بۇگىن ءماجىلىستىڭ جالپى وتىرىسىندا پالاتا ءتوراعاسى نۇرلان نىعماتۋلين سەسسيا باستالعاننان بەرگى ءتورت اي ىشىندە اتقارىلعان جۇمىستارعا توقتالىپ، دەپۋتاتتاردىڭ ايماقتارعا ساپارلارىنا باسا نازار اۋداردى دەپ حابارلايدى Qamshy.kz اقپارات اگەنتتىگى.    

— ءبىزدىڭ   جاڭا  جىلداعى  جۇمىسىمىز  ادەتتەگىدەي  سايلاۋشىلارمەن كەزدەسۋدەن باستالادى. بۇل حالقىمىز ۇشىنشدە، ءبىز  ءۇشىن دە وتە ماڭىزدى، وتە   قاجەتتى  شارالار. سەبەبى، ەلباسىمىز بىزگە ءارقاشاندا حالىقپەن تىكەلەي جۇمىس جاساپ، ەلىمىزدى جاڭعىرتۋ ماقساتتارىن ءتۇسىندىرۋ تۋرالى ناقتى تاپسىرمالار بەرىپ كەلەدى. سوندىقتان، ءاربىر اۋىلعا بارىپ، بارلىق باستامالاردى جانە ولاردى زاڭ جاعىنان قولداۋ جۇمىستارىن  ازاماتتارعا  جەتكىزۋ، ول - ءبىزدىڭ باستى مىندەتىمىز. سول ءۇشىن  ءماجىلىس  بيۋروسىنىڭ  ارنايى  شەشىمى  قابىلدانىپ،  دەپۋتاتتاردىڭ  ايماقتارعا  ساپارى  جوسپارلانىپ وتىر» - دەدى ن. نىعماتۋلين.

پالاتا ءتوراعاسى اتاپ وتكەندەي ءماجىلىس قىزمەتى ەلباسى نۇرسۇلتان ءابىش ۇلى نازاربايەۆتىڭ اعىمداعى سەسسيانىڭ اشىلۋىندا جۇكتەگەن مىندەتتەرىن زاڭنامالىق تۇرعىدان  قامتاماسىز ەتۋگە باعىتتالدى.

سەسسيا باسىندا 80 زاڭ جوباسى جۇمىسقا قابىلدانىپ، ونىڭ 42ء-سى قارالىپ، ماقۇلدانعان.  ونىڭ ىشىندە 12 زاڭ جوباسىنا دەپۋتاتتار وزدەرى باستاماشى بولعان. پارلامەنت قابىلداعان 27 زاڭعا بۇگىندە مەملەكەت باسشىسىنىڭ قول قويىلىپ، ءوز كۇشىنە ەندى.  

اعىمداعى سەسسيا جۇمىسىندا ءماجىلىس ءتوراعاسى «2018-2020 جىلدارعا ارنالعان رەسپۋبليكالىق بيۋدجەت تۋرالى»، سالىق كودەكسى، كەدەندىك رەتتەۋ، سونداي-اق، قازاقستاننىڭ كەيبىر كونستيتۋسيالىق زاڭدارىنا وزگەرىستەر ەنگىزۋ، اكىمشىلىك قۇقىق بۇزۋشىلىق جانە اقپارات جانە كوممۋنيكاسيا تۋرالى زاڭداردىڭ جوبالارى مەن «جەر قويناۋى جانە جەر قويناۋىن پايدالانۋ تۋرالى» كودەكس جوباسى سياقتى ماقۇلدانعان ءبىرقاتار ماڭىزدى قۇجاتتاردى اتاپ ءوتتى. 

ءسوز سوڭىندا نۇرلان نىعماتۋلين دەپۋتاتتاردى كەلە جاتقان جاڭا جىل مەرەكەسىمەن قۇتتىقتاپ، ەلىمىزگە تىنىشتىق، ءاربىر وتباسىنا اماندىق تىلەدى.