مولدوۆا كاسىپكەرى اناتوليي ءستاتيدىڭ ايتۋىنشا، ۇلتتىق قورداعى 28 ميلليارد دوللار قازاقستانعا ءالى دە قولجەتىمسىز كۇيدە قالا بەرەدى.

ۇلتتىق قوردىڭ $22.6 ميلليارد قارجىسى امستەردام سوتىنىڭ قاراجاتتى بوساتۋ تۋرالى شەشىمىنە قاراماستان، ءالى دە بۇعاتتاۋلى جاتىر. بۇل جايىندا Qamshy.kz اقپارات اگەنتتىگى Prnewswire.com سايتىنا سىلتەمە جاساپ حابارلايدى.

كاسىپكەر اناتوليي ءستاتيدىڭ سوزىنشە، امستەردام اۋداندىق سوتىنىڭ قاۋلىسى بۇعاتتان شىعارۋعا اسەر ەتكەن جوق، سەبەبى شارا بريۋسسەلدەگى ءبىرىنشى اسسامبلەيا سوتىنىڭ شەشىمىنە سايكەس ەنگىزىلگەن. بۇل شەشىم وسى زاڭ ينستيتۋتىندا تەرگەۋ جۇمىستارى اياقتالعانعا دەيىن كۇشىندە بولادى.

دەرەككوزدە كورسەتىلگەندەي، بريۋسسەل سوتىنىڭ شەشىمى – 2017 جىلدىڭ تامىز ايىندا باستالعان ءارتۇرلى ەۋروپالىق سوت شەشىمدەرىنىڭ ءبىرى. سونىڭ ناتيجەسىندە ستاتي پارتياسى نيدەرلاندى، بەلگيا، شۆەسيا جانە ليۋكسەمبۋرگتە $28 ميلليارد قازاقستاندىق مۇلىكتى بۇعاتتاپ تاستادى.

ەستەرىڭىزگە سالا كەتەيىك، 2018 جىلدىڭ 23 قاڭتارىندا امستەردام اۋداندىق سوتى نيۋ-يورك مەللون بانكىندەگى ۇلتتىق قوردىڭ اكتيۆتەرىن بۇعاتتان شىعارۋ تۋرالى ۇلتتىق بانكتىڭ ءوتىنىشىن ماقۇلداعان بولاتىن. سونىمەن قاتار ادىلەت مينيسترلىگى ۇلتتىق قوردىڭ اكتيۆتەرىنىڭ ءبىر بولىگى بۇعاتتاۋلى كۇيىندە قالاتىنىن مالىمدەگەن.

ودان بۇرىن، 2017 جىلدىڭ جەلتوقسانىندا نيۋ-يورك مەللون بانكى ۇلتتىق قوردىڭ $22 ميلليارد قارجىسىن بۇعاتتاپ تاستاعان بولاتىن.

كەيىنىرەك ستاتي كومپانياسىنىڭ وكىلى شىعىنداردى وتەۋ ءۇشىن «سامۇرىق-قازىنانى» قاشاعان كەن ورنىنداعى ۇلەسىن ساتۋعا مىندەتتەۋدى گوللانديا سوتىنان سۇراۋعا نيەتتى ەكەنىن ايتتى. تەرگەۋ جۇمىستارى بىرنەشە جىلدان بەرى ءجۇرىپ جاتىر. شاعىمداردىڭ جالپى سوماسى $4 ميللياردتان اسادى.

ۇلتتىق قور «سامۇرىق-قازىناعا» تيەسىلى قاشاعان كەن ورنى ساتىلمايدى دەدى. ادىلەت مينيسترلىگى ءستاتيدىڭ تالابىن تىم اگرەسسيۆتى پروپاگاندا دەپ اتادى. ادىلەت ءمينيسترى ادىلەت بەكەتايەۆ ءوز كەزەگىندە مولدوۆالىقتىڭ قازاقستاندى $167 ميلليون شىعىنعا ۇشىراتقانىن ايتتى.