بۇگىن، 26 قازاندا كەشكە جاقىن الماتى وبلىسىندا كولىك اپاتىنان ەر ادام كوز جۇمدى. جانتۇرشىگەرلىك كولىك اپاتى قاسكەلەڭنەن شامالعان ستانسياسىنا بارار جولدا ورىن العان. كۋاگەرلەردىڭ ايتۋىنشا، Mitsubishi Galant اۆتوكولىگى جۇك كولىگىنىڭ الدىنا شىعىپ كەتكەن. جۇك كولىگى جۇرگىزۋشىسى ونى بايقاماي قالعان. جەڭىل كولىكتىڭ جۇك كولىگىنە تىكەلەي سوقىتىعىسۋى ناتيجەسىندە Mitsubishi Galant جۇرگىزۋشىسى وقيعا ورنىندا قازا تاپتى. بۇل تۋرالى zakon.kz حابارلايدى.
سوقتىعىس ورىن العان كەزدە كۋاگەرلەر مەن جۇك كولىگى جۇرگىزۋشىسى زارداپ شەككەن ەر ادامعا كومەككە كەلگەن. بەلگىلى بولعانداي، Mitsubishi Galant جۇرگىزۋشىسى ماس كۇيدە بولعان، سالون ىشىنەن ىشىمدىكتىڭ ءيىسى مۇڭكىپ تۇرعان. قازا تاپقان ەر ادامنىڭ دەنەسىن تج قىزمەتكەرلەرى الىپ شىقتى.
