جەمقورلىق پەن پاراقورلىق الەمدىك دەڭگەيدە ۇلكەن ماسەلەگە اينالىپ وتىر. مەملەكەت ەكونوميكاسىنىڭ بەرەكەسىن قاشىراتىن ىندەت دەسە دە بولار. قازىرگى تاڭدا قوعامدا بەلەڭ الىپ تۇرعان بۇل ماسەلەنى بولدىرماۋ ءۇشىن بيلىك تە، جەكە ادامنىڭ ءوزى دە اتسالىسۋى قاجەت. ءتىپتى مەملەكەت باسشىسى نۇرسۇلتان نازاربايەۆتىڭ ءوزى «جەمقورلىققا قارسى كۇرەستىڭ كۇشەيەتىنىن ايتقان. الايدا سول جەمقورلىق ارەكەتتەن بيلىكتەگى، مينيسترلىكتەگى شەنەۋنىكتەردىڭ ءوزى باس تارتپاي وتىر. 2017 جىلدىڭ وزىندە بىرنەشە لاۋازىمدى قىزمەت يەلەرى پارا بەرۋ، پاپا الۋ ءىسى بويىنشا ۇستالدى. Qamshy.kz اقپارات اگەنتتىگى 2017 جىلى پارامەن نەمەسە باسقا دا قىلمىستىق ىستەر بويىنشا ۇستالعان شەنەۋنىكتەردى ءتىزىپ شىقتى.

جەمقورلىق بويىنشا ۇستالعاندار

 قۋاندىق بيشىمبايەۆ

2016 جىلدىڭ مامىرىندا ۇلتتىق ەكونوميكا ءمينيسترى بولعان قۋاندىق بيشىمبايەۆ جىلى ورنىندا ۇزاق وتىرعان جوق. 1 جىلدان كەيىن-اق مينيستر قاماۋعا الىندى. ونىڭ سەبەبى – جەمقورلىق.

2017 جىلدىڭ قاڭتارىندا قۇ ۇلتتىق ەكونوميكا مينيسترلىگىن باسقارعان قۋاندىق بيشىمبايەۆتىڭ ۇستالعانى حابارلاندى. «بيشىمبايەۆ توپ بولىپ، الدىن الا كەلىسىم جاساۋ ارقىلى اسا ءىرى كولەمدە بىرنەشە رەت پارا الىپ وتىرعان. زاڭسىز العان قاراجاتتى بيشىمبايەۆ ءوز قاجەتىنە جاراتقان»، - دەپ حابارلاعان سول ۋاقىتتا جەمقورلىققا قارسى قىزمەتتىڭ وكىلدەرى. ءسويتىپ بيشىمبايەۆ ق ر قپك 128-بابىنا سايكەس، استانا قالالىق ءىىد ۋاقىتشا ۇستاۋ وقشاۋلاعىشىنا قامالدى. كەيىن ونىڭ 15 جىلعا سوتتالۋى مۇمكىن ەكەنى ايتىلدى.

قازاندا بيشىمبايەۆ قىلمىستىق ءىس بويىنشا 1،2 ملرد تەڭگە كولەمىندە وتەماقى تولەدى. الايدا تەرگەۋ جۇمىستارى ءالى دە جالعاسىپ جاتىر، ناقتى ۇكىم شىققان جوق.

نۇرلان مولداتايەۆ

41 ميلليون تەڭگە جىمقىردى دەگەن كۇدىكپەن قاراشادا «قازاقاۆتوجول» رمك قوستاناي وبلىستىق فيليالىنىڭ باسشىسى نۇرلان مولداتايەۆ ۇستالدى.

سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ قوستاناي وبلىسىنداعى دەپارتامەنتى ق ر قك 189-بابى 4ء-بولىمى 2-تارماعىندا (اسا ءىرى كولەمدە جىمقىرۋ) قاراستىرىلعان قىلمىستى جاسادى دەگەن كۇدىكپەن مولداتايەۆ رۋدنىي قالاسىنداعى ۋاقىتشا ۇستاۋ اباقتىسىنا قامالعان.

