الماس مەلىس ۇلى Art Asia تۋريستىك كومپانياسىمەن كەلىسىمشارتقا وتىرىپ، شەتەلدە وتباسىمەن دەمالۋدى جوسپارلاعان. الايدا ينتەرنەتتە Art Asia تۋرالى حالىقتىڭ جاعىمسىز پىكىرى كوپ بولعاندىقتان اتالمىش كومپانيانىڭ قىزمەتىنەن باس تارتقان. ءوزارا كەلىسپەۋشىلىك وسىدان باستالدى...
Art Asia تۋريستىك كومپانياسىنىڭ وكىلدەرى ساۋدا ورتالىقتارىندا ءجۇرىپ كۋپون تاراتادى. ءتۇرلى ۇتىس ويىندارى ويناتىلىپ جاتقانىن ايتىپ، قاعاز تولتىرتادى. وندا مىندەتتى تۇردە ءاتى-جونىڭىز، تەلەفون ءنومىرىڭىز كورسەتىلەدى. بىرنەشە كۇننەن كەيىن كومپانيا قىزمەتكەرلەرى حابارلاسىپ، شەتەلگە جولداما نەمەسە تۇرمىستىق تەحنيكا ۇتىپ العانىڭىزدى مالىمدەپ، ءسىزدى قۇتتىقتايدى، الماتىداعى لۋگانسكيي كوشەسى 54 ۆ مەكەن-جايىندا ورنالاسقان كەڭسەسىنە شاقىرادى.
الماس مەلىس ۇلى دا ءدال سولاي «ماسكەۋ» ساۋدا ورتالىعىندا كۋپون العان، قاعاز تولتىرعان. وعان دا تۇرمىستىق تەحنيكاعا يە بولعانىن حابارلاعان. جۇبايىمەن كەڭسەگە كەلگەندە تۇرمىستىق تەحنيكا ەمەس، باليگە جولداما ۇتىپ العانىن ايتقان. ال ەگەر 300 مىڭ تەڭگە تولەسە، قوسىمشا ءۇش قالاعا ساياحاتتاي الاتىنىن سۇيىنشىلەپ جەتكىزگەن.
الماس مەلىس ۇلىنىڭ ايتۋىنشا، ولاردى كەڭسەدە ءۇش ساعات ۇستاپ، كوفەلەرىن ۇسىنىپ، ىڭعايلى جاعداي جاساعان. ەڭ قىزىعى، اتالمىش كومپانيا كەڭسەسىنە جۇبايىمەن بارعان الماس مەلىسۇلىنا ايەلىمەن اقىلداسۋعا مۇرشا بەرمەگەن. ءۇش ساعات بويى ءتۇرلى ادەمى جەرلەردىڭ سۋرەتتەرىن كورسەتىپ، كوڭىلدەرىن اۋلاعان.
– بۇل – ادامنىڭ ويلانۋىنا مۇرشا بەرمەي، وزدەرىنىڭ پايداسىنا تەز شەشىم قابىلداتۋ ءۇشىن جاساعان ادىستەرى، – دەيدى الماس مەلىس ۇلى.
Art Asia تۋريستىك كومپانياسى تۇرمىستىق تەحنيكا مەن شەتەلگە جولداما «ۇتىپ العان» بارلىق ادامدى ءدال وسىلاي قىزىقتىرادى. بۇعان دەيىن دە كومپانيا قىزمەتىنە شاعىم ءتۇسىرىپ، اقشاسىن قايتارۋدى تالاپ ەتكەندەر كوپ بولعان. ءتىپتى، ءىستى سوتقا دەيىن جەتكىزگەندەر بار. ءبىراق كومپانيانىڭ تۇتىنۋشىمەن جاساعان كەلىسىمشارتىندا زاڭ بويىنشا ەشقانداي كىنارات جوق.
