كونەنىڭ اڭگىمەسىن جيناپ ءجۇرىپ بىلتىر قارماقشىدا نىعمەتوللا دەگەن قارياعا جولىقتىم. جاسى 86-دان اسقان ەكەن. ومىردەن كورگەنى، تۇيگەنى كوپ. ءبىراز سۇحباتتاستىق. ءسوز اراسىندا «90 مولدانى قاشىرعان» اتتى اڭگىمەنى ايتىپ بەردى. ۇزىن ىرعاسى بىلاي:

— حح عاسىردىڭ باسىندا سىر بويىندا كەتە اتالىعىندا بەكمىرزا دەگەن بولىس ءومىر ءسۇرىپتى. ونىڭ ۇلى تۇڭعىشباي دا اكەسىنىڭ جولىن قۋىپ، 25 جاسىندا بولىستىق قىزمەتكە كەلەدى. تاعدىردىڭ جازۋى كوپ ۇزاماي بالاسى دۇنيە سالادى. جەرلەپ، شاريعات بويىنشا بار مىندەتىن ورىندايدى. كەيىن بەكمىرزا بالاسىنا اس بەرەتىن بولادى. مۇمكىن، بولىستىڭ بايلىعىنان دامەتكەن دە بولار، سول وڭىردەن دۇعا وقىماق نيەتپەن 90 مولدا جينالىپتى. ول كەزدە دۇعا وقىپ، باتا جاساعان مولدالارعا ءبىر-بىر مال جەتەكتەتەدى ەكەن. «وسىنشا مولداعا قالاي مال تاۋىپ بەرەمىز»، — دەپ اۋلەت ۇلكەندەرىنىڭ ءۇنجۇرعاسى ءتۇسىپ كەتىپتى. مۇنى بەكمىرزانىڭ ايەلى بايقاپ قالادى. انامىز ءوزى اقىلدى، تاۋىپ ايتاتىن جانە ءدال ايتاتىن، تەكتى كىسى ەكەن.

– اۋ، اعالار، نەگە تۇنجىراپ وتىرسىزدار؟ – دەپتى.

– مىنا جينالعان توقسان مولدانى نە قىلامىز؟ – دەيدى.

– ونىڭ نە ويلاناتىنى بار. مولدالار بولاتبايدىڭ قاسىنا بارسىن دا داۋىستاپ كەزەك-كەزەك قۇران وقىسىن. وقي الماعانى ساداقادان اۋىز ءتيىپ قايتا بەرسىن، – دەپتى.

بولاتباي الداشباي احۋننان العاش ءبىلىم العان شاكىرتتەردىڭ ءبىرى ەكەن. جارىقتىق، شاريعي ءبىلىمدى، ءدىني ساۋاتتى كىسى ەكەن. جينالعان 90 مولدانىڭ 10 عانا بولاتبايدىڭ جانىندا قۇران وقۋعا ءداتى جەتىپتى. قالعاندارى شالا ساۋاتتىلىعىنان ۇيالىپ، قايىرلى بولسىن ايتىپ، استان ءدام اۋىز ءتيىپ كەتە بەرىپتى. ءتىپتى، كەيبىرى قاشقانداي بولىپ ارەڭ قۇتىلىپتى. كەيىن وسى اڭگىمە ەل اۋزىندا «90 مولدا قاشقان» دەگەن اتپەن تارالىپ كەتىپتى...

نە دەگەن تاپقىرلىق، دەسەيشى-اي؟! بۇگىندە شاريعاتتى ايتىپ، قاتايىپ جۇرگەن كەيبىر باۋىرلارىمىزدى وسىلاي ءبىر سىناتىپ الار ما ەدى؟ وتكەندە ءبىر اعام ايتىپ ەدى. اقىلگويسىپ، قاتايىپ جۇرگەن ءبىر جىگىت سۇراق قويىپ باستى قاتىرعاندا «اتتاحيات» دۇعاسىن وقىپ بەرشى دەسە، دۇرىس جاتتاماپتى ءارى قاتە وقىپتى. ويلاپ وتىرساق، اتاققا بار، امالعا جوق ازاماتتار قاي كەزدە دە بولىپتى عوي.

ۇلاربەك نۇرعالىم ۇلى