ءتيدى مە ءتۇننىڭ ءتۇرلى زالالى،
اي-قىزدىڭ نەگە مۇڭلى جانارى؟
ويشىل اسپاننىڭ ومىراۋىنان
ءۇزىلىپ ءۇنسىز جۇلدىز اعادى.
ۇيقىسىز جالعاپ ءتۇندى ۇزاق تاڭعا،
(جۇلدىز دەپ ايتىپ ءجۇرمىز وتتارعا).
قۋانىپ قالام، قاراڭعىلىقتىڭ
قۇرساعىن جارىپ جۇلدىز اققاندا.
قاراشىعىما قايعىم تۇنادى،
قامىققان كۇيىم قاي كۇن تىنادى؟
كۇننىڭ نۇرىمەن توگىلىپ تۇسكەن،
ءاپپاق ارمانىم ايعا ۇمتىلادى.
ال اناۋ جۇلدىز ءسونىپ بارادى،
ول ەندى كىمگە سەرىك بولادى؟
سونگەنىن كورىپ، مەندەگى جۇرەك،
كوڭىلسىزدىكتەن كورىك تابادى.
تاعدىردى تىلسىم تانىپ كوكتەگى،
تۇر ەكەن ولار دارىپتەپ نەنى؟
جۇلدىزدىڭ، ءبىراق، ءسونىپ قالعانشا،
جاقسى عوي، جانىم، اعىپ كەتكەنى.
قالقامان سارين