«Muratov company» زاڭگەرلىك كومپانياسىنىڭ ديرەكتورى سەرگەي ستەپاسيۋكتىڭ ايتۋىنشا، الماس مەلىس ۇلى مەن Art Asia تۋريستىك كومپانياسى اراسىنداعى كەلىسىمشارتتا شەتەلدە دەمالۋ تۋرالى ەشتەڭە جازىلماعان. وندا تەك ساياحاتتايتىن ەلدەردە قوناق ۇيدە تۇرۋ جاعى قاراستىرىلعان، ءبىراق ونىڭ وزىندە مەكەن-جايى ناقتىلانباعان.
- تۇتىنۋشى زاڭ بويىنشا Art Asia تۋريستىك كومپانياسىمەن كەلىسىمشارتتى بۇزۋعا قۇقىلى. دەسە دە كومپانيا كەتكەن شىعىندى ەسەپتەپ، ونىڭ تۇتىنۋشى تاراپىنان وتەلۋىن تالاپ ەتە الادى. تۇتىنۋشى بەلگىلى سومانى تولەپ، اقشاسىن قايتارۋعا قۇقىلى. سونىمەن قاتار تۇتىنۋشى اقشاسىن قايتارۋدى سۇراپ، كومپانياعا حات جولداي الادى. ەگەر كومپانيا تۇتىنۋشى شاعىمىنا قاتىستى ەشقانداي ارەكەت ەتپەسە، قۇزىرلى ورگاندارعا بارۋى قاجەت. الماس مەلىس ۇلىنىڭ جاعدايىندا ول استانا قالاسىنداعى – تورەلىك سوت. الايدا قىلمىستىق ءىس قوزعالۋى ەكىتالاي. سەبەبى كومپانيا بارلىعىن زاڭدى بولاتىنداي جاساعان. دەسە دە كومپانيانىڭ ارەكەتىندە قىلمىستىڭ قۇرامى بار-جوعىن انىقتايتىن ارنايى ورگاندار بار، – دەيدى سەرگەي ستەپاسيۋك.
زاڭگەردىڭ سوزىنشە، الماس مەلىس ۇلى كومپانياعا پوشتامەن حات جولداپ، 15 كۇن كۇتۋى قاجەت. ەگەر وسى ۋاقىت ارالىعىندا جاۋاپ كەلمەسە، سوتقا شاعىمدانۋى كەرەك.
زاڭگەرلەرمەن كەڭەسكەن الماس مەلىسۇلىنا ساراپشىلار كومپانيانىڭ قىزمەت كورسەتۋگە كەتكەن شىعىندى ەسەپتەپ، ءوزىن قارىز قىلىپ قويۋى مۇمكىن ەكەنىن ايتقان.
– ءبىز كەلىسىمشارتتى بۇزاتىنىمىزدى ايتىپ، اقشامىزدى قايتارۋىن تالاپ ەتىپ ارىز جازدىق. سەبەبى مەن ءۇشىن وتباسىمنىڭ قاۋىپسىزدىگى ماڭىزدى. شەتەلگە كەتىپ وتباسىمەن دالادا قالعىم كەلمەدى. سوندىقتان ارىز جازدىم. Art Asia تۋريستىك كومپانياسى ارىزدى قابىلداپ، بەس كۇننىڭ ىشىندە جاۋاپ بەرەتىندەرىن ايتتى. ءبىراق جاۋاپتى 11 كۇننەن كەيىن ءبىراق الدىق. وندا اقشانى قايتارۋ تۋرالى ەشتەڭە جازىلماعان. Art Asia تۋريستىك كومپانياسى Luxurious-Tours LP كومپانياسىنا اقشانى اۋدارىپ جىبەرگەندىكتەن، بىزگە قايتارا المايتىنىن جازعان. سونىمەن قاتار مەن تولەگەن 300 مىڭ تەڭگەنىڭ تەك 10 پايىزى Art Asia كومپانياسىندا قالىپ، وزگە بولىگى Luxurious-Tours LP كومپانياسىنا جولدانعانىن مالىمدەدى. اتامىش شەتەلدىك كومپانياعا دا ارىز جازدىق. Art Asia قىزمەتكەرلەرى ول ارىزدىڭ قارالاتىنىن يا قارالمايتىنىن ناقتى ايتا المادى. ال Luxurious-Tours LP وكىلدەرىمەن تەلەفون ارقىلى سويلەسۋىن سۇراعاندا بۇل وتىنىشىمىزدەن باس تارتتى. الماتىداعى باسشىلارى ورنىندا جوق بولىپ شىقتى جانە قاشان كەلەتىنى تۋرالى اقپارات بەرمەي قويدى، – دەيدى الماس مەلىس ۇلى.
