2018 جىلدىڭ 1 قاڭتارىنداعى جاعداي بويىنشا ەلىمىزدەگى حالىق سانى 18 157،1 مىڭ ادامعا جەتتى. سونىڭ ىشىندە قالالىقتار — 10 426،5 مىڭ ادام (57،4 پايىز)، اۋىلدىقتار — 7 730،6 مىڭ ادام (42،6 پايىز). بۇل تۋرالى Qamshy.kz اقپارات اگەنتتىگى ق ر ۇلتتىق ەكونوميكا مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.

ۆەدومستۆو مالىمەتىنشە، بۇل كورسەتكىش 2017 جىلعى 1 قاڭتارمەن سالىستىرعاندا 231،2 مىڭ ادامعا نەمەسە 1،3 پايىزعا ءوستى.

«احات ورگاندارى ۇسىنعان ازاماتتىق حال اكتىلەرى جازبالارىنداعى مالىمەتتەردى وڭدەۋ ناتيجەسىندە، 2017 جىلعى قاڭتار-جەلتوقساندا تۋىلعاندار سانى — 390،5 مىڭ ادام. بۇل 2016 جىلعى قاڭتار-جەلتوقسانعا قاراعاندا 4،7 پايىزعا از. تۋۋدىڭ جالپى كوەففيسيەنتى 1000 ادامعا 21،65»، — دەلىنگەن مينيسترلىكتىڭ حابارلاماسىندا.

سونداي-اق، 2017 جىلعى قاڭتار-جەلتوقساندا رەسپۋبليكا حالقىنىڭ تابيعي ءوسىمى 2016 جىلعى قاڭتار-جەلتوقسانمەن سالىستىرعاندا 17،0 مىڭ ادامعا نەمەسە 6،1 پايىزعا كەمىپ،  260،5 مىڭ ادامعا جەتكەنى ايتىلادى. ۆەدومستۆو مالىمەتىنشە، تابيعي ءوسىمنىڭ جالپى كوەففيسيەنتى 1000 ادامعا شاققاندا 14،44 ادامعا تەڭ بولدى.

ال قايتىس بولعاندار سانى جايلى مالىمەتكە قاراعاندا، ءولىم-جىتىمنىڭ جالپى كوەففيسيەنتى 1000 ادامعا 7،21 ادام.

باسپا ءسوز قىزمەتىنىڭ مالىمەتىنشە، 2017 جىلعى قاڭتار-جەلتوقساندا رەسپۋبليكادا 1 جاسقا دەيىنگى  3150 نارەستە ءولىمى تىركەلدى.

«2016 جىلعى قاڭتار-جەلتوقسانمەن سالىستىرعاندا  1 جاسقا دەيىنگى شەتىنەگەن نارەستە سانى 10،6 پايىزعا ازايدى. نارەستە ءولىم-جىتىمىنىڭ نەگىزگى سەبەبى — پەريناتالدىق كەزەڭدە پايدا بولاتىن جاعدايلار، بۇدان 2017 جىلعى قاڭتار-جەلتوقسانادا 1586 نارەستە قايتىس بولىپ، نارەستەلەر اراسىنداعى جالپى ءولىم سانىنىڭ 50،3 پايىزعا قۇرادى. تۋا بىتكەن اۋىتقۋلاردان 731 نەمەسە 23،2 پايىزعا، تىنىس ورگاندارى اۋرۋلارىنان -195 نەمەسە 6،2 پايىزعا جانە جازاتايىم جاعدايدان، ۋلانۋدان جانە جاراقاتتان — 168 نەمەسە 5،3 پايىزعا نارەستە قايتىس بولدى.  2017 جىلعى قاڭتار-جەلتوقساندا نارەستە ءولىم-جىتىمىنىڭ كوەففيسيەتى 1000 تۋعاندارعا شاققاندا 8،07 بولدى»، — دەپ حابارلادى باسپا ءسوز قىزمەتىندەگىلەر.

كوشى-قون قىزمەتى ورگاندارى ۇسىنعان مالىمەتتەردى وڭدەۋ ناتيجەسىندە، 2017 جىلعى قاڭتار-جەلتوقساندا ەلىمىزگە تۇرعىلىقتى تۇرۋعا كەلگەندەردىڭ تىركەلۋ سانى 2016 جىلعى قاڭتار-جەلتوقسانمەن سالىستىرعاندا 20،5% كوبەيىپ، 16 081 ادام قۇرادى. ەلىمىزدەن كەتكەن كوشىپ-قونۋشىلاردىڭ تىركەلۋ سانى 7،8 پايىزعا كوبەيىپ،  37 704 ادام بولدى، كوشى-قوننىڭ ايىرىمى -21 623 ادام.

سونداي-اق، ەلىمىزدەگى نەگىزگى كوشى-قون الماسۋىنىڭ تمد مەملەكەتتەرىمەن ەكەنى ايتىلادى.

— تمد ەلدەرىنەن كەلگەندەردىڭ ۇلەسى — 72،1 پايىز؛

— تمد ەلدەرگە كەتكەندەردىڭ ۇلەسى — 89،4 پايىز.

«ءوڭىرارالىق كوشىپ-قونۋشىلاردىڭ ۇلەسىنە ەلىمىزدىڭ جالپى ىشكى كوشىپ-قونۋشىلار سانىنىڭ 35،4 پايىزىن الدى. ءوڭىرارالىق كوشى-قوننىڭ وڭ ايىرىمى:  استانا قالاسى — 36 449 ادام؛ الماتى قالاسى — 31 775 ادام؛ اقمولا وبلىسى — 1 544 ادام قالىپتاستى»، — دەپ حابارلادى ۆەدومستۆونىڭ باسپا ءسوز قىزمەتى.