ش.ايمانوۆ اتىنداعى «قازاقفيلم» كينوستۋدياسى تمد ەلدەرى ىشىنەن العاش بولىپ ازيا-تىنىق مۇحيت ايماعىنداعى كينووندىرۋشىلەر فەدەراسياسىنىڭ مۇشەسى اتاندى، دەپ حابارلايدى Qamshy.kz اقپارات اگەنتتىگى.  

كينوستۋديانىڭ فەدەراسيا قۇرامىنا كىرەتىنى تۋرالى شەشىم باسقارما مۇشەلەرىنىڭ بەيجىڭدە وتكەن «ازيا-تىنىق مۇحيت ايماعىنداعى ەلدەردىڭ كينو سالاسىنداعى بىرلەسكەن ىنتىماقتاستىعى – 2018» اتتى 10-شى سەزدىندە ايتىلدى.

ازيا-تىنىق مۇحيت ايماعى كينووندىرۋشىلەر فەدەراسياسىن 1954 جىلى گونكونگتىڭ تانىمال كينەماتوگرافيستى، مەسەناتى، مەدياماگناتى، جۇڭگو كينووندىرىسىنىڭ باستاۋىندا تۇرعان شاۋ يفۋ قۇرعان.  

فەدەراسيانىڭ نەگىزگى باعىتى – كينووندىرىستى دامىتۋداعى ىقپالداستىق، ازيا-تىنىق مۇحيت ايماعىنداعى ەلدەر كينوگەرلەرى اراسىندا دوستىق قارىم-قاتىناستى نىعايتۋ، سونىمەن قاتار، ازياداعى تاريحى تەرەڭدە جاتقان كينوفەستيۆالدى وتكىزۋ.

كينەماتوگرافياسى دامىعان، الەم مويىنداعان جاپونيا، جۇڭگو، ءۇندىستان، وڭتۇستىك كورەيمەن قاتار، فەدەراسيا قۇرامىنا، كينوونەرى قارقىندى تۇردە دامىپ كەلە جاتقان اۆستراليا، جاڭا زەلانديا، مالايزيا، تايلاند، ۆەتنام، يندونەزيا، سينگاپۋر، فيليپپين، يران، پاكىستان جانە باسقا ەلدەر دە ەنگەن. بارلىعى 24 مەملەكەت.  

قازاقستان كينەماتوگرافيستەرى ءۇشىن بۇل جاڭاشا دامۋ، كينووندىرىستەگى جاڭا تەحنولوگيالاردى يگەرۋ جانە فەدەراسيا مۇشەلىگىندەگى ەلدەرمەن بىرلەسكەن جوبالاردى ىسكە اسىرۋ ارقىلى سول ەلدىڭ كينورىنوگىنا ەنۋ.

 ايتا كەتەلىك، حالىقارالىق ىنتىماقتاستىق باعىتىندا كينوستۋديا بىرنەشە جوبالاردى دا قولعا العان. 2017 جىلى «قازاقفيلم» ءۇندىستاندىق كينەماتوگرافيستەرمەن بىرلەسكەن جوبانى ىسكە اسىرعان بولاتىن. «ءقازاقفيلمنىڭ» قاتىسۋىمەن ەلىمىزدىڭ كورىكتى جەرلەرى كورىنىس تاپقان رەجيسسەر ساچيندرا شارمانىڭ  «Love you family» اتتى تۋىندىسى العاش رەت تەك قازاق تىلىنە ءتارجىمالانىپ، «تۋعان ءۇيىم تىرەگىم» اتتى اتاۋمەن وتاندىق كينوپروكاتقا جىبەرىلدى.

سونداي-اق، كينوستۋديانىڭ وندىرىسىندە ازيا-تىنىق مۇحيت ەلدەرى كينووندىرۋشىلەرى فەدەراسياسىنىڭ تاعى ءبىر مۇشە مەملەكەتى - قىتايمەن جوباسى بار. «كومپوزيتور» ءفيلمى ەكىنشى دۇنيەجۇزى سوعىسىندا الماتىدا ءومىر سۇرگەن قىتايلىق كومپوزيتور سي سين حاي مەن قازاقتىڭ ۇلى كومپوزيتورى باقىتجان بايقاداموۆتىڭ دوستىعى تۋرالى باياندايتىن كوركەم تۋىندى.

ازيا-تىنىق مۇحيت ايماعى ەلدەرىنىڭ كينووندىرۋشىلەر فەدەراسياسىنا مۇشە بولۋ «قازاقفيلمگە» بىرلەسكەن جوبالاردى ىسكە اسىرۋعا مۇمكىندىگىن بەرەدى. بۇگىندە بۇل كينوستۋديانىڭ باسىمدىق بەرىپ وتىرعان باعىتتارىنىڭ ءبىرى.