادى. بۇل اقپارات راس بولسا ءبىز بۇقارالىق اقپارات قۇرالدارىنا حابارلايمىز»،-دەدى الىبەك مۇرات ۇلى.

ەسكە سالا كەتەيىك، 2016 جىلى سارىكەڭگىر اۋىلدىق وكرۋگىندە التىن وندىرەتىن كاسىپورىن اشىلعان بولاتىن. 2010 جىلى جۇرگىزىلگەن گەولوگيالىق بارلاۋ جۇمىستارى ناتيجەلى بولىپ، قۇرامىندا التىن بار كەن تابىلعان. كاسىپورىن سول باعالى مەتالدى اشىق ادىسپەن ءوندىرۋدى قولعا الدى. قاراعاندى وبلىسىنىڭ كاسىپكەرلىكتى قولداۋ كارتاسىنا ەنگىزىلگەن جوبانىڭ جالپى قۇنى – 3،4 ملرد تەڭگەنى قۇراعان.