دايش تەرروريستىك توبى تۇرعىندارعا قاتىستى قانداي قاتىگەز ارەكەتتەردى قولداناتىنى بەلگىسىز. سيريادا رەپورتاج جاساۋ وتە ءقاۋىپتى. سوندىقتان جۋرناليستەر دايش باسىپ العان جەرلەرگە كوپ بارا بەرمەيدى.  الايدا ءوز ءومىرىن قاتەرگە تىگىپ سيرياداعى جاعداي تۋرالى اقپاراتتى جۋرناليستەرگە جەتكىزىپ وتىرعان تۇرعىندار بار. بي-بي-سي كوررەسپوندەنتى سوڭعى ءۇش ايدا راككا تۇرعىنىمەن حابارلاسىپ تۇردى. ول كۇندەلىك جازادى. وندا دايش سودىرلارى باسىپ العان قالاداعى تۇرعىنداردىڭ جاعدايى باياندالادى.

بۇعان دەيىن كۋاگەر كۇندەلىگىنىڭ 1ء-شى، 2ء-شى، 3ء-شى، 4ء-شى ءبولىمىن جاريالادىق

كۋاگەر كۇندەلىگى (5ء-شى ءبولىم):

دالادى كۇن جارقىراپ تۇردى. مۇنداي اۋا رايى ماعان كۇش بەرگەندەي بولدى، ءبىراق ساۋدا جۇرمەدى. تاۋاردى دايش-تىڭ بىرنەشە تەكسەرۋ ورىندارىن وتكىزۋ ءۇشىن قىرۋار قاراجات كەتەتىن. سوندىقتان تاۋار باعاسىن كوتەرۋگە تۋرا كەلەتىن. الايدا ساۋدانىڭ جۇرمەۋى تەك قىمباتشىلىققا عانا بايلانىستى ەمەس. ادامدار ۇيىنەن شىقپايتىن بولدى.

دايش دۇكەن يەلەرىنە سالىق سالادى. سونىمەن قاتار، توق پەن دۇكەندى جۋىپ، تازالايتىن ادامعا دا ايلىعىن بەرۋىمىز كەرەك. وسىنىڭ ناتيجەسىندە، ءبىز شىعىنعا باتتىق.

دۇكەنگە دوسىمنىڭ اناسى كىرىپ كەلدى. ءوڭى قاشىپ كەتكەن. الدەنەگە قاتتى الاڭداپ تۇرعانى كورىنىپ تۇردى.

دوسىممەن نارازىلىق ءبىلدىرۋ توبىندا تانىسقانبىز. دوسىم ەلدىڭ ساياسي ومىرىنە ارالاسۋىن توقتاتىپ، ۇيلەنىپ، تىنىش ءومىر باستاعان.

دوسىمنىڭ اناسى دايش سودىرلارىنىڭ ۇيگە كەلىپ بالاسىن تۇتقىنداعانىن ايتتى. مەن ونى تىنىشتاندىرۋعا تىرىستىم. دوسىمدى بۇعان دەيىن دە بىرنەشە مارتە تۇتقىنداپ، قايتا جىبەرگەن ەدى. وسى جولى دا سولاي بولادى دەدىم. ءبىراق ونى سەندىرە الماعان سەكىلدىمىن.

ول مەنى دە تۇتقىنداماي تۇرعاندا قالادان كەتۋىم كەرەك ەكەنىن ايتتى. ونىڭ ءسوزى مەنى ابىگەرگە ءتۇسىردى.

بىرنەشە كۇن ءوتتى. مەن دۇكەندەگى سورەلەرگە تاۋاردى قويىپ جاتقاندا دوسىم كىرىپ كەلدى. ول ماعان بۇگىن ۇيگە باسقا جولمەن بارۋىمدى سۇرادى. سەبەبى جامان نارسە كورۋىم مۇمكىن ەكەنىن ايتتى. ءبىراق نە ەكەنىن ايتپادى.

مەن سول كۇنى ۇيگە بۇرىنعى جولىممەن قايتتىم. كوشەدە نە كورۋىم مۇمكىن ەكەنى مەنى قاتتى قىزىقتىردى. دوسىم تۇراتىن ءۇيدىڭ جانىنان باسى جوق دەنەنى كوردىم. دەنەسىندە «شپيون جانە يسلام مەملەكەتىنە قارسى شىققان ادام» دەپ جازىلعان.

مۇنى كورگەننەن كەيىن ۇيگە بارا المايمىن. انامنىڭ مەنى مۇنداي كۇيدە كورگەنىن قالامايمىن.

دوسىمنىڭ دەنەسىن ءدال ءۇيىنىڭ الدىنا، اناسىنىڭ، جاقىندارىنىڭ كوز الدىنا ءىلىپ قويعانى ناعىز قاتىگەزدىك. مەن بۇعان شىداي المايمىن.

كۇن وتكەن سايىن جاعداي ناشارلاپ بارادى. دايش سودىرلارى ريەۆوليۋسياعا قاتىسى بار كەز كەلگەن ادامدى تۇتقىندادى. ءتىپتى ول ادام ريەۆوليۋسياعا بىرنەشە اي ءتىپتى بىرنەشە جىل بۇرىن قاتىسسا دا ولاردى قۋدالاۋىن توقتاتپادى. مەن دە ريەۆوليۋسياعا قاتىسقان ادامداردىڭ ءبىرىمىن. نارازىلىق اكسياسىنا قاتىسقانداردىڭ بارلىعىمەن بايلانىستى ۇزگەنمىن. ءبىراق بۇل جەتكىلىكسىز. مەن كەتەمىن دەپ شەشتىم.