«Qazaqstan» رترك» اق باسقارما ءتوراعاسى ەرلان قارين 2017 جىلى ارنادا بولعان وزگەرىستەرگە شولۋ جاسادى، دەپ حابارلايدى Qamshy.kz اقپارات اگەنتتىگى.
"2017 جىل «Qazaqstan» تەلەارناسى ءۇشىن وڭاي بولا قويعان جوق، سەبەبى، جالپى تەلەنارىقتا تەلەكورسەتىلىم دەڭگەيى تومەندەۋدە، ءبىراق سوعان قاراماستان ءبىز جىلدى جاقسى كورسەتكىشتەرمەن قورىتىندىلادىق. "بارلىق 6+" اۋديتورياسىنىڭ ەسەپتەۋلەرى بويىنشا، تەلەارنانىڭ جىلدىق ورتاشا ۇلەسى 7،2% پايىزدى قۇراپ، وتاندىق تەلەنارىقتا التىنشى ورىنعا جايعاستى. سوڭعى جىلدارى كورەرمەنگە تانىمال بولىپ كەلگەن "كەلىن" تەلەحيكاياسىنىڭ ەفيردە توقتاتىلۋى تەلەارنانىڭ اۋديتورلىق كورسەتكىشتەرىنىڭ تومەندەۋىنە اكەلىپ سوعادى دەگەن بولجام جوققا شىقتى. سەبەبى، تەلەارنا جوبالارىنىڭ تۇراقتى كورسەتكىشتەرى مەن جاڭادان شىققان ءار ءتۇرلى جانرداعى تەلەجوبالار جانە ۇزدىك شەتەلدىك تەلەتۋىندىلار مەديانارىقتاعى تەلەارنانىڭ اۋديتورياسىن تومەندەتۋگە جول بەرمەدى. سوڭعى 4-5 جىلدا كورسەتىلگەن بۇل تەلەحيكايا اۋديتورلىق كورسەتكىشتەردىڭ 25-40 % ۇلەسىن قالىپتاستىرۋدى قامتاماسىز ەتىپ كەلگەن. دەگەنمەن، ۇتىمدى جوسپارلاۋ ارقىلى جاڭادان ساپالى كونتەنت ۇسىنىپ، ناقتى تايم-سلوتتى ىلگەرىلەتۋ جۇمىستارىن ويداعىداي جۇزەگە اسىرعاندىقتان، جاقسى ناتيجەلەرگە قول جەتكىزە الدىق. ارينە، باسىندا بۇل تەلەحيكايانىڭ ەفيردەن الىنۋى اۋديتورلىق كورسەتكىشتەرگە كۇرت اسەر ەتتى. ناۋرىز ايىنان باستاپ، ياعني ءۇندى تەلەحيكاياسى توقتاتىلعان ساتتە تەلەارنانىڭ رەيتينگتىك كورسەتكىشتەرى تومەندەي باستاعان بولاتىن. سونىمەن قاتار، ءدال سول كەزدە ەفيردە ءوتىپ جاتقان قىسقى سپورتتىق ويىندارىنا ارنالعان بۇكىلالەمدىك ۋنيۆەرسيادانىڭ ارناداعى ترانسلياسياسىنىڭ اياقتالۋى دا ءوز اسەرىن تيگىزبەي قويمادى. وعان قوسا ءۇش بىردەي ارنانىڭ ورتاق ولشەمدىك پانەلگە ەنۋى اۋديتورلىق كورسەتكىشتەردىڭ بولىنۋىنە الىپ كەلدى.
ال، ءبىز ءوز تاراپىمىزدان كونتەنتتى جاڭارتۋ جۇمىستارىن جۇرگىزۋدى باستاپ كەتكەن بولاتىنبىز. ءسويتىپ، 2017 جىلدىڭ كۇزىندە كورپوراسيادا رەبرەندينگ جۇمىستارى ءساتتى جۇزەگە اسىرىلدى. ەفيردەگى ۆيزۋالدى وزگەرىستەر مەن ساپالى كونتەنت تەلەارنا كورەرمەندەرىنىڭ ۇلعايۋىنا الىپ كەلدى. قازان ايىنان باستاپ رەيتينگ كورسەتكىشتەرى تۇراقتالىپ، قاراشا-جەلتوكسان ايىندا ايتارلىقتاي ءوسۋ ءۇردىسى بايقالدى. سونداي-اق، ەفيردىڭ 79% ءوزىمىزدىڭ ىشكى ءونىم، بۇل باسقا تەلەارنالارمەن سالىستىرعاندا ەڭ جوعارعى كورسەتكىش. سونىمەن قاتار، تەلەارنا ينتەرنەتتەگى جانە الەۋمەتتىك جەلىلەردەگى ءوز ورنىن كەڭەيتە باستادى. 2017 جىلى YouTube ۆيدەوحوستينگىندە ەنگىزىلگەن ۇلتتىق ارنا جوبالارىنىڭ قارالىمى جالپى ەسەپپەن 77 ملن-نان استى! وسى ورايدا «Qazsport» پەن «balapan» تەلەارنالارى جوعارعى كورسەتكىشتەرگە يە بولىپ، 2017 جىلدىڭ 1 قاڭتارىنان باستاپ كورسەتكىش رەيتينگىسى ولشەنەتىن تەلەارنالار قاتارىنا ەنگەنىن ايتا كەتۋ كەرەك. جىل قورىتىندىسى بويىنشا، كابەلدىك تەلەارنالاردىڭ اراسىندا «balapan» تەلەارناسى جالپى ۇلەسى 3،1% پايىزبەن الدىڭعى قاتاردان ورىن الدى. «Qazsport» تەلەارناسىنىڭ ۇلەسى وسى ۋاقىت ارالىعىندا 1،5% پايىزدى قۇرادى. ال، كورپوراسيا قۇرامىنا كىرەتىن تەلەارنالاردىڭ جالپى ۇلەسى «بارلىق 6+» اۋديتورياسى بويىنشا 11،8% پايىزعا جەتتى. اۋديتوريانىڭ سۇرانىسى مەن تالابىن ەسكەرە وتىرىپ، ەفيردەگى كونتەنتتىڭ ساپاسىن ارتتىرۋ جۇمىسى ءالى دە جالعاسادى".
ايتا كەتەيىك ەرلان قارين «Qazaqstan» رترك» اق باسقارما ءتوراعاسى قىزمەتىنە 2017 جىلدىڭ اقپانىندا تاعايىندالدى.