الماس مەلىس ۇلى 24 قاڭتاردا «قامشى» اقپارات اگەنتتىگىنىڭ ءتىلشىسى جازيرا بايدالىمەن Art Asia تۋريستىك كومپانياسىنىڭ كەڭسەسىنە بارعان. كومپانيا قىزمەتكەرلەرى الماس مەلىس ۇلىنىڭ كەلىسىمشارتقا قول قويعانىن جانە ونىڭ مازمۇنىمەن تانىسپاعانىنا ءوزى كىنالى ەكەنىن اشىق ايتقان. ۇتىس ويىندارى تۋرالى بىلگىسى كەلگەن تىلشىمىزگە جۋرناليستەردىڭ كومپانيا كليەنتى بولا المايتىنىن جانە ۇتىس ويىندارى اياقتالعانىنا سەندىرۋگە تىرىسقان. الايدا 25 قاڭتاردا Art Asia تۋريستىك كومپانياسىنا بارعانىمىزدا ۇتىس ويىندارىن «جەڭىپ العان» ادامدار كەڭسەگە لەك-لەگىمەن كەلىپ جاتتى. بارلىعى ءدال الماس مەلىس ۇلىنىڭ وقيعاسىنداي. ساۋدا ورتالىعىندا كۋپون العان. كومپانيا قىزمەتكەرلەرى شەتەلگە ساياحات، تۇرمىستىق تەحنيكا ۇتىپ العانىن ايتقان. سولاردىڭ ءبىرى – ايگەرىم سارتاي قىزى.
– كۋپوندى «سپۋتنيك» ساۋدا ورتالىعىندا الدىم. قانداي ەلدە بولعانىمدى، قاي قالادا دەمالعانىمدى تاپتىشتەپ سۇراپ الدى. ءبىر كۇن وتكەننەن كەيىن حابارلاسىپ ءتۇرلى ۇتىس ويناتىلاتىنىن، سىيلىقتاردىڭ جالپى باعاسى $200 ەكەنىن ايتتى، – دەيدى ايگەرىم.
قازىرگى زاماندا تەگىن دۇنيە ءارقاشان كۇمان تۋعىزادى. سەبەبى تەگىن ساياحاتقا جىبەرىپ، تۇرمىستىق تەحنيكا سىيلاۋدىڭ ارتىندا ادامداردان ودان دا كوپ اقشا ءوندىرىپ الۋ پيعىلى تۇرادى. بۇگىنگى قوعام، بۇگىنگى ءومىر سالتى ادامدارعا سەنبەۋدى، ءوزىڭ تۋرالى اقپاراتتى بەيتانىس ادامنىڭ الدىندا جايىپ سالماۋدى، تەگىن دۇنيەگە الدانباۋدى، ءتىپتى بەيتانىس ادامنىڭ قولىنان شاي ىشپەۋ كەرەگىن اركەز دالەلدەي تۇسەدى. ادام اقشانى ەمەس، اقشا ادامدى بيلەيتىن زامانعا تاپ بولدىق. كەيبىرەۋلەر جاعدايىن جاساپ، قالتاسىن قامپايتۋ ءۇشىن ءتۇرلى پاسىق ارەكەتكە بارادى. مۇندايلاردىڭ قۇرىعىنا تۇسپەۋدىڭ ەڭ جاقسى امالى – ساۋاتتىلىقتى ارتتىرۋ جانە بايقامپاز بولۋ. ايتسە دە ەت پەن سۇيەكتەن جارالعان ادام بولعاندىقتان كەيدە كىسىلىك قاسيەتتىڭ بارىنا سەنگىمىز كەلەدى دە تۇرادى.
