حالىقارالىق تەرروريستىك دايش ۇيىمىنا كىرۋ ماقساتىندا سيرياعا اتتانباق بولعان قاراعاندىلىق ايەل سوتتالدى، دەپ جازادى Qamshy.kz اقپارات اگەنتتىگى.

قىلمىستىق ءىس ماتەريالدارىنا سايكەس، قاراعاندى تۇرعىنى 2016 جىلدان بەرى راديكالدى ءدىني اعىمنىڭ قۇرامىنا ەنىپ، دايش ۇيىمىنىڭ مۇشەلەرىمەن بىرلەسكەنى انىقتالدى. 1 جىل بۇرىن ءدال وسىنداي قىلمىسپەن ونىڭ جۇبايى سوتتالعان.

«2017 جىلدىڭ تامىزىندا سوتتالۋشى دايش تەرروريستىك ۇيىمىنىڭ مۇشەلەرىنە مەديسينالىق نەمەسە باسقا دا كومەك كورسەتۋ ماقساتىندا سيرياعا اتتانۋ تۋرالى شەشىم قابىلدايدى. سول ماقساتتا ايەل جاۋىنگەرلەردىڭ بىرىمەن ۇزدىكسىز ارالاسىپ تۇرعان. ناتيجەسىندە سوتتالۋشىعا قىرعىزستان جانە تۇركيادا ارقىلى ەلدەن شىعۋ ۇسىنىلدى»، - دەلىنگەن Tengrinews.kz جاريالاعان ءىستىڭ ماتەريالىندا.

سونداي-اق سوتتالۋشى ايەل سيرياعا كۇيەۋىنىڭ 18 جاسقا تولماعان ءىنىسىن دە مەملەكەت ساياساتىنا قارسى قويىپ، وزىمەن بىرگە الىپ كەتپەن بولعان. كۇيەۋىنىڭ ءىنىسى سيرياعا بارۋعا كەلىسكەن سوڭ ايەل ول ءۇشىن قوماقتى اقشا قاجەت ەكەنىن جەتكىزدى. الايدا بالادا اقشا بولماعان. سول سەبەپتى ايەل ازىرگە ەلدەن جالعىز شىعۋعا ۇيعارىپ، كەيىن قايىن ءىنىسىن الىپ كەتۋگە بەكىنەدى.

وتكەن جىلدىڭ 14 قىركۇيەگىندە سوتتالۋشى جول جونەكەي كولىك توقتاتىپ جامبىل وبلىسىنداعى قورداي اۋىلىنا باراتىنىن ايتقان. سول جەردەن شەكارا اسىپ كەتۋدى جوسپارلادى. ءسويتىپ 15 قىركۇيەكتە جولعا شىعىپ، اقىر سوڭى ۇستالدى. ول قك 259-بابىنىڭ 2-بولىمىنە سايكەس «ەسiرتكi زاتتاردى نەمەسە پسيحوتروپتىق زاتتاردى زاڭسىز ساقتاۋ، تاسىمالداۋ، بەرۋ نەمەسە وتكiزۋ» بويىنشا جانە قك 24-257-بابىنىڭ 3-بولىمىنە سايكەس «تەرروريستىك توپ قۇرۋ جانە ونىڭ قىزمەتىنە قاتىسۋ» بويىنشا ايىپتالدى.

اتالمىش ءىس قاراعاندى وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا قارالۋدا.