الماتىدا "التىن قالام" ادەبي جۇلدەسى اياسىندا كەزدەسۋ ءوتتى. شارا بارىسىندا اۆتورلارعا العاش رەت ادەبي "وسكار" سىيلىعى تابىس ەتىلدى، دەپ حابارلايدى Qamshy.kz اقپارات اگەنتتىگى. 

اتالعان سىيلىق بۇگىنگى زامان ادەبيەتىن دامىتۋعا ەلەۋلى ۇلەس قوسقان قالامگەرلەرگە بەرىلدى. جەڭىمپازدار "التىن قالام" بايقاۋى مەن الەۋمەتتىك ەكونوميكا جانە ساياسات ينستيتۋتىنىڭ الەۋمەتتانۋشىسى ايمان ءجۇسىپوۆا بىرلەسىپ جۇرگىزگەن الەۋمەتتىك زەرتتەۋدىڭ قورىتىندىسى بويىنشا انىقتالدى. زەرتتەۋگە ادەبيەت، عىلىم، بيزنەس سالاسىنداعى بەدەلدى 50-دەن استام ساراپشى قاتىسىپ، قازاقستاندىق ادەبيەتتىڭ دامۋ بارىسى مەن بۇگىنگى كىتاپ نارىعىنىڭ جاعدايىنا بايلانىستى جەكە پىكىرلەرىن ءبىلدىردى. ساراپشىلار سونداق-اي، قازىرگى تاڭدا سۇرانىسقا يە ادەبي جانرلارى، ۇزدىك اۆتورلار مەن ۇزدىك كىتاپتاردى اتاپ ءوتتى. 

كەزدەسۋ بارىسىندا   جىلدىڭ ۇزدىك باسپاسى، جىلدىڭ ادەبي دەبيۋتى، كiتاپ like (وقىرماندار تاڭداۋى)، الەۋمەتتىك مانگە يە تاقىرىپقا ارنالعان ۇزدىك كىتاپ، جىلدىڭ ۇزدىك مەسەناتى (ادەبيەتكە كورسەتكەن قولداۋى ءۇشىن) اتالىمدارى بويىنشا مۇسىنشەلەر مەن ديپلومدار تابىستالدى. 

"جىلدىڭ ەڭ ۇزدىك باسپاسى" اتالىمى بويىنشا "ولكە" باسپاسىنىڭ ديرەكتورى مەرەكە قۇلكەنوۆ ماراپاتتالدى. 

"ۇزدىك باسپا اتانۋ ءۇشىن ەڭ الدىمەن قازاق قالامگەرىنىڭ قانداي دەڭگەيدە ەكەنىن انىقتاپ الۋ كەرەك. نە بولسا سونى باسىپ شىعارا بەرۋگە بولمايدى. ەكىنشىدەن، قازاق ءتىلدى جازۋشىلارعا قامقورلىق كەرەك"،-دەپ جاۋاپ بەردى  مەرەكە قۇلكەنوۆ ايدوس سارىمنىڭ ساۋالىنا. 

"جىلدىڭ ادەبي دەبيۋتى" اتالىمى بويىنشا ولەگ چەرۆينسكيي ماراپاتتالسا، وقىرماندار تاڭداۋىمەن "كىتاپ like" اتالىمى بويىنشا زيرا ناۋرىزبايەۆانىڭ "چەتىرە وبلاكا" كىتابى ۇزدىك دەپ تانىلدى.   

"الەۋمەتتىك مانگە يە تاقىرىپقا ارنالعان ۇزدىك كىتاپ" اتالىمى بويىنشا «قازاقستان» رترك» اق باسقارما ءتوراعاسى  ەرلان كاريننىڭ "مەجدۋ يگيل ي ال-كايدوي" كىتابى ۇزدىك دەپ تانىلدى. 

ال ادەبيەتكە كورسەتكەن قولداۋى ءۇشىن "جىلدىڭ ۇزدىك مەسەناتى" نوميناسياسى ZHERSU ينۆەستيسيالىق-وندىرىستىك كورپوراسياسىنىڭ ءتوراعاسى باۋىرجان وسپانوۆقا بۇيىردى. 

ماراپاتقا يە بولعان بەس تۇلعامەن ۇيىمداستىرۋ كوميتەتىنىڭ مۇشەلەرى ايدوس سارىم، دوسىم ساتپايەۆ، نۇرجان جالاۋ قىزى، راسۋل جۇمالى جانە قۋات دومباي شاعىن سۇحبات جۇرگىزدى. 

ال جەڭىمپازدارعا تابىستالعان مۇسىنشەلەر "ەلداني" قايىرىمدىلىق قورىنىڭ "ساندىك-قولدانبالى ونەر شەبەرحاناسىندا" دايىندالدى. اتالعان ۇستاحانادا ءبىرىنشى جانە ەكىنشى توپتاعى مۇگەدەك 15 شەبەر جۇمىس ىستەيدى.

"التىن قالام" قۇلاشىن كەڭ جايىپ كەلەدى. بايقاۋعا قاتىسۋشىلار قاتارى دا ، جولدانعان جۇمىستار سانى دا جىل وتكەن سايىن ارتىپ كەلەدى،-دەيدى ۇيىمداستىرۋشىلار. 

ءوز سوزىندە ايدوس سارىم "وقىرماندار اراسىندا دا بايقاۋ ۇيىمداستىرۋ كەرەك"،-دەپ ايتىپ ءوتتى. 

ادەبي كەشتىڭ قوداۋشىلارى:  “ZHERSU” ينۆەستيسيالىق-وندىرىستىك كورپوراسياسى،   QAZKOM،   "رۋسسكوە راديو ازيا"، «قازاقستان باسپا ءسوز كلۋبى»، "كتك"، "31 ارنا"،  "مەلومان" ساۋدا جەلىسى، Qamshy.kz اقپارات اگەنتتىگى،  "ايقىن"، "جاس الاش" باسىلىمدارى، "ارۋنا" باسپا ءۇيى.