مەملەكەت باسشىسى نۇرسۇلتان نازاربايەۆ قازاقستان حالقىنا ارناعان جولداۋىندا مەملەكەتتىڭ باسەكەلەستىك جاعدايدا دامۋ قارقىنىن ۇدەتۋ قاجەتتىگىن جەتكىزدى. سوندىقتان مەملەكەت دامۋى ءۇشىن 10 باعىتتى جۇزەگە اسىرۋ قاجەت بولىپ وتىر. بۇل تۋرالى ق ر پارلامەنتى ءماجىلىسىنىڭ دەپۋتاتى، حالىق قاھارمانى، گەنەرال-لەيتەنانت باقىتجان ەرتايەۆ ايتتى، دەپ حابارلايدى Qamshy.kz اقپارات اگەنتتىگى Baq.kz-كە سىلتەمە بەرىپ.

«نەگىزگى ون باعىت ناقتىلانعان پرەزيدەنت نۇرسۇلتان نازاربايەۆ جولداۋىنىڭ ەڭ باستى يدەياسى دا وسىندا. باعامداپ قاراساڭىز، دۇنيەجۇزىنىڭ وركەنيەتتى ەلدەرىنىڭ جاڭارتىلعان ەنەرگيا كوزدەرىن، ياعني، بالامالى قۋات كوزىن يگەرۋگە كوشىپ كەتۋىنىڭ استارىندا ۇلكەن ءمان جاتىر. اسىرەسە، جاپونيا، وڭتۇستىك كورەيا، گەرمانيا، اقش ەلدەرىندە بۇل ءۇردىستىڭ ايرىقشا جولعا قويىلعانى دا نازار اۋدارارلىق جاعداي. «جاسىل ەكونوميكاعا» كوشۋ جولىنداعى قادامدار ءبىزدىڭ قازاقستاندا دا بايقالىپ وتىر. وتكەن جىلى عانا الەمنىڭ 119 ەلى مەن 22 حالىقارالىق ۇيىمىنىڭ عىلىمي قاۋىمداستىعىمەن بىرگە، ءتورت ميلليونعا جۋىق ادامدى ورتاق الاڭدا توعىستىرعان ەحرو–2017 كورمەسى «جاسىل» تەحنولوگيالاردىڭ وتاندىق ەكونوميكاعا ەنۋ پروسەسىن ودان ءارى جەتىلدىرە ءتۇستى. مۇنىڭ بارلىعى سايىپ كەلگەندە، تابيعي رەسۋرستارعا دەگەن عالامدىق دەڭگەيدەگى مۇقتاجدىق ءسىز بەن ءبىز ءومىر ءسۇرىپ وتىرعان ءححى عاسىردا ايقىن سەزىلىپ وتىرعانىن كورسەتەدى. سوندىقتان، جولداۋداعى رەسۋرستىق الەۋەتتى ودان ءارى دامىتۋ تاقىرىبىن ەڭ وزەكتى باعىت رەتىندە اتاعان بولار ەدىم»، - دەيدى ءماجىلىس دەپۋتاتى.

ونىڭ ايتۋىنشا، الدىمىزدا قازاقستانداعى بالامالى قۋات ۇلەسىن 30 پايىزعا جەتكىزۋ مىندەتى تۇر.

«رەسمي دەرەكتەردە دۇنيەجۇزى بويىنشا وندىرىلەتىن ەلەكتر ەنەرگياسىنىڭ تورتتەن ءبىرى جاڭارتىلعان قۋات كوزدەرىنە تيەسىلى ەكەندىگى انىق ايتىلىپ ءجۇر. عالىمداردىڭ بولجامى بويىنشا، 2050 جىلعا قاراي بۇل كورسەتكىش 80 پايىزعا دەيىن جەتەدى. ءقازىر ەلىمىزدە جالپى قۋاتتىلىعى 336 مۆت بولاتىن جاڭارتىلاتىن ەنەرگيا كوزدەرىنىڭ 55 نىسانى جۇمىس ىستەپ تۇر. ەندى ون جىلدان كەيىن ەلىمىزدەگى بالامالى قۋات ۇلەسىن 30 پايىزعا جەتكىزۋ مىندەتىن دە قويىپ وتىرمىز. سايىپ كەلگەندە بۇل شارالار قورشاعان ورتانى قورعاۋعا، ەكولوگيالىق تازالىقتى قامتاماسىز ەتۋگە ىقپال ەتەرى ءسوزسىز. دەمەك، «جاسىل» تەحنولوگيالارعا باعىتتالعان عىلىمي جاڭالىقتاردىڭ وندىرىسكە ەنۋ پروسەسى كەزەك كۇتتىرمەيتىن نەگىزگى قادامدار قاتارىندا بولۋى ءتيىس»، - دەپ اتاپ ءوتتى باقىتجان ەرتايەۆ.