شىمكەنتتە وتكەن تويداعى ەرەكشە تورتتىڭ فوتوسى مەن ۆيدەوسى ينتەرنەتتى كەزىپ كەتتى. جەلى قولدانۋشىلارى كونديتەرلىك ءونىمنىڭ كولەمىنە تاڭداي قاعىپ، تويدىڭ ءسان-سالتاناتىن قىزۋ تالقىلادى. 21 ميلليون تەڭگەگە تورت جاساتقان كىم بولدى ەكەن؟ Qamshy.kz اقپارات اگەنتتىگى اشىق دەرەككوزدەردەن الىنعان مالىمەتتەردى ۇسىنادى.

ەسكە سالا كەتەتىن بولساق، وسىدان ءبىراز ۋاقىت بۇرىن شىمكەنت قالاسىندا وتكەن تويداعى تورت الەۋمەتتىك جەلىدە قىزۋ تالقىلانعان ەدى.

بىلەتىندەردىڭ ايتۋىنشا، شاڭىراق كوتەرگەن جاستار – بەلگىلى كاسىپكەر قايرات ساتىبالدىنىڭ قىزى ارۋجان مەن شىمكەنتتىڭ ايگىلى وليگارحى سەرىكجان سەيىتجانوۆتىڭ نەمەرەسى ءامىرجان.

قالىڭدىقتىڭ اكەسى قايرات ساتىبالدى 1970 جىلى الماتى قالاسىندا دۇنيەگە كەلگەن. ول 1990 جىلى ي.س. قونايەۆ اتىنداعى الماتى جوعارى جالپى اسكەري كوماندالىق ۋچيليششەسىن «ينجەنەر-مەحانيك» ماماندىعى بويىنشا ءتامامداعان.

وسىدان سوڭ قايرات ساتىبالدى تۇركىستان اسكەري وكرۋگىنىڭ ءبىر بولىمشەسىندە قىزمەت ەتتى. مۇندا ول الدىمەن ۆزۆودتى، كەيىن روتانى باسقاردى. 1992 جىلى ۇلتتىق قاۋىپسىزدىك ورگاندارىنا كەلىپ، سىبايلاس جەمقورلىققا قارسى كۇرەس باسقارماسى باستىعىنىڭ ورىنباسارى قىزمەتىن اتقاردى. سول ارالىقتا كوميتەتتىڭ جوعارعى كۋرسىن ءبىتىردى. قايرات ساتىبالدى ۇقك-دا التى جىل قاتارىنان جۇمىس ىستەدى. وسى ۋاقىت ىشىندە اباي اتىنداعى مەملەكەتتىك ۋنيۆەرسيتەتتە «زاڭگەر-قۇقىقتانۋشى» ماماندىعىن الىپ شىقتى.

1998 جىلدىڭ ورتاسىندا قايرات ساتىبالدى استانا قالاسى اكىمىنىڭ ورىنباسارى بولىپ تاعايىندالادى. ودان كەيىنگى جىلدارى ول «قازاقويل» كومپانياسىنىڭ ۆيسە-پرەزيدەنتى، ۇقك كادرلارى دەپارتامەنتىنىڭ ديرەكتورى،  «قازاقستان تەمىرجولى» كومپانياسىنىڭ ۆيسە-پرەزيدەنتى، «دۇنيە» كورپوراسياسى» اق ديرەكتورلار كەڭەسىنىڭ تورەعاسى لاۋازىمدارىن اتقاردى.  2010 جىلدىڭ مامىر ايىنان باستاپ «نۇروتان» پارتياسىنىڭ حاتشىسى قىزمەتىندە.

2015 جىلعى اقپاراتتارعا سۇيەنسەك، قايرات ساتىبالدى «Kaspi Bank» اق، «قازاقتەلەكوم» اق، «ءامىر لتد» ج ش س، «دۇنيە-اگرو» ج ش س، «دۇنيە» كورپوراسياسى ج ش س، «دۇنيە-كۇزەت» ج ش س جانە «Alatau Capital Invest» ج ش س اكسيالارىنىڭ ۇلەسكەرى ەكەن.

كۇيەۋ جىگىتتىڭ اتاسى سەرىكجان سەيىتجانوۆ – وڭتۇستىك قازاقستان وبلىسى وتىرار اۋدانى شىلىك اۋىلىنىڭ تۋماسى. 1971 جىلى قازاق حيميا-تەحنولوگيا ينتيتۋتىن «ينجەنەر-قۇرىلىسشى (تەحنولوگ)» ماماندىعى بويىنشا اياقتاعان. ءۇيلى-باراندى، ەكى ۇلى، ءبىر قىزى بار. ەڭبەك جولىن «شىمكەنتپرومستروي» كومبيناتىندا ترەست ماتەريالدارىنىڭ شەبەرى بولىپ باستاعان. كەيىن سەح باستىعى، باس ينجەنەر، زاۋىت ديرەكتورى سياقتى باسشىلىق قىزمەتتەرگە دەيىن كوتەرىلدى . ول جەردە باس-اياعى 16 جىل جۇمىس ىستەدى. وسى كەزەڭدە كانديداتتىق پەن دوكتورلىقتى قورعاپ، سەمەنتتى الماستىراتىن تەحنولوگيا ويلاپ تاپتى. سەيىتجانوۆتىڭ بۇل جاڭالىعى كومبيناتتى اۋىر داعدارىستان الىپ شىقتى.

سەرىكجان سەيىتجانوۆ 1994 جىلى وڭتۇستىك قازاقستان وبلىسى ءماسليحاتىنىڭ دەپۋتاتى، 2000 جىلداردىڭ باسىندا «SAUTS-OIL» مۇناي كومپانياسىنىڭ پرەزيدەنتى بولدى. 2008 جىلى يننوۆاسيالىق سەمەنت زاۋىتىن سالدى. سول جىلى پرەزيدەنت نۇرسۇلتان نازاربايەۆ بيزنەستىڭ الەۋمەتتىك جاۋاپكەرشىلىگى باعدارلاماسى اياسىندا  «جىلدىڭ ۇزدىك الەۋمەتتىك جوباسى» نوميناسياسىن جەڭىپ العانى ءۇشىن «پارىز» التىن مۇسىنشەسىن تاپسىردى.