رەسپۋبليكا سارايىندا قازاقستان رەسپۋبليكاسىنىڭ تاۋەلسىزدىك كۇنىن مەرەكەلەۋگە ارنالعان سالتاناتتى جيىن ءوتتى. القالى شارا بارىسىندا مەملەكەت باسشىسىنىڭ جارلىعىنا سايكەس ەلىمىزدىڭ دامۋىنا ەلەۋلى ۇلەس قوسقان الماتىلىقتارعا مەملەكەتتىك ماراپاتتار تاپسىرىلدى.

الماتى اكىمى باۋىرجان بايبەك مەملەكەت باسشىسىنىڭ سارابدال ساياساتى مەن باتىل شەشىمدەرىنىڭ ارقاسىندا قازاقستان دامۋدىڭ داڭعىل جولىنا تۇسكەنىن اتاپ ءوتتى. ۋاقىتتىڭ ءوزى ەلباسىنىڭ «الدىمەن ەكونوميكا، سودان سوڭ ساياسات» قاعيداسىنىڭ زاماننىڭ تالابىن ءدوپ باسىپ، ەلىمىزدىڭ دامۋىنا زور سەرپىلىس بەرگەنىن دالەلدەدى.

«تاۋەلسىزدىك جىلدارى قازاقستان ەكونوميكاسى 20 ەسەگە ارتتى. جالپى كولەمى 10 مىڭ شاقىرىمنان استام جول سالىندى، جوندەلدى، 120 ملن. شارشى مەتر تۇرعىن ءۇي سالىنىپ، 1 ميلليوننان استام وتباسى باسپانالى بولدى. 15 جىلدا ورتاشا جالاقى مەن زەينەتاقى 10 ەسەگە ارتتى. قازىرگى كەزدە ءبىزدىڭ باستى مىندەتىمىز - الەمنىڭ دامىعان 30 ەلىنىڭ قاتارىنا ەنۋ. ونىڭ نەگىزى مەملەكەت باسشىسى جۇرگىزىپ وتىرعان ساياسي، ەكونوميكالىق جانە رۋحاني جاڭعىرۋ. جاھاندانۋ عاسىرىندا ەلباسىنىڭ «رۋحاني جاڭعىرۋ» باعدارلاماسى حالقىمىزدىڭ بار بولمىسىن، رۋحاني قۇندىلىقتار مەن مۇرانى ساقتاپ، تاۋەلسىزدىگىمىزدى باياندى ەتۋگە ىقپال ەتەتىن بولادى»، - دەدى ب.بايبەك.

الماتى اكىمى ەلباسىنىڭ باستاماسىمەن جۇزەگە اسىپ جاتقان مەملەكەتتىك باعدارلامالاردىڭ وڭىرلىك ەكونوميكا مەن ەڭبەكپەن قامتۋعا زور سەرپىلىس بەرگەنىن اتاپ ءوتتى. تەك بيىلدىڭ وزىندە عانا الماتىدا 20 مىڭ ادام جۇمىسقا تارتىلدى، كوشەلەر مەن سكۆەرلەردى قايتا جاساۋعا 43 مىڭ ادام قاتىستى.

«نۇرلى جول» باعدارلاماسى ەلىمىزدىڭ وڭىرلەرىن كۇرەتامىر جولدارمەن جالعاپ، ازاماتتاردىڭ ىسكەرلىك بەلسەندىلىگىن، ەلىمىزدىڭ ينۆەستيسيالىق تارتىمدىلىعىن ارتتىردى. ءوز كەزەگىندە «نۇرلى جەر» باعدارلاماسى حالىقتىڭ جەڭىلدىكپەن ءۇي الۋىنا مۇمكىندىك بەردى. قالادا 14 مىڭنان استام پاتەر سالىناتىن بولسا، سونىڭ 5880 پاتەرى بيىل ىسكە قوسىلدى.بۇل 2016 جىلمەن سالىستىرعاندا 3 ەسەگە ارتىق. وسى باعدارلامالاردىڭ ارقاسىندا جاڭا جۇمىس ورىندارى اشىلدى، ازاماتتاردىڭ تابىسىن كوەرۋگە وڭ سەرپىن بەرىلدى، قوسىمشا سالىق تۇسىمدەرى قامتاماسىز ەتىلدى»، - دەدى ب.بايبەك.

