2016 جىلى Reuters اگەنتتىگىنىڭ ءجۋرناليسى برايان گروۋ اقش-تا ادام اعزالارىن ساتىپ الۋ قانشالىقتى مۇمكىن ەكەنىن انىقتادى. ول بيولوگيالىق ماتەريالداردى ساتۋمەن اينالىساتىن Restore Life ۇيىمىنىڭ ەلەكتروندى پوشتاسىنا مويىن ومىرتقانىڭ زەرتتەۋ جوباسى ءۇشىن قاجەت ەكەنىن، سول ءۇشىن ونىڭ باعاسىن بىلگىسى كەلەتىنىن جازىپ جىبەردى.

ءبىر ساعاتتان كەيىن Restore Life پرەزيدەنتى دجەيمس بيردانىڭ اتىنان حات كەلدى. ول براياننىڭ ۇيىم تۋرالى قايدان بىلگەنىن سۇراعان ەكەن. جۋرناليست جۇمىس ىستەپ جۇرگەن سالاسىنداعى تانىستارىنان بىلگەنىن جازعان.  وسىنداي جاۋاپتان كەيىن دجەيمس بيردان ەشقانداي قۇجات سۇراماي-اق مويىن ومىرتقاسىنىڭ باعاسىن جازىپ جىبەرەدى. بەلگىلى بولعانداي، ادامنىڭ مويىن ومىرتقاسى $300 تۇرادى، ال ونى جەتكىزىپ بەرگەنىن قالاساڭىز قوسىمشا $150 تولەۋىڭىز قاجەت.   

ءبىر اي وتكەننەن كەيىن FedEx شابارمانى قوراپشاعا سالىنعان ادام اعزاسىن اكەلەدى. مويىن ومىرتقاسى 24 جاستاعى ەركەككە تيەسىلى ەكەن.

ءقابىر توناۋشىلار

ەكى عاسىر بۇرىن ەۋروپالىق مەديكتەر جاڭا كومىلگەن مايىتتەردى قابىردەن قازىپ زەرتتەۋ جۇرگىزگەن. مۇنداي جاعداي ءجيى قايتالانعاندىقتان قابىرلەردى تەمىر تورمەن قورشايتىن بولعان.

1832 جىلى بريتانيا بيلىگى ماسەلەنى شەشۋ ماقساتىندا ءمايىتحانا مەن اۋرۋحاناداعى ىزدەۋشىسى جوق قايتىس بولعاندارعا زەرتتەۋ جۇرگىزۋگە رۇقسات بەردى. وسىدان كەيىن قابىردەگى ءمايىتتى قازىپ الۋ توقتاعان.

ولگەن قالىڭدىق

2016 جىلى قىتايدىڭ جول پوليسياسى قايتىس بولعان ايەلدىڭ ءمايىتىن الىپ كەلە جاتقان كولىكتى توقتاتتى. وندا ءۇش ەركەك وتىرعان. ەر ادامداردىڭ ءبىرى ايەلدىڭ ءوز ماحابباتىن كەزىكتىرە الماي جۇرگەنىن جانە ول وعان كومەكتەسۋگە ۋادە بەرگەنىن ايتادى. ەر ادام ايەلگە ۋ بەرگەن. ودان كەيىن ءمايىتتى كولىككە سالىپ شانسي ەلدى مەكەنىنە اپارا جاتقان. وندا ايەلدى راسىمەن دە كۇيەۋ جىگىت كۇتىپ وتىرعان. ونىڭ تۋىستارى ولگەن قالىڭدىق ءۇشىن 35 مىڭ يۋان بەرۋگە ۋادە بەرگەن.

قىتايدا ادەتتە ەركەكتەردى ايەلىنىڭ جانىنا كومەدى. سەبەبى قىتايلاردىڭ كوبى قابىردە ادامدى جالعىزدىقتان وسىلايشا ساقتاپ قالۋعا بولادى دەپ ويلايدى. ەگەر ونىڭ ايەلى بولماسا قايتىس بولعان ادامنىڭ تۋىستارى ولگەننەن كەيىن دە توي جاساي بەرەدى. بۇل وتە ەجەلدەن كەلە جاتقان عۇرىپ. ول تۋرالى قىتايدىڭ اتاقتى رومانىندا دا  جازىلعان. روماندا اسكەري قولباسشى ساو ساو قايتىس بولعان بالاسىن 13 جاستاعى قايتىس بولعان قىزعا ۇيلەندىرەدى.

1949 جىلى جۇڭگو بيلىگى مۇنداي تويلارعا تىيىم سالدى. سەبەبى اتالمىش عۇرىپتى وتكىزۋ ءۇشىن ادامدار قابىردەن جاس ايەلدەردىڭ دەنەسىن ۇرلاپ ساتاتىن بولعان.

مەملەكەتتىك «سينحۋا» اگەنتتىگىنىڭ مالىمەتىنە سايكەس، 2013 جىلى شانسي مولاسىنان 27-گە جۋىق ادامنىڭ دەنەسىن ۇرلاپ اكەتكەن. 2015 جىلى تەك ءبىر اۋىلدىڭ وزىنەن 14 ءمايىتتى قازىپ الىپ كەتكەنى انىقتالعان.

سۇيەك ۇرلايتىندار

2009 جىلى چحاپرا قالاسىندا اۆتوبۋس جولاۋشىلارى ورىندىقتىڭ استىنداعى سومكەدەن ادام قاڭقاسىنا ۇقساس سۇيەكتىڭ شىعىپ تۇرعانىن بايقاعان. ادامدار سومكە يەسىن پوليسيا بولىمشەسىنە اپاردى. سومكەدەن  67 ادام قاڭقاسى شىققان. ەر ادام ولاردى بالليا قالاسىندا $14 ساتىپ العانىن ايتقان. تەكسەرۋ ناتيجەسىندە ەر ادامنىڭ 10 جىل بويى قاڭقالاردى ساتۋمەن اينالىسىپ جۇرگەنى انىقتالدى. ەر ادام سۇيەكتەردى  قىتايعا جىبەرىپ وتىرعان. وندا قاڭقادان ادامنىڭ ويلاۋ قابىلەتىن ارتتىراتىن دارىلەر جاساپ ەۋروپا مەن امەريكاعا ساتقان.

قاڭقا ساۋداسىمەن اينالىساتىندار ءمايىتتى ورتەيتىن ورىنداردا تۋىستارىنىڭ كەتۋىن كۇتىپ وتىرادى ەكەن. كەتكەن بويدا بىردەن دەنەنى الىپ كەتەدى. سونىمەن قاتار، جەرلەۋ راسىمىنە اقشاسى جوقتار ءمايىتتى سۋعا اعىزىپ جىبەرىپ وتىرادى.  سول دەنەلەردى الىپ، تورعا وراپ وزەنگە ەكى اپتاعا قويادى. ول ۋاقىتتا بالىقتار ەتىن جەيدى. قالدىقتاردى سۋعا قايناتىپ، كۇنگە ءبىر اپتا كەپتىرەدى. سۇيەك اعارعاننان كەيىن ونى تۇز قىشقىلىنا سالىپ الادى.

ءۇندىستاندا 2017 جىلدىڭ ناۋرىز ايىندا پوليسەيلەر 365 ادامنىڭ سۇيەگىن تاسىمالداعانداردى ۇستادى.