تاشكەنتتە ءوتىپ جاتقان تمد ەلدەرى ۇكىمەت باسشىلارىنىڭ كەزدەسۋىندە قىرعىزستان پرەمەر-مينيسترى ساپار يساكوۆ قازاق-قىرعىز شەكاراسىنداعى جاعدايدى ماسەلە قىلىپ كوتەردى. اقپاراتتارعا قاراعاندا، بۇل ماسەلە جيىننىڭ كۇن تارتىبىندە بولماعان،-دەپ Qamshy.kz اقپارات اگەنتتىگى ازاتتىققا سىلتەمە بەرە وتىرىپ جازادى. 

رەسمي باق-تىڭ حابارلاۋىنشا، ساپار يساكوۆ قازاقستان تمد-نىڭ ەركىن ساۋدا ايماعىن قۇرۋ تۋرالى كەلىسىمىنىڭ تالاپتارىن «تولىق ورىنداماي وتىرعانىن» مالىمدەدى. ال باقىتجان ساعىنتايەۆ قىرعىزستاندى ەۋرازيا ەكونوميكالىق وداعى (ەاەو) اياسىندا وزىنە العان مىندەتتەرىن «تولىق ورىنداۋعا» شاقىردى.

يساكوۆتىڭ سوزىنشە، قازاقستان 10 قازاننان باستاپ شەكارادا تاۋار مەن كولىك قوزعالىسىنىڭ ەركىن وتۋىنە «قولدان كەدەرگى جاساپ وتىر». «كولىكتەر بەس كۇنگە دەيىن تەكسەرۋدەن وتەدى. ءار كەزدە ءار ءتۇرلى سەبەپ ايتادى، قىرعىزستان كونتراباندا تاسىمالداپ جاتىر دەگەنگە دەيىن باردى. اۋىل شارۋاشىلىعى، ءسۇت ونىمدەرىن كونتراباندا دەۋگە بولا ما؟» دەدى يساكوۆ. ونىڭ سوزىنشە، بۇدان قىرعىزستان مەن قازاقستاننىڭ جانە ءۇشىنشى ەلدىڭ كاسىپكەرلەرى شىعىنعا باتىپ وتىر.

«قولدانىلىپ جاتقان شارالار حالىقارالىق قۇقىق نورمالارىنا قايشى كەلەدى. 20 كۇننەن استام ۋاقىتتان بەرى جاعداي جاقسارماي تۇر، بۇل قىرعىزستاندى ەاەو مەن دۇنيەجۇزىلىك ساۋدا ۇيىمىنا جۇگىنۋگە ماجبۇرلەپ وتىر» دەگەن ساعىنتايەۆ قازاقستان قولدانىپ وتىرعان شارالار «ۋاقىتشا بولاتىن شىعار» دەگەن ءۇمىتىن بىلدىرگەن.

باقىتجان ساعىنتايەۆ بۇعان جاۋابىندا ۇكىمەت قىرعىز تاراپىنىڭ پىكىرىن دۇرىس كورمەيتىنىن مالىمدەدى. ساعىنتايەۆتىڭ سوزىنشە، قازاقستاننىڭ بۇل ماسەلە بويىنشا ۇستانىمى «ەاەو ەلدەرىنىڭ ورتاق ەكونوميكالىق كەڭىستىگىن قۇرۋ يدەولوگياسىنا تولىق ساي كەلەدى» جانە وداق ەلدەرى ءۇشىن ەكونوميكالىق قاۋىپ-قاتەرلەردى ازايتۋدى ماقسات تۇتادى.

25 قازاندا ەريەۆاندا وتكەن ەاەو ەلدەرى ۇكىمەت باسشىلارىنىڭ كەزدەسۋىندە ساعىنتايەۆ قىرعىزستان مەن جۇڭگو اراسىنداعى تاۋار اينالىمى تۋرالى مالىمەتتەر اراسىندا «كادىمگىدەي ايىرماشىلىق» بارىن مالىمدەپ، قىرعىزستانمەن شەكاراداعى تەكسەرۋدىڭ كۇشەيتىلۋ سەبەبىن «كونتراباندامەن كۇرەس» دەپ تۇسىندىرگەن. بىشكەكتىڭ ۇيعارىمىنشا، مۇنداي پروبلەما ەاەو ەلدەرىنىڭ بارلىعىندا بار.

7 قازاندا قىرعىزستان پرەزيدەنتى المازبەك اتامبايەۆ پرەزيدەنتتىككە كەيبىر كانديداتتار مەن قازاقستان بيلىگىنىڭ اتىنا قاتار سىن ايتقان. وسىدان كوپ ۇزاماي، 10 قازاندا قازاقستان قىرعىزستانمەن شەكارادا تەكسەرۋدى كۇشەيتىپ، شەكارانىڭ قىرعىز جاعىندا جۇك كولىكتەرىنىڭ كەزەگى پايدا بولعان. تاراپتار 19 قازاننان باستاپ جولاۋشىلار كولىگى مەن جۇگى بار جولاۋشىلاردى وتكىزۋدى جەڭىلدەتۋگە كەلىسكەن بولاتىن. ءبىراق ۇلكەن جۇك كولىكتەرى شەكارادان وتەردە ءالى دە ءجىتى تەكسەرىلىپ، سونىڭ سالدارىنان كەزەك ازايماي تۇر.