اقتوبە وبلىسىنداعى ءورت شىققان اۆتوبۋستان قازا تاپقان وزبەكستاندىق ەكى تۇرعىن قازانداعى تۇرىك كومپانياسىنىڭ قۇرىلىس نىسانىنا بارا جاتقان. بۇل تۋرالى «وزبەكستان جاڭالىقتارى» حابارلايدى.

جەرگىلىكتى تىلشىلەر قازا تاپقانداردىڭ تۋىستارىمەن تىلدەسىپ قايتتى. حۋسنيددين يسوميددينوۆ ەكى نەمەرەسىنەن بىردەي ايىرىلدى. قاريا ءۇشىن بۇل قازا اۋىر ءتيدى..

قازا تاپقان جىگىتتەردىڭ ۇلكەنى شوحرۋح زاكيروۆ 20 جاستا، ال تۋىس ءىنىسى مۋحاماددين حۋسنيددينوۆ 19 جاستا.

شوحرۋح زاكيروۆ

شوحرۋحتىڭ اكەسىنىڭ ايتۋىنشا، ول بىلتىر تۇرىك كومپانياسىنا بارىپ، قوماقتى قارجى تاۋىپ كەلگەن. وسى جىلى وزىمەن ءىنىسى مەن ەكى دوسىن دا ەرتىپ العان.

«جيەندەرىمنىڭ رەسەيگە اتتانىپ بارا جاتقانىن ولار كەتىپ قالعاننان كەيىن ءبىراق ءبىلدىم. ال بەيسەنبىدە اۆتوبۋستىڭ ورتەنگەنى جايلى حابار ەستىدىك. وندا شوحرۋح پەن ءمۋحاممادديننىڭ بولعانىنا ءالى دە سەنە المايمىن. اعام مەن اپكەمە ۇلدارىنىڭ قازاسىن قالاي جەتكىزەرىمدى ويلاپ، ءتۇنى بويى كوز ىلمەي شىقتىم»، - دەدى قازا تاپقان بالالاردىڭ اعاسى مۋحامماددسولي زييەۆيددينوۆ.

مۋحاممادين حۋسنيددينوۆ (سول جاقتا)

ال جىگىتتەردىڭ ءبىرىنىڭ اكەسى توحيرجون راحيموۆتىڭ وتباسىنا قارالى حاباردى ۋچاسكەلىك پوليسەي حابارلاعانىن ايتتى. پوليسەيدىڭ ايتقانىنا سەنبەگەن اكە مەن انا قازا تاپقانداردىڭ ءتىزىمى جازىلعان رەسمي دەرەك شىقپايىنشا ۇمىتتەرىن ۇزبەگەن. سەبەبى ورتەنگەن اۆتوبۋستا وتىرعان وزبەكستاننىڭ ءبىر تۇرعىنى اپاتتان بۇرىن باسقا اۆتوبۋسقا اۋىسىپ، امان قالعان.

قايتىس بولعان مۋحامميدين دانەكەرلەۋشى بولىپ ءناپاقاسىن تاۋىپ ءجۇردى. تۇراقورعان الەۋمەتتىك-ەكونوميكالىق جانە سپورت كوللەدجىن بىتىرگەن، ترەنەر بولۋدى ارمانداعان. كاراتەمەن شۇعىلدانىپ، ءتۇرلى جارىستاردان جۇلدەلى ورىندار الىپ جۇرگەن.

شوحرۋح تا سول كوللەدجىڭ ستۋدەنتى بولدى. كەيىن تەحنولوگيا سالاسى بويىنشا وقۋىن جالعاستىردى. ول دا سپورتپەن شۇعىلدانعان.

تۋىستارىنىڭ ايتۋىنشا، شوحيدون ەلدە جۇمىس تابىلماعاندىقتان رەسەيگە كەتكەن. تۇراقتى جۇمىس تابۋ دا قيىن، ۋاقىتشا تابىستارمەن كۇنەلتۋگە تۋرا كەلەدى.

قازا تاپقان جىگىتتەردىڭ ەكى باۋىرى بولعان.

ايتا كەتەيىك، اقتوبە وبلىسىنىڭ ىرعىز اۋدانىندا اۆتوبۋس ورتەنىپ، سونىڭ سالدارىنان 52 ادام قازا تاپقان. بەس ازامات امان قالدى، ونىڭ ەكەۋى وزبەكستان ازاماتى بولسا، ۇشەۋى قازاقستاندىق. ال قازا تاپقانداردىڭ ءبارى وزبەكستان ازاماتتارى.