25 جەلتوقسان كۇنى  ورتالىق كوممۋنيكاسيالار قىزمەتىندە «Qazaqstan» ۇلتتىق تەلەارناسىنىڭ جاڭا جىلعا دايىنداعان باعدارلامالارىنىڭ تانىستىرىلىمى ءوتتى، دەپ حابارلايدى Qamshy.kz اقپارات اگەنتتىگى.

مەرەكە قارساڭىنداعى اپتا ماڭگىلىك ماحاببات جايلى اڭىز نەگىزىندە تۇسىرىلگەن «قوزى كورپەش-بايان سۇلۋ» اتتى 6 ءبولىمدى كوركەم تەلەحيكايانىڭ تۇساۋكەسەرىنەن باستالادى. 25-29 جەلتوقسان ارالىعىندا كۇندەلىكتى ساعات 21.45-تە ۇلتتىق ارنا كورەرمەندەرى قازاق مادەنيەتى مەن ونەرىنىڭ ۇلى مۇراسىنىڭ ەكرانيزاسياسىن تاماشالاي الادى. تەلەحيكايانىڭ باس پروديۋسەرى – بايان ماقسات قىزى. سەناريي اۆتورى – اننەس باعدات. باستى رولدەردى گۇلزادا تۇرلاش، ەرجان مۇقاتايەۆ، باقتيار قوجا، جاقسىبەك قۇرمانبەكوۆ پەن مارات ءاباي-دىلدا سىندى اكتەرلەر سومدادى.

سەنبى كۇنى، 30 جەلتوقساندا، ساعات 20.00-دە، بىرنەشە اي بويى كورەرمەندەرگە كاسىپكەرلىكتىڭ قىر-سىرىن اشىپ، بيزنەستىڭ وڭتايلى جولىن كورسەتكەن «ۇمىتكەر» رەاليتي-شوۋىنىڭ اقتىق شىعارىلىمى وتەدى. 5 ميلليون تەڭگە كولەمىندەگى سىي كىمگە بۇيىراتىنىنا ۇلتتىق ارنا كورەرمەندەرى كۋا بولادى.

سونداي-اق، جاڭا جىلدىق ەفير ازىلگە تولى جوبالارمەن تولىقتىرىلماق. 30 جەلتوقسان ساعات 11.30-دا باستالاتىن «ءازىل الەمى» باعدارلاماسى كورەرمەندەرگە كوتەرىڭكى كوڭىل-كۇي سىيلايدى. ال جەكسەنبى كۇنى، ساعات 14.10-دا تانىمال «تاماشا» ءازىل تەاترىنىڭ 90-شى جىلدارى تۇسىرىلگەن ەڭ ۇزدىك توپتامالارى كورەرمەنگە جول تارتادى. جاڭا جىل قارساڭىندا، 31 جەلتوقسان كۇنى، ساعات 17.55-تە ەلىمىزدىڭ تانىمال ۆاينەرلەرى، ۆيدەوبلوگەرلەرى مەن قوعام قايراتكەرلەرىنىڭ قاتىسۋىمەن وتەتىن ارنايى «حا-حا شوۋ: جاڭا جىل 2018» جوباسى كورسەتىلەدى.

حالىق اندەرى مەن كۇيلەرىن ءسۇيىپ تىڭدايتىن كورەرمەندەر 30 جەلتوقسان، ساعات 15.40-تا «مەن قازاقپىن» حالىقارالىق مەگاجوباسىنىڭ گالا-كونسەرتىنىڭ قايتالاۋى مەن مەرەكەلىك كونسەرتتەردى تاماشالاي الادى.

ال، 31 جەلتوقسان ساعات 22.30-دا تانىمال  شوۋ-بيزنەس جۇلدىزدارىنىڭ قاتىسۋىمەن جاڭا جىلدىق سيقىرعا تولى «سىڭعىرلاعان سيقىرلار» مەرەكەلىك شوۋ-باعدارلاماسى ەفيرگە جول تارتادى.  اتالمىش جوباعا: كامشات جولدىبايەۆا، ايگۇل يمانبايەۆا، بۇركىت، ءالي وقاپوۆ، ايقىن تولەپبەرگەنوۆ، كەش You، قانات ۇمبەتوۆ، ءاليا ابىكەن، تورەعالي تورەالى، ولجاس اباي جانە «Qazaqstan» ارناسىنىڭ تانىمال جۇرگىزۋشىلەرى جانسەرىك بەيسەيەۆ، ايسۇلۋ رىسپانوۆا، يرينا تەن، بايان باقكەلدى قىزى، نارتاي ارالباي ۇلى قاتىسادى.

ەڭ كىشكەنتاي تەلەكورەرمەندەرىمىز ءۇشىن 31 جەلتوقسان ساعات 12.35-تە ايگىلى  «Walt Disney» كينوكومپانياسىنىڭ  قازاق تىلىندە دۋبلياجدالعان «راپۋنسەل» ءمۋلتفيلمى كورسەتىلەتىن بولادى.