تانىمال بلوگەر ق ر اقپارات جانە كوممۋنيكاسيالار ءمينيسترى داۋرەن ابايەۆقا ەرەكشە ۇسىنىس تاستادى، دەپ حابارلايدى Qamshy.kz اقپارات اگەنتتىگى "نۇر وتان" پارتياسىنىڭ جەلىدەگى پاراقشاسىنا سىلتەمە جاساپ.

ءوز ءوتىنىشىن بلوگەر ءارى زاڭگەر ايگۇل ورىنبەك ۆيدەوبايلانىس ارقىلى جەتكىزدى. "نۇر وتان" پارتياسىنىڭ رەسپۋبليكالىق قوعامدىق قابىلداۋ بولمەسىنە كەلگەن مينيستر ءبىرقاتار ازاماتتى قابىلداپ، ۆيدەوبايلانىس ارقىلى ەل تۇرعىندارىنىڭ وتىنىشتەرىن تىڭداعان. شىمكەنتتەن بايلانىسقا شىققان زاڭگەر "ەۋرازيا" تەلەارناسىنداعى "قالاۋلىم" باعدارلاماسىن جابۋ ماسەلەسىن قوزعادى.

ونىڭ ايتۋىنشا، باعدارلاما رەسەيلىك اتىشۋلى «دوم-2» رەاليتي-شوۋىنا ۇقسايدى.

"قالاۋلىم" باعدارلاماسى بويىنشا الەۋمەتتىك جەلىدە دە جازعان بولاتىنبىز. بۇل باعدارلاماعا قاتىستى زەرتتەۋ دە جۇرگىزىپ كوردىم. تۇركيا ەلىنەن ەكەن. تۇركيانىڭ ۆيسە-پرەمەرى بۇل باعدارلاماعا قارسى بولىپ، جابىلعان. ياعني، جاستاردىڭ بەيادەپ سوزدەرى، توبەلەسى باعدارلامادا بەلەڭ الىپ كەتكەننەن كەيىن "ۇلتتىق مادەنيەتىمىزگە قارسى" دەپ جاپقان. ەندى وزگە ەلدە قاڭسىق دۇنيە بىزگە تاڭسىق بولۋدا. جاستارىمىزدىڭ بۇزىلۋىنا تۇرتكى بولىپ وتىرعان بۇل باعدارلاما نەگە بىزدە كورسەتىلەدى؟"، - دەدى ايگۇل ورىنبەك.

داۋرەن ابايەۆ باعدارلاماعا قاتىستى ساراپتاما جۇرگىزەتىنىن، ارنايى شاعىم جاسالعاندىقتان مىندەتتى تۇردە تەكسەرىلەتىنىن ايتتى. سونداي-اق بۇقارالىق اقپارات قۇرالدارىنىڭ ءبىرىنشى كەزەكتە ەلىمىزدىڭ ازاماتتارىنىڭ ساناسىن جاڭعىرتىپ، تاربيەلەۋى  كەرەكتىگىن جەتكىزدى.