«ساندىق» ءداۋىردىڭ بالالارىنا ارنالعان، انا ءتىلى – قازاق تىلىندە سويلەپ جۇرگەن نەمەسە بيلينگۆيست بالالارعا قازاق ءتىلىنىڭ قولدانۋ ەرەكشەلىگىن كورسەتىپ، ودان ءارى دامىتۋىنا مۇمكىندىك بەرەتىن پلاتفورمالار از. بار بولعان جاعدايدا ساپاسى مەن مازمۇنى سىن كوتەرمەيدى. وسى رەتتە قازىرگى تەحنولوگيا مەن قازاق ءتىلىن وقىپ، دامىتۋدى ۇشتاستىرۋ ارقىلى ءبىلىم بەرۋشى مەن ءبىلىم الۋشىعا (بالاعا) ءتيىمدى ەلەكتروندىق كومەكشى قۇرال جاساۋ ماسەلەسى ءوزىنىڭ وزەكتىلىگىن تانىتىپ كەلەدى.
«balatili.kz» سايتى بالالارعا قازاق ءتىلىن ۇيرەتۋگە ارنالعان ينتەراكتيۆتى ونلاين پلاتفورما. قازاق ءتىلىن وقىپ، دامىتقىسى كەلەتىن 5 جاستان جوعارى جاسوسپىرىمدەرگە، سونىمەن قاتار بالا تاربيەسى مەن وقىتۋدى جۇزەگە اسىرۋشى تاربيەشىلەر مەن مۇعالىمدەرگە، اتا-انالارعا ارنالادى. سايت ءينتۋيتيۆتى ىزدەۋ جۇيەسى مەن ىڭعايلى كلاسسيفيكاسيالاۋ جۇيەسى بار ونلاين پلاتفورما نەگىزىندە جۇمىس ىستەيدى.
«balatili.kz» سايتىندا دىبىس پەن ءارىپ، ءسوز، ءسوز تىركەسى، سويلەم، ءماتىن، تۇراقتى ءسوز تىركەستەرىنە قاتىستى ديداكتيكالىق وقۋ ماتەريالدارى، سونىمەن بىرگە بالالاردىڭ تىلدىك، جازۋ جانە دۇرىس جازۋ، وقۋ داعدىلارىن قالىپتاستىرۋ ماقساتىنداعى وقىتۋ ماتەريالدارى قامتىلادى.
وقىتۋ مەن ويىننىڭ نەگىزىندە قۇرىلاتىن قازاق ءتىلىن وقىتۋعا باعىتتالعان كەڭىستىك جەكە نەمەسە توپپەن، ءبىلىم بەرۋ مەكەمەسىندە نەمەسە ۇيدە قولدانۋعا بولاتىن ءبىلىم بەرۋشى ينتەراكتيۆتى مۋلتيمەديالى مازمۇندى قۇرايدى.
بالانىڭ جەكە وزىندىك جۇمىس ىستەۋىنە ارنالعان جۇمىس پاراقتارى، ۇcتازدار مەن تاربيەشىلەرگە، اتا-انالارعا ادىستەمە پاراعى ۇسىنىلادى.
لينگۆوديداكتيكالىق ماقساتتارىنا سايكەس وقىتۋ ماتەريالدارى مازمۇنى مەن نىسانىنا بايلانىستى بىرنەشە توپقا توپتاستىرىلادى. ولار: «ءارىپ»، «دىبىس»، «ءسوز»، «سويلەم»، «ءسوز تىركەستەرى»، «ءماتىن»، «ساناماق»، «شىعارماشىلىق جۇمىس»، «ادىستەمەلىك بۇرىش».
قازاق ارىپتەرىنىڭ جازىلۋىنان باستاپ قازاق ءتىلىنىڭ گرامماتيكاسى مەن ورفوگرافياسىن مەڭگەرۋگە قاتىستى ماتەريالدار، سونىڭ ىشىندە ينتەراكتيۆتى الىپپە، جاس ەرەكشەلىكتەرىنە سايكەس اۋديوديكتانتتار، ينتەراكتيۆتى ويىندار، تاپسىرمالار، كالليگرافيالىق داعدىلاردى دامىتۋعا ارنالعان باستىرمالار توپتاستىرىلادى.
قازاق تىلىنە عانا ءتان ەرەكشە اتاۋلار مەن ءسوز تىركەستەرىنە قاتىستى سەمانتيكالىق تۇسىندىرمەلەرى بەرىلەدى. تۇراقتى ءسوز تىركەستەرىنىڭ مازمۇنىنا نازار اۋدارىلىپ، ولاردى قولدانۋ ەرەكشەلىكتەرىنە قاتىستى ينتەراكتيۆتى ويىندار ۇسىنىلادى.
بالالاردىڭ جاس ەرەكشەلىكتەرىنە سايكەس وقۋعا ارنالعان كوركەم ماتىندەر، سونىڭ ىشىندە قىزىقتى اڭگىمەلەر، تاقىرىپتىق ولەڭدەر، ينتەراكتيۆكە نەگىزدەلىپ جاسالعان جاڭىلتپاشتار، جۇمباقتار مەن ماقال-ماتەلدەر توپتاستىرىلادى.
سونىمەن قاتار ۇسىنىلاتىن ءماتىننىڭ مازمۇنىن ءتۇسىنىپ، مازمۇنداۋدى، مازمۇندامانى جازۋدى، تىرەك سوزدەر ارقىلى اڭگىمە قۇراستىرىپ، ءوز ويىن قالىپتاستىرۋعا كومەكتەسەتىن ارنايى تاپسىرمالار ازىرلەنەدى. بالالاردىڭ سوزدىك قورىن بايىتۋ ارقىلى قازاق ءتىلىنىڭ قازىنالى باي تىلدىك الەمىنە جەتەلەۋ، وقۋ داعدىسىن دامىتۋ، سوزدىك قورىن مولايتۋ سياقتى داعدىلاردى قالىپتاستىرۋ نەگىزگى ماقساتتى قۇرايدى.
شىعارما، ەسسە، ءماتىن ءتۇزۋ، ماتىنگە تاقىرىپ قويۋ، جازۋ ادىستەرى ۇسىنىلادى. بالالاردىڭ جاس ەرەكشەلىكتەرىن ەسكەرە وتىرىپ، باسىپ شىعارىپ الۋعا بولاتىن بوياۋعا ارنالعان سۋرەتتەر، سۋرەت سالۋدى ۇيرەتۋگە ارنالعان ماتەريالدار توپتاستىرىلادى. ولاردىڭ مازمۇنى ۇلتتىق سيپاتتا بولادى. قازاقتىڭ ۇلتتىق كيىمدەرى، ءۇي جابدىقتارى، ەتنوگرافيالىق اتاۋلار مەن ۇعىمدار، ۇلتتىق ويىن تۇرلەرى، ەتنيكالىق سيپاتتاعى ونوماستيكالىق اتاۋلار، ت.ب. تاقىرىپتارىن قامتيدى.
جالپى لينگۆيستيكالىق ماسەلەلەرگە قاتىستى، بالالاردىڭ وي- ءورىسى مەن ءسوز بايلىعىنىڭ دامۋىنا، ازامات رەتىندە قالىپتاسۋىنا، تاربيەگە قاتىستى ارنايى مامانداردىڭ ماقالالارى، عىلىمي ەڭبەكتەرى، سونىمەن قاتار بالاباقشا مەن باستاۋىش سىنىبىنىڭ مۇعالىمدەرىنە كومەكشى قۇرالدار، ساباق جوسپارلارى جاريالانىپ وتىرادى.
