قازاقستان رەسپۋبليكاسىنىڭ 2015-2025 جىلدارعا سىبايلاس جەمقورلىققا قارسى ستراتەگياسى بويىنشا باعدارلامالاردى جۇزەگە اسىرۋ جۇمىستارى قارقىندى ءجۇرىپ جاتىر، دەپ حابارلايدى Qamshy.kz اقپارات اگەنتتىگى.

ستراتەگيانىڭ باستى ماقساتى سىبايلاس جەمقورلىقتىڭ كەز كەلگەن كورىنىسىنە اتىمەن توزبەۋشىلىك احۋالىن قالىپتاستىرا وتىرىپ، بۇكىل قوعامدى سىبايلاس جەمقورلىققا قارسى قوزعالىسقا تارتۋ. وسىعان بايلانىستى قازاقستاندا جاستار اراسىندا ءتۇرلى شارالار ۇيىمداستىرىلىپ، جۇمىستار جۇرگىزىلدى.

«جاستار اراسىندا سىبايلاس جەمقورلىققا قارسى مادەنيەت قالىپتاستىرۋ» تاقىرىبىندا استانا قالاسىنىڭ جاستار ساياساتى ماسەلەلەرى باسقارماسى «الەم» ۆولونتەرلىق ورتالىعىمەن بىرىگە وتىرىپ ەلىمىزدىڭ ءبىرقاتار جوعارعى وقۋ ورىندارىندا ستۋدەنتتەرمەن كەزدەسۋ وتكىزدى. كەزدەسۋ ۇيىمداستىرىلعان جوو-دارى قاتارىندا س.سەيفۋللين اتىنداعى قازاق اگروتەحنيكالىق ۋنيۆەرسيتەتى، قازاق تەحنولوگيا جانە بيزنەس ۋنيۆەرسيتەتى، قازاق ەكونوميكا، قارجى جانە حالىقارالىق ساۋدا ۋنيۆەرسيتەتى، استانا مەديسينالىق ۋنيۆەرسيتەتى بار. سونىمەن قاتار، اسكەري بورىشىن وتەپ جاتقان بورىشكەرلەر اراسىندا دا ۇگىت-ناسيحات شارالارى ءوتتى.

كەزدەسۋ بارىسىندا قازاقستانداعى سىبايلاس جەمقورلىق بويىنشا جالپى ماسەلەلەر تالقىلاندى. ارنايى شاقىرىلعان سپيكەرلەر ستۋدەنتتەرمەن سىبايلاس جەمقورلىقتىڭ مەملەكەت پەن قوعامنىڭ دامۋىنا تەرىس اسەرلەرىن باياندادى. سونىمەن قاتار سىبايلاس جەمقورلىقپەن كۇرەسۋ بويىنشا جۇزەگە اسىپ جاتقان ادىستەر مەن سىبايلاس جەمقورلىققا توتەپ بەرۋگە باعىتتالعان جوسپارلار ايتىلدى.

ستۋدەنتتەرگە جەمقورلىقتىڭ قايعىلى سالدارىن كورسەتەتىن ارنايى دايىندالعان الەۋمەتتىك روليكتەر كورسەتىلدى، سونىمەن قاتار سىبايلاس جەمقورلىققا قارسى ارەكەتتى اركىم ءبىرىنشى كەزەكتە وزىنەن باستاۋ كەرەكتىگى، ال جەمقورلىققا يتەرمەلەيتىن جاعدايلار ورىن العاندا قۇزىرەتتى ورگاندارعا بىردەن حابارلاۋ قاجەتتىگى ءتۇسىندىرىلدى.

كەزدەسۋ قىزىقتى، ءارى ناتيجەلى بولۋى ءۇشىن اۋديتوريا بيلىك جانە ءومىر ءسۇرۋ شارتتارىنا نارازى حالىق بولىپ ەكىگە ءبولىنىپ، دەباتتار وتكىزدى. بۇل ەلىمىزدەگى ماڭىزدى ماسەلەلەردى، سىبايلاس جەمقورلىققا يتەرمەلەيتىن جاعدايلاردى انىقتاۋعا، ونى شەشۋ جولدارىن تالقىلاۋعا مۇمكىندىك بەردى. دەبات جەڭىمپازدارى كۋبوكتار جانە گراموتالارمەن ماراپاتتالدى. سىبايلاس جەمقورلىققا قارسى ستراتەگيا اياسىندا شارالار كەشەنى ءالى دە جالعاسىپ كەلەدى. ەلىمىزدىڭ تۇكپىر-تۇكپىرىندەگى جاستار اراسىندا اتالمىش تاقىرىپتى كەڭىنەن تاراتۋ جوسپارلى تۇردە ىسكە اسىپ جاتىر.