«ازاماتتىق باستامالاردى قولداۋ ورتالىعى» كوممەرسيالىق ەمەس اكسيونەرلىك قوعامى ق ر ءدىن ىستەرى جانە ازاماتتىق قوعام مينيسترلىگىنىڭ قولداۋىمەن ازاماتتىق باستامالاردى قولداۋ، ازاماتتىق قوعام ينستيتۋتتارىنىڭ الەۋمەتتىك دامۋ سالاسىنىڭ وزەكتى ماسەلەلەرىن شەشۋ ءۇشىن الەۋەتىن كوتەرۋ ماقساتىندا ۇكىمەتتىك ەمەس ۇيىمدارعا ارنالعان مەملەكەتتىك گرانتتاردى تاعايىنداۋعا بايقاۋ جاريالادى، دەپ جازادى Qamshy.kz اقپارات اگەنتتىگى.

بايقاۋعا مۇلىكتى يەلەنۋ جانە (نەمەسە) ولاردىڭ ەكونوميكالىق قىزمەتى توقتاتىلعان، قارجىلىق تۇرعىدا قابىلەتسىز دەپ تانىلعان (بانكروت دەپ تانىلعان)  ۇەۇ-دى قوسپاعاندا، ۇەۇ-دىڭ دەرەكتەر بازاسىندا ءتيىستى مالىمەتتەرى قامتىلعان، گرانتقا ءوتىنىم بەرگەن قوعامدىق ۇيىمدار قاتىسا الادى.

2018 جىلعى ۇكىمەتتىك ەمەس ۇيىمدارعا ارنالعان گرانتتاردى تاعايىنداۋ  جوسپارىنا سايكەس گرانتتار 11 الەۋمەتتىك ماڭىزى بار باعىتتار بويىنشا 87 تاقىرىپتى قۇرايدى. اتاپ ايتقاندا، ءبىلىم،  عىلىم، اقپارات، دەنە شىنىقتىرۋ جانە سپورت، ازاماتتاردىڭ دەنساۋلىعىن قورعاۋ، سالاۋاتتى ءومىر سالتىن ناسيحاتتاۋ، جاستار ساياساتى مەن بالالار باستامالارىن قولداۋ جانە گەندەرلىك ماسەلەلەردى شەشۋ،  حالىقتىڭ الەۋمەتتىك وسال توپتارىن قولداۋ، ازاماتتاردىڭ قۇقىقتارىن، زاڭدى مۇددەلەرىن قورعاۋ، تاريحي-مادەني مۇرالاردى قورعاۋ جوبالارى بار.

ق ر ءدىن ىستەرى جانە ازاماتتىق قوعام مينيسترلىگى ازاماتتىق قوعام ىستەرى كوميتەتىنىڭ مالىمەتىنە سايكەس، اتالعان جوسپار قازاقستان رەسپۋبليكاسىنىڭ مەملەكەتتىك ساياساتىنىڭ باسىمدىقتارى، قازاقستان رەسپۋبليكاسىنىڭ ستراتەگيالىق جانە باعدارلامالىق قۇجاتتارى، پرەزيدەنت جولداۋلارى، سونداي-اق مەملەكەتتىك ورگانداردىڭ جانە ۇكىمەتتىك ەمەس ۇيىمداردىڭ ۇسىنىستارى نەگىزىندە قۇرىلادى.

مەملەكەتتىك گرانتتار بايقاۋىنا قاتىسۋعا وتىنىشتەر 2018 جىلدىڭ 2ء-شى اقپانىنا دەيىن قابىلدانادى.

ەستەرىڭىزگە  سالا كەتەيىك، ازاماتتىق باستامالاردى قولداۋ ورتالىعى كوممەرسيالىق ەمەس ۇيىم بولىپ تابىلادى، ول قازاقستان رەسپۋبليكاسى ۇكىمەتىنىڭ 2015 جىلعى 31 جەلتوقسانداعى قاۋلىسىنا سايكەس ۇكىمەتتىك ەمەس ۇيىمداردى گرانتتىق قارجىلاندىرۋ سالاسىنداعى وپەراتور بولىپ تابىلادى.