ۇيالى تەلەفونداعى اڭگىمەنىڭ جازىلاتىنى ەشكىمگە جاسىرىن ەمەس. كەرەك بولسا، ارنايى قىزمەتتەر كەز كەلگەن ۋاقىتتا تىڭداي الادى.
تەلەفونداعى اڭگىمەڭىزدىڭ تىڭدالىپ جاتقانىنان قاۋىپتەنەسىز بە؟ ينتەرنەتتە ونى انىقتاۋدىڭ ءتۇرلى جولدارى كورسەتىلگەن. ماسەلەن، سويلەسۋ كەزىندە تەلەفونىڭىز تەز قىزىپ كەتەتىن بولسا، توكقا قوسىپ قويعاندا قاتتى ىسىسا، سويلەسكەن ۋاقىتتا ءوز داۋسىڭىز وزىڭىزگە جاڭعىرىپ ەستىلسە، قۋات كوزى جىلدام تاۋسىلسا – الاڭداۋعا نەگىز بار. ارينە، بۇلاردىڭ بىرەۋى عانا سىزگە سايكەس كەلسە، ول قۇرىلعىنىڭ ءوز اقاۋىنان بولۋى مۇمكىن. دەگەنمەن ساقتىقتا قورلىق جوق.
بىلتىر قۇزىرلى ورىندارعا الەۋمەتتىك جەلىلەردەگى حابارلامالاردى وقۋعا رۇقسات بەرىلگەن. ۇقق مەن پوليسيا قىزمەتكەرلەرى تەرروريزمنەن كۇدىكتەنسە نەمەسە مەملەكەت تۇتاستىعىنا قاتەر ءتوندى دەپ ەسەپتەسە، WhatsApp، Facebook سياقتى مەسسەندجەرلەردەگى حابارلامالارعا قول سۇعۋعا قۇقىلى.
سونىمەن قاتار ۇقق مەن پوليسيا قىزمەتكەرلەرى پروكۋروردىڭ ارنايى سانكسياسىمەن كۇدىكتىلەردىڭ تەلەفون ارقىلى ايتقان اڭگىمەسىن قوزعالعان ءىستىڭ شەڭبەرىندە تىڭداي الادى.
ءقازىر ينتەرنەتتە وزگە بىرەۋدىڭ تەلەفونداعى اڭگىمەسىن تىڭداۋعا جاعداي تۋعىزاتىن سايتتار بار. سۇراعان اقشاسىن تولەسەڭىز بولدى، قاجەت ادامنىڭ تەلەفونداعى اڭگىمەسىنە قۇلاق توسا بەرەسىز. نەگىزى ينتەرنەتتە اشىقتان-اشىق ءوز قىزمەتىن ۇسىناتىن سايتتار زاڭمەن قۋدالانادى. الايدا مۇنداي باعدارلامالاردى جاساپ، جاريالاپ جاتقاندار جاۋاپكەرشىلىكتەن جالتارۋدىڭ ءتۇرلى ءادىسىن ويلاپ تاپقان.
- ينتەرنەتتەگى تەلەفوندى تىڭداۋعا ارنالعان باعدارلامالار زاڭسىز. ءبىراق ولار ءوز قۇقىقتارىن قورعاۋ ءۇشىن ەسكەرتۋ جازىپ قويادى. مىسالى، تەلەفونداعى اڭگىمەسى تىڭدالاتىن ادامنىڭ رۇقساتى قاجەت. مۇنداي جاعدايدا جاۋاپكەرشىلىك باعدارلامانى جاساپ، ءوز قىزمەتىن ۇسىنعاندارعا ەمەس، ول قىزمەتتى پايدالانعان ادامعا ارتىلادى، - دەيدى زاڭگەر قايرات جۇكەل.
ءقازىر تەلەفونمەن سويلەسكەن ءوز اڭگىمەڭىزدى ديكتوفونعا جازىپ الۋعا بولادى. ول ءۇشىن ارنايى باعدارلامانى كوشىرىپ الساڭىز بولعانى. الايدا جاڭا زاڭعا سايكەس، اڭگىمەنى ديكتوفونعا جازۋ ءۇشىن سۇحباتتاسىڭىزدىڭ رۇقساتىن الۋىڭىز كەرەك. ايتپەسە ول جەكە ومىرگە قول سۇعۋشىلىق بولىپ سانالادى. ول ءۇشىن اكىمشىلىك، ءتىپتى قىلمىستىق جاۋاپكەرشىلىككە تارتىلاسىز. مۇنداي جاعدايدا مورالدىق شىعىندى وتەۋ جاعى دا قاراستىرىلعان. ءاربىر قازاقستان ازاماتىنىڭ جەكە حاتتارى، تەلەفونمەن سويلەسۋى زاڭمەن قورعالادى.
