بۇگىن پارلامەنت ءماجىلىسىنىڭ سپيكەرى نۇرلان ءنىعماتۋليننىڭ توراعالىعىمەن وتكەن جالپى وتىرىستا دەپۋتاتتار قازاقستان-تۇرىكمەن مەملەكەتتىك شەكاراسىن شەگەندەۋگە قاتىستى كەلىسىمدى راتيفيكاسيالاۋ تۋرالى زاڭ جوباسىن ماقۇلدادى دەپ حابارلايدى Qamshy.kz اقپارات اگەنتتىگى. 

وسىعان وراي، ءماجىلىس ءتوراعاسى قازاقستاننىڭ ىرگەلەس ەلدەرمەن  مەملەكەتتىك شەكاراسىن حالىقارالىق-قۇقىقتىق راسىمدەۋى تاۋەلسىزدىكتىڭ تاريحي جەتىستىكتەرىنىڭ ءبىرى سانالاتىندىعىن اتاپ ءوتتى.  

وسى رەتتە ءماجىلىس ءتوراعاسى: - ءبىز بارلىق كورشىلەرىمىزبەن كەلىسىمدەر جاسادىق، وندا بىرلەسكەن شەكارا سىزىقتارىنىڭ قالاي وتەتىنى ناقتى بەلگىلەنگەن. ەندى شەكارالاردى شەگەندەۋ جۇمىستارى جۇرگىزىلۋدە،-دەدى.

ءماجىلىس ءتوراعاسى اتاپ وتكەندەي، وسىعان سايكەس قۇجاتتاردى قول قويۋعا دايىنداۋ بويىنشا جۇمىستار ءدال قازىرگى ۋاقىتتا قىرعىزستان، وزبەكستان ەلدەرى بويىنشا قولعا الىنعان، قحر بويىنشا بۇل ءۇردىس اياقتالدى، سونداي-اق، قازاقستاندىق-رەسەيلىك شەكارالاردى شەگەندەۋ جۇمىسى جالعاسۋدا.

- ەندىگى كەزەكتە قازاقستاننىڭ بارلىق مەملەكەتتىك شەكارالارىن حالىقارالىق-قۇقىقتىق راسىمدەۋ پروسەسىن بارىنشا جەدەل ءبىتىرۋ قاجەت. ول الداعى ۋاقىتتا كەز-كەلگەن اۋماقتىق داۋلاردىڭ الدىن الۋعا مۇمكىندىك بەرەدى،-دەدى ن. نىعماتۋلين.