جىندىحانادان اقشا بەرىپ، «جازىلىپ شىققان» ءبىر ەسالاڭ حالىققا قىزمەت كورسەتۋ ورتالىعىنا كەلدى.

--بۇگىنگە سالەمەتسىز بە؟ ەرتەڭگە دە سالەمەتسىز بە؟ ونىڭ ارعى كۇنىنە سالەمەتسىز بە؟
--كەشىرىڭىز، نە دەپ كەتتىڭىز؟
--ەرتەڭ دە، ونىڭ ارعى كۇنى دە كەلەتىن شىعارمىن، سوعان كۇنى بۇرىن سالەمدەسىپ جاتقانىم عوي...
--يا، نە شارۋامەن كەلدىڭىز؟—دەپ سۇرادى بەتى قۋىرىلعان بيدايداي قىزىل شىرايلى قىز.
--بيزنەس اشايىن دەپ ەدىم.
--قانداي بيزنەس؟
--اشتان ولتىرمەيتىن...
--قۇرىلىس پا؟ الدە گازەت اشاسىز با؟
--اشتان ولتىرمەيتىن...
--بارلىق بيزنەس اشتان ولتىرمەيدى، اعاي...
--اشتان قاتىپ قالمايتىن بيزەنس اشقىم كەلەدى...
--ايتساڭىزشى ەندى...
--اشتان قاتىرمايتىن...
--تۋۋ، اعاي، ويناماڭىزشى!
--بيزنەسىمنىڭ اتى-- «اشتان قاتىرمايتىن»...
--بيزنەس جوسپارىڭىز؟
--اشتان قاتىرمايتىن...
--اعاي، مەنىمەن ويناپ وتىرسىز با، نە؟
--بۇل ەرەكشە جوبا. اشتان قاتىرمايدى. الەم بويىنشا مەن عانا اشايىن دەپ وتىرمىن! مەن عانا! رنن، سيك، ولگەنىم تۋرالى كۋالىگىم مىنە. بيزنەسىمدى تىركەۋ قۇجاتتارىن دايىنداپ بەرىڭىزدەرشى..
--ولگەنىڭىز تۋرالى كۋالىگى نەسى؟
ء--ا-ا، بىلتىر مەنى «ءولتىرىپ» قويعانسىزدار. جاڭا كۋالىك الاردا سولاي جازىپ جىبەرىپسىزدەر...
--جارايدى، ايتىڭىزشى، ەلدە جوق ول قانداي بيزنەس؟
كوكتەمدە جىنى قوزاتىن ەسۋاس ىرجالاقتاپ، تومەن قارادى.
--كەشىرىڭىز، ايتۋعا بولمايدى. قۇپيا.
--قۇپيا بيزنەس دەگەن بولمايدى.
--قاماتىپ جىبەرەسىزدەر...
--نەمەنە؟
--نەگىزى قاماتىپ جىبەرسەڭىزدەر، وكىنەسىزدەر، مۇنداي بيزنەس الەمدە جوق! يا، يا، تىركەلگەن، اشىق ءتۇرى. ءبارى جاسىرىن بيزنەسپەن اينالىسادى! شەنەۋنىكتەر دە! كولەڭكەلى بيزنەس!
--ەشقايدا حابارلامايمىن، ايتىپ ءولتىرىڭىزشى...
--نەگىزى مەن بۇل بيزنەستى جاساپ، راحاتىن كورىپ جاتىرمىن. اشتان ولتىرمەيدى ەكەن. سونى تىركەتىپ الايىن دەپ...
--ايتاسىز با، جوق پا؟
ەسۋاس جەلكەسىن قاسىپ، مۇرنىن شۇقىلادى.
--«جالعان اقشا جاساۋ» جشس-نى اشايىن دەپ ەدىم... ۇيدە پرينتەرىم بار. ءبىر ميلليون تەڭگە باسىپ شىعاردىم. ناعىز اقشادان ايىرا المايسىز. كەدەي-كەپشىكتەرگە ءجۇز مىڭنان ۇلەستىرىپ جاتىرمىن. ولار ماعان ايران، ءسۇت، ءتىپتى ەت اسىپ بەرىپ جاتىر... سىزگە قانشا بەرەيىن؟ ميلليون؟ ميلليارد؟
اقشادان اۋمايتىن ءبىر بۋما اقشانى كورگەندە، قىزمەتشى قىز تالىپ قالدى...