الماتى قالاسىنداعى ۇلتتىق كىتاپحانانىڭ اكت زالىندا «حالىق مۇراسى» اتتى ءان، كۇي، جىر كەشى ءوتتى. وعان رامازان ستامعازييەۆ، رىمكەش ءجۇمادىلوۆا، ەركىن شۇكىمانوۆ، ۇلجان بايبوسىنوۆا، ارداق يساتايەۆا، مۇرات ابۋعازى، امانكەلدى كۇزەۋباي، وركەن دۇيسەن، شولپان دارجانوۆا، ايگەرىم قارامەنوۆا جانە تاعى باسقا ونەر قايراتكەرلەرى، قۇرمانعازى اتىنداعى قازاق ۇلتتىق كونسەرۆاتورياسى حالىق مۋزىكاسى فاكۋلتەتىنىڭ ستۋدەنتتەرى قاتىسىپ، قازاقتىڭ ءداستۇرلى اندەرىن ۇلتتىق مۋزىكالىق اسپاپتارمەن – دومبىرامەن، قوبىزبەن، سىبىزعىمەن، شەرتەرمەن ورىندادى.
ءىس-شارانىڭ ماقساتى – قالاداعى ءارتۇرلى جاماعات وكىلدەرىنە، يسلام دىنىنە بەت بۇرىپ جاتقان جاستارعا، شاھار تۇرعىندارىنا اتا-بابالارىمىزدان قالعان رۋحاني مۇرانى ءداستۇرلى اندەر ارقىلى ناسيحاتتاۋ بولاتىن.
كونسەرتتى «ءال-مادينا» مەشىتىنىڭ باس يمامى باقىتجان قاجى جاڭبىرباي ۇلى اشتى. «ءبىزدىڭ اتا-بابالارىمىز ءدىندى عاسىرلار بويى جىرعا قوسىپ ناسيحاتتادى. اقىندارىمىز، جىراۋلارىمىز وزدەرىنىڭ وسيەت سوزدەرىن بۇگىنگى كۇنگە ۇلتتىق اسپاپتارمەن جەتكىزدى. بۇل دەگەنىمىز قازاقتىڭ ءداستۇرىنىڭ ىشىندە ءدىن جاتقانىن كورسەتەدى. بۇگىنگى وتكەلى جاتقان «حالىق مۇراسى» اتتى ءان، كۇي، جىر كەشى – سول بابالارىمىزدان قالعان رۋحاني ءداستۇردىڭ جالعاسى» دەدى ول.
ساحنادا ونەر كورسەتكەن ءاربىر ءانشى كورەرمەندەردىڭ زور ىقىلاسىنا بولەنىپ وتىردى. كوپشىلىكتىڭ كوڭىلىنەن شىققان كەشتى قۇرمانعازى اتىنداعى قازاق ۇلتتىق كونسەرۆاتورياسى «حالىق ءانى» كافەدراسىنىڭ مەڭگەرۋشىسى، ونەرتانۋ دوكتورى امانكەلدى كۇزەۋباي جۇرگىزدى.
كونسەرت اياسىندا ۇلتتىق كىتاپحانا قىزمەتكەرلەرى ارنايى كىتاپ كورمەسىن ۇيىمداستىردى. وندا قازاقتىڭ ءدىنى مەن داستۇرىنە قاتىستى كىتاپتار قويىلدى.
ءىس-شاراعا الماتى قالاسىنىڭ زيالى قاۋىمى، ءارتۇرلى ءدىني جاماعات مۇشەلەرى، قوعام قايراتكەرلەرى، جاستار ۇيىمدارى، ستۋدەنتتەر ۇەۇ جانە ب ا ق وكىلدەرى قاتىسادى.
ايتا كەتەيىك، كونسەرتتى الماتى قالاسى ءدىن ىستەرى جونىندەگى باسقارماسىنىڭ تاپسىرىسى بويىنشا «ەل-شەجىرە» قوعامدىق قورى ۇيىمداستىردى.
جاسۇلان ناۋرىزالييەۆ
