كەترين (ەسىمى وزگەرتىلگەن) دوس دەپ ساناعان ادامنان قورلىق كوردى. ەكى جىلعا جۋىق ۋاقىت تانيتىن ادامى ونى زورلاپ، كەترين ودان جۇكتى بولدى. جابىرلەنۋشى BBC جۋرناليسىنە نەلىكتەن بالانى دۇنيەگە اكەلگەنىن جانە ءقازىر بالاسىنىڭ كوزىنە نەلىكتەن  قاراي المايتىنىن ءتۇسىندىردى.

مەن ەكى بالاسى بار جالعىز باستى انامىن. مەنى زورلاعان ادامدى تانيمىن. ورتاق دوستارىمىز ارقىلى تانىستىق. ارالاسىپ جۇرگەنىمىزگە 2 جىل بولعان. ارامىزدا دوستىقتان وزگە ەشتەڭە بولمادى.

مەن باستاپقى كەزدە-اق وعان ەكەۋىمىزدىڭ ارامىزدا ماحاببات بولۋ مۇمكىن ەمەس ەكەنىن ايتقانمىن.

ونىڭ ۇيىنە باردىم. دوسىم بىردەن وزگەرىپ كەتتى. ونىڭ وتە جاقىن كەلگەنىن بايقادىم. قاشقاقتاپ ەدىم، ماعان كۇش كورسەتتى. بارلىعى وتە تەز بولدى.

دوسىمنىڭ بۇل ارەكەتىنە تاڭعالعانىم سونشالىق، ەسەڭگىرەپ قالدىم. وعان تويتارىس بەرۋدىڭ ورنىنا ءبىر ورىندا قاتىپ قالدىم.

ول ەشتەڭە ايتپاستان ۇيدەن شىعىپ كەتتى. كولىگىنە وتىرىپ كەتىپ قالدى.

مەن ۇيگە كەلدىم. بارلىق دەنەم اۋىرىپ تۇردى. جاعدايىمنىڭ قانشالىقتى اۋىر ەكەنىن ول ۋاقىتتا بىلمەدىم. ۇيگە تەزىرەك جەتكىم كەلدى.

مەن بالالارىمدى كورشىممەن قالدىرعانمىن. ۇيگە كەلگەندە قۋانىشىما وراي بالالار ۇيىقتاپ جاتتى. مەن ەشكىمگە ەشتەڭە ايتپادىم. سەبەبى، ادامدار مەنى كىنالايتىنداي كورىندى.

زورلاعان ادامدى تانيتىن بولعاندىقتان پوليسيا ونى زورلاۋعا جاتقىزبايدى دەپ ويلادىم. سوندىقتان شاعىمدانبادىم.

كەلەسى كۇنى مەن ودان نەلىكتەن بۇلاي جاساعانىن بىلگىم كەلدى. ول ماردىمدى جاۋاپ بەرمەدى. ەسىندە ەشتەڭە جوق ەكەنىنە سەندىرگىسى كەلدى. ءبىراق زورلاعانىن جوققا شىعارمادى.

جاساندى تۇسىك جاسامايمىن دەپ شەشتىم. جاساندى تۇسىككە ەشقانداي قارسىلىعىم جوق. الايدا ءسابيدى ولتىرسەم جاعداي ودان بەتەر ۋشىعاتىنىن ءتۇسىندىم. بالامدى ءولتىردىم دەگەن ويمەن ءومىر سۇرە الماۋشى ەدىم.

ماعان قولداۋ كورسەتكەن ەشكىم بولمادى. مەنىڭ جالعىز باستى انا ەكەنىمدى بىلەتىن ايەلدەر مەنى كىنالادى. الايدا ولارعا ەشتەڭە ءتۇسىندىرىپ، اقتالمادىم. سەبەبى زورلانعانىمدى وزگەلەر بىلگەنىن قالامادىم. بالام دۇنيەگە كەلگەندە وعان زورلاۋدىڭ ناتيجەسىندە پايدا بولعان بالا سەكىلدى قاراعانىن قالامادىم.

بالامدى العاش قولعا العاندا ونىڭ كوزى اكەسىنە تارتقانىن بايقادىم. سول ۋاقىتتا دەنەم تۇرشىگىپ كەتتى. قانداي سۇمدىق جاعدايدى باستان وتكەرگەنىمدى ءتۇسىندىم، سەزدىم.

بالام وسكەندە كوزى اكەسىنىڭ كوزىنەن اۋماي قالدى. باستان وتكەرگەن سۇمدىق جاعدايدا ەسىمدە قالعانى زورلىقشىنىڭ كوزدەرى ەدى. بۇل جاعداي بالاممەن قارىم-قاتىناسىما ەش اسەر ەتپەدى. مەن بالامدى جانىمنان دا ارتىق جاقسى كورەمىن.

اكەسى تۋرالى كوپ سۇرامايدى. تەك مەكتەپتە «مەنىڭ وتباسىم» دەگەن تاقىرىپتا شىعارما جازعاندا جانە اكەسىنىڭ فوتوسىن سۇراتقاندا قيىندىقتار بولدى. سول ۋاقىتتا بالاما تۇسىندىرۋگە تۋرا كەلدى.

كەترين بالانى دۇنيەگە اكەلگەنىنە ەشقاشان وكىنبەيتىنىن ايتادى...

بالانى دۇنيەگە اكەلىپ ونى جاقسى كورمەسەم جانە وعان قامقور بولا الماسام مەنىڭ تاراپىمنان ۇلكەن قاتەلىك بولۋشى ەدى. .

قاتتى جالعىزسىرايتىن، قينالاتىن كەزدەرىم بولادى. باسىمنان وتكەن جاعداي مەنىڭ ومىرىمە كەرى اسەرىن بەرمەي قويمادى. دەسەك تە، ونىڭ ناتيجەسىندە مەنىڭ بالام دۇنيەگە كەلدى.