قازاق-قىرعىز شەكاراسىنداعى احۋال تۇراقتالا باستادى، دەپ جازادى Qamshy.kz اقپارات اگەنتتىگى.

 قوس مەملەكەت پرەزيدەنتەرىنىڭ كەلىسىمىنەن كەيىن ىلە-شالا كەدەندەگى جۇك كولىكتەرىنىڭ ۇزىن-سونار كەزەگى كۇرت ازايعان. ءبىراق بۇل شەكاراداعى تەكسەرىس وسىمەن بىتەدى دەگەن ءسوز ەمەس. الدىمەن قىرعىزستان تاۋارلارىن  ەۋرازيالىق ەكونوميكالىق وداقتىڭ تالاپتارىنا ساي راسىمدەۋى ءتيىس. ازىرگە رەسمي بىشكەك ءبارىن ورىندايمىز دەپ ۋادە ەتكەن. ال شەكارانىڭ بۇرىنعى قالىپتا جۇمىس ىستەۋى الدىمەن ساياساتتان الىس قاراپايىم حالىقتى قۋانتىپ وتىر. بۇل تۋرالى كتك جاڭالىقتارى حابارلايدى.

بۇل قازاق-قىرعىز شەكاراسىنداعى ايشا ءبيبى بەكەتى. بۇرىنعىداي قاربالاس پەن ۇزىن سونار كەزەك جوق. بەكەتتەن وتە الماي، قاڭتارىلىپ تۇرعان جۇك كولىكتەرى دە كورىنبەيدى. شەكاراداعى شەكتەۋ ازايىپ، جۇرت ارى-بەرى جىلدام ءوتىپ جاتىر. بۇعان اسىرەسە، وقشاۋدا قالعانداي كۇي كەشكەن  ايىرقالپاقتى اعايىن ءماز.

جەڭىسبەك اتابەكوۆ، قىرعىز ازاماتى:

-ەندى جاقسى بولدى. 5-10 مينۋتتا ءوتىپ كەتتىم.

–بۇرىن قالاي ەدى؟

–بۇرىندارى تازا قيىن بولىپ قالدى عوي. اپتالاپ جاتتى عوي بالالار.

سايەرا سايدۋمانوۆا، قىرعىز ازاماتى:

–ءيا، ءبىراز جەڭىلدەدى عوي. جاقسى بولىپ قالدى.

بەكەتتەگى قاربالاستىڭ سايابىرسۋى بەكەر ەمەس. وتكەن جۇمادا ەكى ەلدىڭ پرەزيدەنتتەرى بەلورۋس استاناسى مينسكىدە شەكارا بويىنشا كەلىسىمگە كەلگەن ەدى. سول كەزدە نۇرسۇلتان نازاربايەۆ شيەلەنىستى رەتتەۋ ءۇشىن جول كارتاسى ازىرلەنەتىنىن ايتقان. كوپ ۇزاماي قىرعىز ۇكىمەتىنىڭ مۇشەلەرى استاناعا ۇشىپ كەلىپ، قايتا كەلىسسوز جۇرگىزۋگە ءماجبۇر بولدى. ءبىراق ءبىزدىڭ ۇكىمەتتىڭ قىرعىز ارىپتەستەرىنە قويعان بىرنەشە مىندەتى بار.

-جول كارتاسىنا قول قويىلعاننان كەيىن ءبىز كەدەندىك، سالىقتىق، ۆەتەرينارلىق، جانە فيتوسانيتارلىق باقىلاۋدى ادەتتەگىدەي تالاپتارعا ساي جۇرگىزەتىن بولامىز. قىرعىزستان تارابى اتالعان تالاپتاردى مۇقيات ورىنداۋعا مىندەتتەمە الدى. ونىڭ ۇستىنە قازىق-قىرعىز شەكاراسىنداعى احۋالدى ەۋرازيالىق ەكونوميكالىق كوميسسيا وكىلدەرى دە قاداعالايدى، - ق ر پرەمەر-مينيسترىنىڭ ءبىرىنشى ورىنباسارى اسقار ءمامين.

ال رەسمي بىشكەك ەۋرازيالىق وداقتىڭ تالاپتارىن ەندى بۇزباۋعا ۋادە بەرىپ وتىر. سوندىقتان  قازاقستان «جول كارتاسىن» قابىلداپ، شەكاراداعى شەكتەۋدى ازايتقان. ەندىگى ماسەلە قىرعىزستاننىڭ سول مويىنا العان مىندەتتەرىن قالاي ورىندايتىنىندا بوپ تۇر. سەبەبى ءبىزدىڭ ەلگە سوزىندە تۇراتىن سەنىمدى ساياسي سەرىكتەس قاجەت. نەگىزى قازاق-قىرعىز شەكاراسىنداعى داۋ ەكى اي بۇرىن باستالعان. ويتكەنى، قۇدايى كورشىمىزدىڭ كاسىپكەرلەرى ەۋرازيالىق ەكونوميكالىق وداقتىڭ كوپتەگەن تالاپتارىن بۇزدى. ءتىپتى، قىتايدان اعىلاتىن كونتراباندانى ايتپاعاندا، جالعان دەكلاراسيا تولتىرىپ، سالىقتان جالتارعانى انىقتالعان ەدى. وسىدان سوڭ قازاقستاندا تەكسەرىستى بارىنشا كۇشەيتۋگە ءماجبۇر بولدى.

ء-بىراق بۇل قازاقستان شەكاراسىن ايقارا اشىپ تاستايدى دەگەن ءسوز ەمەس.  جۇك كولىكتەرى مەن تاۋارلاردىڭ اينالىمى بۇرىنعىسىنشا تەكسەرىلە بەرەدى. ال قوس ەلدىڭ ۇكىمەتتەرى اراسىنداعى كەلىسىم الدىمەن قىرعىزدارعا وتە پايدالى. ويتكەنى بيۋدجەتىنە تۇسەتىن كىرىس قايتا كوبەيەدى.