رەسەي بيلىگى جەلتوقسان ايىنىڭ باسىنان باستاپ، ءنوۆوسىبىر وبلىسىنا قازاقستان مەن قىرعىزستاننان كەلگەن ونداعان توننا جەمىس-جيدەك پەن كوكونىستى وتكىزبەي قويعاندىعى تۋرالى مالىمدەدى. ءنوۆوسىبىر وبلىسىنىڭ ۆەتەرينارلىق جانە فيتوسانيتارلىق قىزمەت باسشىلىعى «كاراسۋك» پوستىندا 76 توننا تاۋاردىڭ تالاپتارعا سايكەس كەلمەيتىندىگىن ايتتى، دەپ Qamshy.kz اقپارات اگەنتتىگى ازاتتىققا سىلتەپ جازادى. 

باسشىلىقتىڭ حابارلاۋىنشا، قازاقستاننان كەلگەن پياز بەن قىرعىزستاننان كەلگەن قۇرما، الما، قاۋىننىڭ جالپى 55،7 تونناسىنىڭ قاپتاماسىندا تاڭباسى جوق. ال قىرعىزستاندىق كەپتىرىلگەن شيە، جاڭا پىسكەن ايۆا مەن قۇرما، قىزىل كۇرىش، قازاقستاندىق قاراقات، انار، جاڭعاق، سونىمەن قوسا قىتايلىق ماندارين مەن ءجۇزىمنىڭ 69 كيلوگراممىنىڭ  فيتوسانيتارلىق سەرتيفيكاتى بولماعان. وسى سەبەپتى اكەلىنگەن تاۋار قايتا قايتارىلاتىن بولادى.  

قازاقستاننان كەلگەن 36 كيلوگرامم جاڭا پىسكەن المۇرتتى قىزمەت باسشىلىعى مەحانيكالىق جولمەن جويىپ جىبەرگەن. ويتكەنى ونىڭ فيتوسانيتارلىق سەرتيفيكاتى بولماعان.