قانات سۇلتانبەكوۆ

«قازاقستان ينجيرينگ» باسقارما ءتوراعاسىنىڭ بۇرىنعى ورىنباسارى قانات سۇلتانبەكوۆ تە پارا الدى دەگەن كۇدىكپەن قاماۋعا الىنعان.

ول قىلمىستىق قۇقىق بۇزۋشىلىق جاساعانى ءۇشىن ق ر قىلمىستىق كودەكسىنىڭ 366-بابىنىڭ 4-بولىگى بويىنشا («پارا الۋ») ايىپتالدى. ءار ءتۇرلى جەتەكشىلىك قىزمەتتەرى بارىسىندا سۇلتانبەكوۆ 1 ملرد تەڭگە كولەمىندە پارا العان. 2017 جىلدىڭ 4 جەلتوقسانىندا جەمقورلىققا قاتىستى قىلمىسى ءۇشىن ول 10 جىلعا باس بوستاندىعىنان ايىرىلدى.

قانات سۇلتانبەكوۆ "قازاقستان ينجينيرينگ" ۆيسە-پرەزيدەنتى قىزمەتىن 2015 جىلعى اقپاننان باستاپ اتقارعان.

راشيد امانجولوۆ 

ساۋىردە سوت «ازاماتتارعا ارنالعان ۇكىمەت» مەملەكەتتىك كورپوراسياسى باسقارما ءتوراعاسىنىڭ ورىنباسارى راشيد امانجولوۆتى قاماۋعا الۋ تۋرالى سانكسيا بەرگەن.

الايدا قانداي باپ بويىنشا ايىپتى بولعانى حابارلانبادى. تەك مامىردا ۇلتتىق قاۋىپسىزدىك كوميتەتى راشيد امانجولوۆقا قاتىستى ق ر قىلمىستىق كودەكسىنىڭ 367-بابىنىڭ 4-بولىگى بويىنشا – «پارا بەرۋ» سوتقا دەيىنگى تەرگەۋ جۇمىستارىن جۇرگىزىپ جاتقانىن مالىمدەدى.

لاريسا پاك

3 شىلدە، جەمقورلىققا قارسى قىزمەت دەنساۋلىق ساقتاۋ مينيسترلىگى فارماسيا كوميتەتىنىڭ ءتوراعاسى قىزمەتىن اتقارۋشى ل.پاكتى، پاۆلودار وبلىسى بويىنشا فارماسيا دەپارتامەنتى جەتەكشىسى ز.قاجىنوۆانى، فارماسيا كوميتەتىنىڭ وڭتۇستىك قازاقستان وبلىسى بويىنشا باس مامانى پ.يمامحودجايەۆتى جانە باس ساراپشى د.يبرايەۆانى جۇيەلى تۇردە جالپى سوماسى 10 ملن تەڭگەدەن اساتىن پارا العانى ءۇشىن ۇستادى.
2017 جىلدىڭ 30 قاراشاسىندا استانا قالاسى الماتى اۋدانىنىڭ №2 اۋداندىق سوتىندا لاريسا پاكقا قاتىستى ۇكىم شىعاردى. ول 2018 جىلدىڭ 4 قاڭتارىنا دەيىنگى ۋاقىتتا ءۇي قاماقتا وتىرادى.

مەملەكەتتىك قۇپيانى زاڭسىز جاريا ەتكەن

باعلان مايلىبايەۆ

2017 جىلدىڭ قاڭتارىندا ق ر پرەزيدەنت اكىمشىلىگىنىڭ بۇرىنعى قىزمەتكەرلەرى ۇستالدى. ول ق ر قىلمىستىق كودەكسى 185-بابى 1،3-بولىگىنە سايكەس («مەملەكەتتىك قۇپيالاردى زاڭسىز جيناۋ، تاراتۋ، جاريا ەتۋ» قىلمىستاردى جاسادى دەگەن كۇدىكپەن قاماۋعا الىنعان.

ق ر قىلمىستىق-پروسەستىك كودەكسىنىڭ 128-بابىنا سايكەس ۇقك تەرگەۋ يزولياتورىنا قاماۋعا الىندى.

