سيريا جونىندەگى استانا پروسەسىنىڭ بارلىق تاراپى استانادا 30-31 قازاندا وتەتىن كەزدەسۋگە قاتىساتىنىن راستادى، دەپ حابارلايدى Qamshy.kz اقپارات اگەنتتىگى قازاقستاننىڭ سىرتقى ىستەر مينيسترلىگىنە سىلتەمە جاساپ.
رەسەي دەلەگاسياسىنا رف پرەزيدەنتىنىڭ سيريا جونىندەگى ارنايى وكىلى الەكساندر لاۆرەنتيەۆ، تۇركيا دەلەگاسياسىنا سىرتقى ىستەر ءمينيسترىنىڭ ورىنباسارى سەدات ونال، يران دەلەگاسياسىنا سىرتقى ىستەر ءمينيسترىنىڭ ورىنباسارى حۋسەين دجابەري انساري باسشىلىق ەتەدى.
الداعى كەزدەسۋگە سيريا ۇكىمەتىنىڭ جانە سيريالىق وپپوزيسيانىڭ، سونداي-اق بايقاۋشى رەتىندە بۇۇ، اقش جانە يوردانيانىڭ وكىلدەرى قاتىسادى.
ءىس-شارانىڭ باستالۋىنان ءبىر كۇن بۇرىن كەپىلگەر-ەلدەردىڭ وكىلدەرى ساراپشىلار دەڭگەيىندە ەكىجاقتى جانە ءۇشجاقتى كونسۋلتاسيالار وتكىزۋگە نيەتتى. جالپى وتىرىس بارلىق تاراپتىڭ قاتىسۋىمەن 31 قازاندا وتەدى.
الداعى كەزدەسۋ سيريادا ۇرىس ءىس-قيمىلدارىن دوعارۋ رەجيمىن نىعايتۋ بويىنشا قول جەتكىزىلگەن ناتيجەلەردى ساقتاۋعا، سونداي-اق داعدارىستى ساياسي رەتتەۋگە ءوتۋ كەزەڭىندە اتالعان ەلدەگى جاعدايدى ءارى قاراي تۇراقتاندىرۋ شەڭبەرىندە كۇش-جىگەرلەردى ارتتىرۋعا باعىتتالعان.
