10 جاستاعى الماتىلىق دانەليا تۋلەشوۆا ۋكرايناداعى «گولوس. دەتي» بايقاۋىنا قاتىسۋدا، دەپ Qamshy.kz اقپارات اگەنتتىگى kazpress-كە سىلتەمە جاساپ جازادى.

ءتورتىنشى ماۋسىمنىڭ قازىلار القاسى ايگىلى موناتيك، «ۆرەميا ي ستەكلو» توبى جانە ناتاليا موگيليەۆسكايالار بولدى. الدىن الا وتكەن سىناقتاردان ۇزدىك بولعان دانەليا،  "سلەپوە پروسلۋشيۆانيە" كەزەڭىنە شاقىرىلىپ، دەمي لوۆاتونىڭ Stone Cold ءانىن ورىنداعان بولاتىن.

قازاقستاندىق ءبۇلدىرشىننىڭ داۋىسىن بىر-ەكى سەكۋند قانا ەستىگەن قازىلار القاسى ۇستەلدەرىن بىردەن دانەلياعا قاراتتى. قازىلار القاسىنىڭ مۇشەسى ناتاليا موگيليەۆسكايانىڭ ايتۋىنشا بۇل «گولوس. دەتي» بايقاۋىنداعى ەڭ ۇزدىك داۋىس بولدى.

- «بۇل ەڭ كەرەمەت جانە بىرەگەي داۋىس. تۇسىرىلگەن بەينەجازبا 100 پايىز كۇللى الەمگە تاراتىلاتىن بولادى. ءبىز ءۇشىن سەن قايسى توپقا بارساڭ دا قۋانشىتىمىز»،-دەدى قازىلار القاسى. ال موناتيك بولسا، دانەليا تۋلەشوۆاعا:

-«سەنىڭ ارمانىڭ موناتيكپەن ءان ايتۋ بولسا عوي، ونداي جاعدايدا مەنىڭ قاتتى جولىم بولىپ كەتەر ەدى»،- دەدى.

از ويلانعان، دانەليا موناتيكتىڭ توبىندا ءان ايتاتىن بولىپ شەشىم قابىلدادى. بۇل دانەليا قاتىسقان العاشقى ءىرى جوبا ەمەس، 2015 جىلى ول «ايالاعان استانا» كەزەڭىنەن توپ جارىپ، قازاقستان اتىنان الەمدىك «بالالار جاڭا تولقىنىندا» ونەر كورسەتكەن ەدى. ول كەزدە دانەليا كورەرمەندەر كوزايىمى بولعان.