باس پروكۋراتۋرا كەڭەسىنىڭ دەپۋتاتى ومىربەك بابانوۆتىڭ ۇستىنەن قىلمىستىق ءىس قوزعالدى، — دەپ حابارلايدى Qamshy.kz اقپارات اگەنتتىگى Sputnik قىرعىزستان سايتىنا سىلتەمە جاساي وتىرىپ. بابانوۆقا قارسى قىلمىستىق ءىستى قىرعىزستان باس پروكۋراتۋراسى قوزعاعان.

قىرعىزستان باس پروكۋراتۋراسى تەرگەۋگە دەيىنگى تەكسەرۋ كەزىندە جوعارعى كەڭەستىڭ دەپۋتاتى ءو.بابانوۆتىڭ 2017 جىلى 28 قىركۇيەك كۇنى سايلاۋالدى ناۋقانى بارىسىندا وش قالاسى ءامىر تەمىر اۋدانىنىڭ نەگىزىنەن ۇلتى وزبەك تۇرعىندارىمەن كەزدەسكەنى بەلگىلى بولدى. بابانوۆ ولاردىڭ داۋىستارىن الۋ ماقساتىندا، كەزدەسۋ كەزىندە ەتنيكالىق وزبەكتەردىڭ قۇقىعى شەكتەلەتىنى، ەلدە ۇلتتار تەڭدىگى جوق ەكەنى، مەملەكەتتىك ورگاندار تاراپىنان وزبەكتەرگە قىسىم جاسالاتىنى تۋرالى پىكىرلەر ايتىپ، مۇنداي جاعدايعا بەلسەندى تۇردە قارسىلىق كورسەتۋگە شاقىرعان انىقتالدى.

قىرعىز باس پروكۋراتۋراسى قىلمىستىق ءىستىڭ قىرعىزستاننىڭ ۇلتتىق قاۋىپسىزدىك كوميتەتىنە جولدانعانىن جازادى.

ومىربەك بابانوۆتىڭ ءوزى بۇعان دەيىن الگى كەزدەسۋدە ايتقان سوزدەرى بۇرمالانعانىن، ەلەكتروندىق ب ا ق بەتتەرىندە تاراعان ۆيدەولاردىڭ «مونتاجدالعانىن» ايتقان. 

ايتا كەتەتىن بولساق، قىرعىزستان ورتالىق سايلاۋ كوميسسياسىنا بابانوۆقا قارسى 19 ارىز ءتۇسىپ، كوميسسيا وعان سايلاۋعا 4 كۇن قالعاندا ءۇشىنشى رەت ەسكەرتۋ بەرگەن بولاتىن.

بابانوۆتىڭ سايلاۋ شتابى الەۋمەتتىك جەلىلەردە تاراعان ۆيدەو «جالعان» جانە «مونتاجدالعان» دەپ مالىمدەگەن.