2017 جىلى 25 جەلتوقساندا الاشوردانىڭ قۇرىلعانىنا  100 جىل تولۋىنا وراي  Qamshy.kz اقپارات اگەنتتىگى  يگى جاقسىلاردىڭ باسىن قوسىپ، «الاش ارىستارىنىڭ 100 ءىزباسارىن» ماراپاتتاعان بولاتىن.

وسى كەشتە بەلگىلى قوعام قايراتكەرى، ساياساتكەر سەرىكبولسىن ءابدىلدىن الاش ءىزباسارلارىنىڭ اتىنان ءوزىنىڭ ىقىلاسىن ءبىلدىردى.

- ەڭ ءبىرىنشى جاستارعا ءوزىمنىڭ سەزىمىم، سەنىمىم تۋرالى ايتقىم كەلەدى. الاشتىڭ كوسەمدەرى ءبىلىمدى ادامدار بولدى. قاي ۋاقىتتا بولسىن، ءبىلىمنىڭ جولى مىقتى ەكەنىن ءتۇسىنۋ كەرەك. 100 جىل بۇرىن بولعان وقيعا ءقازىر جاستار تاراپىنان قايتادان كوتەرىلىپ، ناسيحاتتالىپ جاتقانى، رۋحاني كۇش ءۇشىن قولدانىلىپ جاتقانى  قاسيەتتى دەپ ەسەپتەيمىن. ءبىز تالاي  قيىندىقتار مەن جولداردان وتتىك. كەزىندە «لەنين جولى» بولسا، ەندى «نۇرلى جول» بولىپ جاتىر. كەلەشەكتە قازاقستاننىڭ جولى «الاش جولى» بولسا دەگەن ىقىلاسىم بار. الاش جولى مەملەكەتتى كۇشەيتۋدىڭ عانا جولى ەمەس. «الاش جولى» – ادىلەت جولى. ول – ءبىلىمنىڭ جولى، رۋحاني كۇش بەرەتىن جول، – دەيدى سەرىكبولسىن ءابدىلدين. 

— قازاقستاندا الاشوردانىڭ 100 جىلدىعى ءوز دەڭگەيىندە تويلانىپ جاتىر ما؟

— الاشوردانىڭ 100 جىلدىعىن ءبىز تاۋەلسىزدىك العاننان باستاپ وسى ۋاقىتقا دەيىن جاقسىلاپ وتكىزۋىمىز كەرەك ەدى. 25 جىلدىڭ ىشىندە الاش تۋرالى كوپ ماعلۇمات تاراتۋىمىز كەرەك ەدى. ال 100 جىلدىعىنا وراي مەملەكەت تاراپىنان ۇلكەن توي ۇيىمداستىرىلۋى كەرەك ەدى. توي دەپ تۇرعانىم ۇلكەن داستارحان جايۋ ەمەس. قازاقستان ازاماتتارىنا الاش ءدامىن تاتقىزىپ، الاش قوزعالىسىنىڭ ماڭىزىن سەزدىرەتىندەي شارا جاسالۋى كەرەك ەدى. وكىنىشتىسى، حالقىمىز مۇنداي ماعلۇماتتاردى الا العان جوق.

— جاستارعا الاش رۋحىن ناسيحاتتاۋ ءۇشىن قانداي قادامدار جاساۋىمىز كەرەك دەپ ويلايسىز؟

— ەڭ ءبىرىنشى قادام – قازاقتىڭ رۋحاني كۇشىن بيىك ۇستاۋىمىز كەرەك. ەكىنشىدەن، مىقتى ەل بولۋ ءۇشىن جاقسى ءبىلىم الۋىمىز كەرەك. ۇشىنشىدەن، ءبىز مىقتى قازاق مەمەلكەتىن قۇرۋمىز ءۇشىن باسقالارعا ەلىكتەپ، جالتاقتاۋىمىزدىڭ كەرەگى جوق. سەبەبى قازاقتا رۋح تا، كۇش تە بار. تەك بىرلىك كەرەك. قازاق بىرىكسە بولدى، جەردىڭ استى دا، ءۇستى دە بايلىققا تولى.

مەملەكەت قايراتكەرى سەرىكبولسىن ءابدىلدين – تاۋەلسىز قازاقستانداعى كوممۋنيستىك پارتيانىڭ العاشقى حاتشىسى. ول  قازكسر جوعارعى كەڭەسىنىڭ ون ءبىرىنشى شاقىرىلىمىنىڭ دەپۋتاتى، قازكسر جوعارعى كەڭەسىنىڭ ءتوراعاسىنىڭ ورىنباسارى، قازكسر جوعارعى كەڭەسىنىڭ ءتوراعاسى، قازاقستان رەسپۋبليكاسىنىڭ پارلامەنت ءماجىلىسىنىڭ دەپۋتاتى قىزمەتتەرىن اتقارعان. 11-گە جۋىق عىلىمي ەڭبەك پەن 6 مونوگرافيانىڭ اۆتورى.