"سەن تاماق ىشپەي دە ءومىر سۇرە الاسىڭ!"  "تاماق ءىشۋ ساعان قاجەت ەمەس!" "كۇندە تاڭەرتەڭ: مەن بۇگىن كەشەگىگە قاراعاندا سۇلۋمىن، جەڭىلىرەكپىن دەگەن ويمەن ويان"، "انورەكسيا — سەنىڭ جان قۇربىڭ، ول تۋرالى ەشكىمگە ءتىس جارما". مىنە، ءدال وسىنداي تىركەستەر مەن سويلەمدەردى الەۋمەتتىك جەلىلەردەگى توپتار مەن قوعامداستىقتاردان ءجيى كەزدەستىرۋگە بولادى. مۇنداي توپتاردىڭ مىڭداعان وقىرماندارى بار. بۇل توپتاردىڭ باستى ماقساتى — جاس قىزداردى انورەكسيا اۋرۋىنا شالدىعىپ، تاماق ىشۋدەن سانالى تۇردە باس تارتۋلارىنا اسەر ەتۋ.

انورەكسيا —ادام سانالى تۇردە تاماقتانۋدان باس تارتاتىن پسيحولوگيالىق اۋىتقۋ. مۇنداي اۋرۋمەن اۋىراتىندار كوبىنە جاس جەتكىنشەكتەر. كوپ جاعدايدا مۇنداي ادامدار 40 جاسقا جەتپەي اجال قۇشادى. جاس قىزدار سالماقتارى 40 كەلىدەن اسپاۋ ءۇشىن بارلىق نارسە جاساۋعا دايىن. باستى ماقسات – 30 كەلىگە سالماق قا جەتۋ.

بۇگىنگى تاڭدا پروبلەماعا اينالىپ وتىرعان ماسەلە جاس قىزداردىڭ سانبيكەگە ۇقساعىسى كەلىپ، ءوز دەنساۋلىقتارى مەن تاندەرىنە زارداپ كەلتىرۋى.  Qamshy.kz اقپارات اگەنتتىگى اتالمىش اۋرۋدىڭ الدىن-الۋ ماقساتىندا انورەكسياعا ۇشىراعان جاس قىزداردىڭ وقيعالارىن ءبولىسۋدى ءجون كوردى.

مارگو. 20 جاستا. بويى 174 سم. سالماعى-35 كەلى.

ماعان: بىرنەشە كەلى سالماق تاستاپسىڭ عوي! دەگەن تانىسىمنىڭ ايتقان سوزىنەن كەيىن ارىقتاي باستادىم. ءىش وتكىزەتىن ءدارى ءىشتىم. ءبىراز ۋاقىتتان كەيىن ءدارىنى قولدانۋ تەرىمە كەرى اسەرىن تيگىزدى.

ءقازىر جاس قىز ءدارى ءىشۋدى توقتاتتى. الايدا، كەيدە بىر-ەكى داناسىن ءىشىپ تۇرادى ەكەن.

داشا. 18 جاستا. 38 كەلى، بويى-171 سم.

داشا انورەكسيا اۋرۋىمەن 5 جىل بويى كۇرەسىپ كەلەدى. ەكى رەت اۋرۋحانادا جاتىپ ەمدەلگەن. قازىرگى ۋاقىتتا پسيحوتەراپيا كۋرستارىن قابىلداپ ءجۇر.

تانيا. 18 جاستا. سالماعى-43 كەلى، بويى 171سم.

تانيانىڭ ارىقتاعىسى كەلمەگەن. الايدا، اتا-اناسىنىڭ اجىراسۋى مەن ەكى ءۇي جانۋارىنىڭ ءولىمى ونى دەپرەسسياعا تۇسىرگەن. تاماق ىشپەي، اش ءجۇرىپ 38 كەلىگە دەيىن ارىقتاعان. كۇنىنە 40 تال ءدارى ىشكەن ەكەن.

جەنيا. 19 جاستا. 43 كەلى، بويى-165 سم.

جاس قىز باستاپقىدا 90 كەلى بولعان. وسى سالماقتان قازىرگى سالماعىنا دەيىن ارىقتاعان. ءارتۇرلى ديەتاعا وتىرىپ، ارىقتاۋ ءۇشىن ءتۇرلى ادىس-تاسىلدەردى قولدانعان، ءدارى ىشكەن. كۇنىنە ەكى قوراپ ءىش وتكىزگىش ءدارى ىشكەن ۋاقىتتارى بولعان.