الماتى اكىمى حالىقارالىق زەرتتەۋلەر قورىتىندىسى بويىنشا 2030 جىلعا قاراي الەمدىك ەكونوميكا فلاگماندارى وڭتۇستىك – شىعىس ازيا ەلدەرى، اسىرەەسە جۇڭگو مەن ينديا بولاتىنىن جەتكىزدى. وسىلايشا، الەمدىك ەكونوميكانىڭ دامۋ تەتىكتەرى شىعىسقا قاراي ىعىسۋدا. ءوز كەزەگىندە الماتى جاھاندىق باسەكەگە قابىلەتتى نارىعى بار ورتا ازياداعى ەكونوميكاسى ەڭ قارقىندى دامىعان قالاعا اينالدى ءارى وڭتۇستىك كورەيا، جاپونيا، جۇڭگو سىندى ەلدەردىڭ ينۆەستيسيالارى تارتىلعان. ال بۇل الماتىنىڭ سينگاپۋر جانە گونكونگ سياقتى ۇلكەن ينۆەستيسيالىق الەۋەتكە يە ەكەنىن كورسەتەدى.

«بۇگىنگى كۇنى الماتى – ىسكەرلىك ورتالىق، بيزنەس جۇرگىزۋگە قولايلى قالا، ورتا ازياداعى قالىپتاسقان ءىرى وڭىرلىك ماگنيت. مەملەكەت باسشىسىنىڭ تاپسىرماسى بويىنشا كەپتەلىس ماسەلەسىن شەشۋگە ىقپال ەتەتىن سوماسى 500 ميللياردتان استام تەڭگەنى قۇرايتىن ۇلكەن الماتى اينالما اۆتوكولىك (باكاد) جولىنىڭ قۇرىلىسى باستالادى. بۇل جوبا باتىس ەۋروپا- باتىس جۇڭگو كۇرەتامىر جولىنا قوسىلىپ، مىڭ جىلدىق تاريحى بار قالامىزدىڭ ۇلى جىبەك جولىنداعى ساۋدا ورتالىعى رەتىندەگى مارتەبەسىن قايتا جاڭعىرتادى»، - دەپ اتاپ ءوتتى قالا باسشىسى.

سالتاناتتى جيىن بارىسىندا ەلىمىزدىڭ دامۋىنا ەلەۋلى ۇلەس قوسقان الماتىلىقتارعا مەملەكەتتىك ماراپاتتار تاپسىرىلدى. مەملەكەت باسشىسىنىڭ جارلىعىنا سايكەس بيىلعى جىلى 70-تەن استام الماتىلىق مەملەكەتتىك جوعارى ماراپاتقا يە بولدى. ولاردىڭ ۇشتەن ءبىرى - ءبىلىم، دەنساۋلىق ساقتاۋ، مادەنيەت سپورت پەن الەۋمەتتىك قورعاۋ سىندى الەۋمەتتىك سالا وكىلدەرى، بەستەن ءبىرى – بيزنەس پەن ءوندىرىس ورىندارىنىڭ وكىلدەرى، 18% – مەملەكەتتىك قىزمەتكەرلەر،15% – قۇرىلىسشىلار. ازاماتتىق قوعام مەن ب ا ق وكىلدەرى دە جوعارى ماراپاتتى يەلەندى.

مىسالى، «پاراسات» وردەنىمەن قازاقستان رەسپۋبليكاسىنىڭ ءانۇرانىن تۇڭعىش ورىنداۋشى سارا تىنىشتىعۇلوۆا ماراپتتالدى. «II دارەجەلى دوستىق» وردەنىن مەملەكەت جانە قوعام قايراتكەرى، ورتا ازيا ۋنيۆەرسيتەتىنىڭ پرەزيدەنتى جۇماتاي الييەۆ الدى.

«قۇرمەت» وردەنىمەن «مەن الماتىلىقپىن» قوعامدىق قوزعالىسىنىڭ نەگىزىن قالاۋشى كونستانتين اۆەرشين، سۋرەتشى اماندوس اقانايەۆ، ءانشى ءمادينا ءسادۋاقاسوۆا،«ورتالىق كلينيكالىق اۋرۋحانا» اق اۋرۋحانالار بىرلەستىگىنىڭ مەڭگەرۋشىسى سەرگەي شيللەر ماراپاتتالدى.

«ءىىى دارەجەلى«ەڭبەك دانقى» وردەنى «اقساي» نانبولكەكومبيناتى» ج ش س نان-بولكە ونىمدەرىن دايارلاۋشى رۋشانگۇل گايتوۆاعا،«كاستينگ» ج ش س ەلەكتروليز سۇيىقتىعى سەحىنىڭ ەلەكتروليزنيگى الەكساندر زەيبەلگە بەرىلدى.

«قازاقستاننىڭ ەڭبەك سىڭىرگەن قايراتكەرى» اتاعىن «سىمبات» ءسان اكادەمياسىنىڭ ارت-ديرەكتورى بالنۇر اسانوۆا يەلەندى. قازاقستان رەسپۋبليكاسىنىڭ قۇرمەت گراموتاسىمەن №134 ليسەيدىڭ حيميا ءپانىنىڭ ءمۇعالىمى، 30 جىلدىق ەڭبەك ءوتىلى بار پەداگوگ يرينا نەستەرەنكو ماراپاتتالدى.