اقشا جىمقىرعان

رۋسلان ەردەنايەۆ

2017 جىلدىڭ قاڭتارىندا بجزق باسقارما ءتوراعاسى رۋسلان ەردەنايەۆقا وزگەنىڭ مۇلكىن زاڭسىز يەلەنىپ، ءوز قاجەتىنە جۇمسادى دەگەن كۇدىك تاعىلدى. كۇدىككە ىلىككەندەر ەكى ايعا قاماۋعا الىندى.  ودان بولەك، "بزجق" قارجى تاۋەكەلى باسقارماسىنىڭ باسشىسى م.بازتوۆقا، "الاتاۋمۇنايالتىن" اق قاداعالاۋ كەڭەسىنىڭ ءتوراعاسى ب.كەنجەبايەۆقا، «بۋزگۋل اۋرۋم» ج ش س ديرەكتورى  ا. نايزاعارينعا قاتىستى سانكسيالاۋ شارالارى قولدانىلدى.

قاراشادا سوتقا دەيىنگى تەرگەۋ بارىسىندا ەردەنايەۆتىڭ ءوز كىناسىن مويىنداپ، بولعان ىسكە وكىنىش بىلدىرگەنى حابارلانعان.

رۋسلان ەردەنايەۆ مەملەكەتكە 5 ميلليارد شىعىن كەلتىرگەنى جانە پارا العانى ءۇشىن ايىپتالىپ وتىر.

ماكسيم كاساتكين

قارجىنى جىمقىرۋ فاكتىسى بويىنشا ۇستالعانداردىڭ قاتارىندا «سك-فارماسيانىڭ» باسقارما ءتوراعاسى ماكسيم كاساتكين دە بار.

رەسمي دەرەكتەرگە سۇيەنسەك، كاساتكين تەندەر كەزىندە "كازسيبفارماسەيا" كومپانياسىنىڭ مۇددەسى ءۇشىن باسقا باسەكەلەستەردىڭ وتىنىشتەرىن قايتارىپ وتىرعان. "كازسيبفارماسەيا" كومپانياسى دارى-دارمەكتەردى دەنساۋلىق ساقتاۋ مينيسترلىگى بەكىتكەن ەڭ جوعارعى 15 پايىزدىق كوتەرمە باعادان قىمباتقا ساتقان.

تەرگەۋ بولجامىنشا، "سك-فارماسيا" مەن كازسيبفارماسيا" باسشىلارى 2015 جىلدان باستاپ 1،8 ميلليارد تەڭگەدەن استام قارجى جىمقىرعان.

ەسكەندىر ەرىمبەتوۆ

2017 جىلدى «بتا بانكى ءىسى» بويىنشا ءتورت ادام قاماۋعا الىندى. كوررۋپسياعا قارسى ءىس-قيمىل ۇلتتىق بيۋروسىنىڭ اقپاراتى ە.ەرىمبەتوۆ، ۆ.سوكولەنكو، د.پەستوۆ جانە م.زوروۆتى ۇلتتىق بيۋرو مەن ۇقك-نىڭ ۆەدومستۆوارالىق جەدەل تەرگەۋ توبى 13 قاراشادا ۇستاعانىن حابارلادى.

ۇستالعاندارعا قاتىستى "بتا بانكى" باسشىلىعىنىڭ ارىزىمەن قىلمىستىق كودەكستىڭ 189-بابى ("جىمقىرۋ") جانە 193-بابى ("زاڭداستىرۋ") بويىنشا سوتالدى تەرگەۋ ءىسى باستالعان. "بتا بانك" ءتورت ازاماتتى بانكتىڭ بۇرىنعى باسشىسى مۇحتار ءابليازوۆ "جىمقىرعان 500 ميلليون دوللاردان استام قارجىنى" "جىلىستاتىپ، زاڭداستىرۋعا قاتىسى بار" دەپ كورسەتكەن.

تەرگەۋشىلەر بۇعان قوسا ە.ەرىمبەتوۆتى "ءوزىنىڭ "SKY SERVISE" كومپانياسى ارقىلى 1 ميلليارد تەڭگە بيۋدجەت قارجىسىن جىمقىردى" دەپ كۇدىكتەنگەن.