بۇگىن، 26 قازاندا ەلباسى پرەزيدەنت اكىمشىلىگىنىڭ باسشىسى ادىلبەك جاقسىبەكوۆ پەن پرەزيدەنت اكىمشىلىگى باسشىسىنىڭ ءبىرىنشى ورىنباسارى مارات ءتاجيندى "لاتىن قارپىنە نەگىزدەلگەن قازاق ءالىپبيىنىڭ ۇسىنىلعان جوباسىن بەكىتۋ تۋرالى" شەشىمدى قابىلداۋ  كەرەكتىگىن تاپسىردى. ەستەرىڭىزگە سالا كەتەيىك، بۇل تۋرالى Qamshy.kz اقپارات اگەنتتىگى جازعان بولاتىن. 

وسى كەزدەسۋدە نۇرسۇلتان نازاربايەۆ لاتىن قارپىنە نەگىزدەلگەن قازاق ءالىپبيىنىڭ سوڭعى جوباسى قىزۋ تالقىلانىپ، قوعام تاراپىنان قولداۋ تاپقانىن اتاپ وتكەن ەدى. پرەزيدەنت سوزىنەن ءۇزىندى كەلتىرسەك: 

"لاتىن قارپىنە نەگىزدەلگەن قازاق ءالىپبيىنىڭ ۇسىنىلعان جوباسىن بەكىتۋ تۋرالى جارلىق شىعارۋ قاجەت. كوميسسيا جۇمىسىن اياقتادى. سوڭعى نۇسقا جاريالاندى. عالىمدار، ءتىلتانۋشىلار، ساياساتكەرلەر، جاستار جانە قازاقستان حالقى اسسامبلەياسىنىڭ وكىلدەرى ورتاق مامىلەگە كەلدى. جالپى، قوعام قولداپ وتىر"، – دەدى قازاقستان پرەزيدەنتى. 

بۇل نەنى بىلدىرەدى؟ بۇگىنگى كۇنگى كەزدەسۋ قوعامدا قىزۋ پىكىرتالاستار تۋدىرعان لاتىن ءالىپبيىنىڭ تاعدىرىن شەشكەن تاريحي كۇن بولعانى ما؟ بۇل سۇراقتار بويىنشا، ساياساتكەر، ەرلان كارين ءوز پاراقشاسىندا پىكىرىن ءبىلدىردى: 

"قالاي بولعاندا دا بۇل شەشۋشى ءسات. ارينە، ۇناتاتىندار دا ۇناتپايتىندار دا بولادى، ءبارىنىڭ كوڭىلىنەن بىردەي شىعۋ مۇمكىن ەمەس، ونى تالقىلاۋدىڭ بارىسىندا دا كوردىك. بۇرىن ايتقانىمداي، بىردە ءبىر ەلدە ءتىل رەفورماسى، ءالىپبي اۋىستىرۋ ماسەلەسى وسىنداي كەڭ تۇردە تالقىعا سالىنباعان بولاتىن. دەگەنمەن، قازىرگى قابىلدانىپ جاتقان شەشىم - ەلىمىزدىڭ دامۋىنداعى تۇبەگەيلى بەتبۇرىس. ءتىپتى بۇل تاۋەلسىزدىكتى يەلەنگەننەن كەيىنگى تاريحي ماڭىزدىلىعى جاعىنان ەكىنشى ۇلكەن قادام دەپ ايتار ەدىم. سەبەبى بۇل ءبىزدىڭ وركەنيەتتىك تاڭداۋىمىزدىڭ ناقتى كورىنىسى. قالعانى ءوز قولىمىزدا - بۇگىن لاتىن ءالىپبيىنىڭ قابىلدانۋى ەرتەڭ اق بىردەن ونىڭ قولدانىسقا ەنگىزىلەتىنىن بىلدىرمەيدى. الدا 8 جىل قىرۋار جۇمىس كۇتىپ تۇر. 2025 جىلعا دەيىن ەرەجەسى، ادىستەمەسى دايىندالادى. سوندىقتان، قالعانىن عالىمدار اسىقپاي، تياناقتى ساراپتاپ جاسار. ەڭ باستىسى، نەگىزگى باعىت ايقىندالدى!" -دەدى ول. 

نۇرسۇلتان نازاربايەۆ اتاپ وتكەندەي، "قازاق ءالىپبيىن لاتىن قارپىنە كەزەڭ-كەزەڭمەن جانە جۇيەلى تۇردە كوشىرۋدىڭ ماڭىزى زور". لاتىن ءالىپبيىنىڭ سوڭعى ۇسىنىلعان جوباسى ماقۇلدانعانعا ۇقسايدى. دەگەنمەن، كەلەر ۋاقىتتا بۇل مالىمدەمەنىڭ راستىعىنا ءالى دە كوز جەتكىزۋ كەرەك.